الميه جت ؟؟ لسه

طبعا كلنا عارفين الأستغماية اللي كنا بنلعبها وإحنا أطفال وبنستخبى من بعضنا وواحد بس يغمى عينه ويستنى الباقيين يستخبوا عشان يدور عليهم ويفضل يقول لهم خلاص هما يقولوا لسه لحد ما يستخبوا فعلا

حاليا بقى بقينا بنلعب اللعبة دى بس مش مع أطفال لا دى مع ناس كبيرة قووووووووى وبقت اللعبة عن طريق الميه اللي خير اللهم أجعله خير صحينا من نومنا من حوالي 12 يوم لاقينا الميه قاطعة وتخيلنا أنها عادى شوية وهاتيجى وفات يوم على يوم ومفيش جديد وطلع الموضوع كبير ومعقد وممكن ياخدله شهور عما يخلص وبقينا عمالين كل شوية نلعب نروح نفتح الحنفية

ها الميه جت

لا لسه ماجاتش

وطبعا الوضع كل يوم يزداد سوء وراحت تخيلاتي لما بعد الكام اللي فاتوا لو الوضع أستمر بالشكل ده شهور زى ما فيه ناس بتقول هيبقى شكل الحياة أزاي

وإذ فجأة جاتلى فكرة جهنمية وقلت بس هو مش النيل قدام بيتنا على طول طيب تمام دلوقتى الواحد يصحى من نومه بدل ما يروح يغسل وشه من الحنفية يقف على شط النيل ويغسل وشه ويظبط نفسه وبعدين يروح شغله

حد هيقولى طيب عايزين نغسل الهدوم ومش عارفين نشغل الغسالات لا العادية ولا الاتوماتيك عشان محتاجة ميه كتير

وطبعا الحل بسيط جدا فاكرين الطشت بتاع زمان الالومنيوم ده أيون الواسع الكبير ده كل واحدة تجيب لها أربعة خمسة منه وتجيب الهدوم وتقعد على شط النيل وتنقع الهدوم مع شوية مسحوق وشوية وتغسلها في الميه وأدى أديله أدى لحد ما الهدوم تنضف وبالمرة تجيب كام حبل وتربطهم بين الشجر وتنشر الهدوم وهيا ساعة زمن والهدوم هتنشف

بذمتكم فيه أسهل من كده

حد هيقولى طيب عايزين ناخد ( شاور ) دش لا مؤاخذة

ياااااااااااااه دى أسهل حاجة يا جدعان أنتوا بتهزروا على فكرة

بالنسبة للرجالة ياخدوا بعضهم وعلى النيل عدل وهوب ينطوا فيه وياخدوا أحلى دش

وبالنسبة للستات عارفين الزير أيووووووووون سمعاكى ياللى بتقولي بتاع مسرحية المتزوجون زير حبنا وكوز حبنا هاتيلك كام واحد ليكى وللعيال وأمليه ميه وعيشوا بقى ولا أجدعها بانيو

وبالنسبة للناس اللي شوارعها أتغرقت من المجارى بذمتكم ليكم عين تشتكوا ما هي الشوارع بقت مصيف طبيعي أهي يعنى تقدروا تاخدوا الدش بتاعكم وتغسلوا وشكم وهدومكم فيها وكمان الصيف قرب شمسيتين وكرسي وهتبقى أخر تمام

وفى الأخر أهي الناس مظبطانا ومروقانا على الآخر ونزلوا لينا جدول لرجوع الميه ولا أحسن جدول حصص هو أينعم ساعات الميه ما بتجيش في نفس المواعيد دى ولما بتيجى عادة ما بتبقاش نضيفه وبتبقى ساعات ضعيفة بس أهو نص العمى ولا العمى كله وأهو الناس كتر خيرهم أدونا الجدول

يعنى كل واحد جدولة في أيده وكوزه وزيره وطشته وشمسيته وعيشوا أحلى حياة عايزين إيه أكتر من كده

وأخيرا ده تقريبا اللي بيسموه هم يبكى وهم يضحك محدش عايز يستضيفني عنده كام شهر كده لحد ما الميه ترجع

عريس تقفيل ثورة كلاكيت تانى وتالت مرة

عريس تقفيل ثورة كلاكيت تانى مرة فى موقع الشرقية اليوم
هنا

وكلاكيت تالت مرة فى جريدة نهضة مصر
العدد الأسبوعى 17،18 مارس 2011

دقت ساعة العمل فى نهضة مصر

مقال دقت ساعة العمل
جريدة نهضة مصر
العدد الأسبوعى 11مارس 2011

المقال هنا

نهضة مصر

مقال عزيزى فالنتين لبسمه عبدالباسط

جريدة نهضة مصر

العدد الأسبوعى
4مارس 2011

دقت ساعة العمل

عندما تكثر أحلامنا وطموحاتنا لا نجد مفر من محاولة تحقيقها مهما كلفنا الأمر من تعب وعناء ولكن لذة تحقيق الحلم ورؤيته واقع ملموس تنسيك أي تعب

ولأني كائن غريب الأطوار وكل من يعرفني جيدا يعرف هذا وخاصة من عاصرني منذ يوم ولادتي إلى هذا اليوم يعرف معنى كلامي جيدا ويعرف أنى مجنونة متخفية في ثوب عاقلة أو عاقلة بجنون لا يهم المسمى الآن ولكن المعنى هو الأهم

ولذلك كان لآحلامى نصيب كبير من هذا الجنون فأنا كما يقال سبع صنايع والبخت ........ ( محدش شاف البخت بتاعى بدور عليه ومش لاقياه ، بخت تايه يا ولاد الحلال ) ومازال البحث جارى عن البخت

عندما ترى الجنون متمثلا في شخصك وتقلب نظام يومك ويصبح نهارك ليلا وليلك نهارك وفجأة وبدون سابق إنذار تقرر عودة الوضع الطبيعي لتصبح بين يوم وليلة تنام وتستيقظ مثل الناس الطبيعيين ويبدأ يومك مبكرا جداااااااااااااا لتجد لسان حال ساعتك البيولوجية يقول لك ( منك لله يا بعيد بتغير نظامك 360 درجة مرة واحدة ده جنان ده ولا إيه طيب قدم شوية أتأخر شوية ولكن مرة واحدة كده ) وتهددك ساعتك هذه أنها من الممكن أن تعاندك وتقف عن العمل حتى تكف عن جنانك هذا

عندما تنام وعقلك يفكر في شيء ما ثم تستيقظ لتجد عقلك مازال يفكر في نفس الشيء اعلم أنك وصلت فعلا لأعلى درجات الجنان خاصة لو صاحب هذا أحلام كثيرة عديدة وأنت نائم تترجم حالتك وما تشعر به وتتمناه

عندما تقف في المطبخ لتغسل الأطباق وتطهو الطعام وفى نفس الوقت تتابع كل شيء على النت والتليفزيون وتسير من المطبخ إلى الأنترية لمتابعة المسلسل ( وبالمناسبة هو مسلسل قصة حب بتاع جمال سليمان وبسمه ) ثم تذهب إلى غرفتك لتنظر إلى اللاب توب الموجود على فراشك لتتابع ما يحدث ثم يرن جرس الباب والهاتف وأنت تفعل كل هذا مرة واحدة فاعلم أنك إنسان غير طبيعي بالمرة ووقتها تتذكر مقولة ( المورستان مصلحتك أولا )

عندما تجد أعمال كثيرة وأحلام أكثر على حافة التحقيق فسارع إلى تحقيقها ولا تسمع إلى أصوات اليائسين التي تناديك للنوم في العسل ونسيان ما كنت تود فعله وتذكر وقتها أنه بالفعل دقت ساعة العمل

محمد نبينا

------------------------------
من موقع مصطفى حسنى

السيرة النبوية
http://mustafahosny.com/article.php?cat_id=44
------------------
فى رحاب البخارى
http://mustafahosny.com/albokhary.php
...-------------------
الحبيب المصطفى
http://mustafahosny.com/article.php?cat_id=4
---------------------
ملخص السيرة النبوية
http://mustafahosny.com/pagination.php?type=articles&cat_id=133

عزيزى فالنتين

عزيزى فالنتين

تحية طيبة وبعد

لم أكن أعرف أن رسالتى هذا العام سوف يكون لها طابع خاص ربما لأنى كل عام عندما يأتى هذا العيد أتمنى أن أحتفل به ويكون الأحتفال له شكل مختلف ولكن تشاء الظروف أن أحتفل بمفردى

وكعادة كل عام يأتى شهر فبراير وأنظر حولى مجددا لأجدنى بمفردى ولكن هذا العام كان يحمل معه مفاجأت كثيرة جدااااااااااااا وكان لهذا العيد طابعا مختلفا وطعما آخر

لحظة لا تترك لعقلك العنان وتتخيل أنى أحتفلت به مع أحدهم فأنا مازلت كما أنا بمفردى وكان يومى مثله مثل أى يوم ولكن طعم الحب زاد بداخلى

أعرف أنك تتسائل الآن كيف أنت بمفردك وفى نفس الوقت تحتفلين بالعيد هل أنت مجنونة ؟

لحظة يا سيدى أترك لى الوقت كى أشرح لك

فالحب بالنسبة لى ليس فقط حب الرجل للمرأة ولكن حب كل الناس حب أهلى حب أصدقائى

والأهم حب مصـــــــــــــــــــــــــر

وهذا العيد كان عيد حب مصـــــــــــــــر وأحتفال بعودة الحرية والأمن وموت عصر الفساد

هذا العيد كان مختلفا لأن الأمل عاد لى مجددا فى أحتمال تغير الأوضاع وعودة أخوتى مرة آخرى للعيش داخل مصر

هذا العيد مختلف لأنى أرى بنات وأولاد مختلفين جدا

هذا العيد مختلف لأن أرى مصر جديدة وبلد جديدة وناس جديدة

هذا العيد مختلف لأن الأمل عاد لكل الناس من جديد الأمل فى كل شىء وأى شىء

لذلك فأصبح اليوم عيد حب لكل الناس

عيد حب مصــــــــــــــــــــــــر لذلك كانت هذه أول مرة أحتفل فيها بعيدك هذا

بداية جديدة

بداية جديدة

حلم جديد

حياة جديدة

مصر جديدة

وده أختصار لكلام كتير قوووووووى جوايا مش قادرة أكتبه ولا راضى يطلع بس الكلمات دى وصلت المعنى اللى جوايا

كلنا هذا الكشكول

أيوة عندنا كشاكيل عشان مالناش فى الأجندات قوى وفيه ملايين عندهم كشاكيلهم الخاصة

والكشكول مش لازم يكون مجموعة ورق بنكتب فيها لأن كتير مننا بيحفروا كل حاجة جوه عقولهم وعندهم يجى مليون كشكول فى دماغهم

كشكول كل واحد فينا كبير قووووووووووى تقريبا من يوم ما أتولد ومفيش ولا سطر فيه مش مكتوب فيه حلم ولا أمنية

عندنا كشكول مكتوب فيه أنه من يوم ما أتولدنا وأحنا مش حاسين بالأمان و بنحلم نعيش بحرية ونقول رأينا بصراحة ونكتب اللى عايزينه من غير أى قيود ونفسنا حقنا ما يضيعش ومحدش يظلمنا ولا ياكل حقنا ويوم ما نحب ناخد حقنا نعرف ناخده

عندنا كشكول مكتوب فيه أنه من يوم ما أتولدنا ونفسنا نشرب ميه نضيفة وناكل أكل نضيف ونتنفس هوا نضيف

عندنا كشكول مكتوب فيه أنه من يوم ما بدأنا نتعلم وأحنا تقريبا ما بنتعلمش ومش فاكرين أحنا درسنا إيه وكنا بنحلم ندخل كلية معينة ولكن ما دخلنهاش ومن يوم ما أتخرجنا وأحنا بنحلم نشتغل فى حاجة بنحبها ونلاقى الشغل ده وأنه لما نحب نعمل مشروع نعرف نعمله ونحقق طموحنا أيا كان هيا الآحلام والطموح بقت عيب ولا حرام

عندنا كشكول مكتوب فيه أنه لينا أخوات وقرايب مالقوش لقمة عيش فى بلدهم وسافروا ومتغربين عشان يلاقوا ياكلوا والغربة ثمنها كبير قوى وبيدفعوه كل ثانية وكل دقيقة

عندنا كشكول مكتوب فيه أننا بنحلم بعيشة كريمة مستورة مش عايزين نبقى أغنيا ولا عندنا ملايين

عندنا كشكول مكتوب فيه أننا بنحلم ببيت صغير مع نصنا التانى ويكون أحلى بيت واللى بيجمعنا فيه الحب والود والأحترام والأخلاص والوفاء

عندنا كشكول مكتوب فيه أنه نفسنا الناس تحس ببعضها أكتر وتحب بعضها أكتر

كشكولنا لسة كبير قوووووووووى وفيه حاجات كتيرة ولكن دى تعتبر الحاجات الخاصة قوى واللى يمكن معظمنا بيتمناها

هل المفروض نتعاقب عشان عندنا كشكول زى ده ؟؟

مكنسة اليوم

بما أن لكل شىء فى حياتنا معنى وفايدة كان لازم طبعا كل شوية نحس بقيمة اللى فى إيدينا واللى للأسف ما بنحسش بيها الا لما بتضيع أو تختفى فجأة

وعلى غير العادة لاقتنى أمبارح قفلت النت ورميت اللاب توب من بدرى وقعدت قدام التليفزيون أقلب فيه لحد أدان الفجر وبعدها حاولت أنام وللصبح تقريبا وعيونى مخاصمها النوم وعلى الضهر قمت صحيت مع أنى تقريبا ما نمتش وجبت كوباية الشاى التمام وقلت أستفتح بقى وأشوف النهاردة فيه إيه فتحت اللاب وأنا بشرب الشاى وعلى وشى أبتسامة طويلة عريضة وأذ فجأة مفيش نت أبص على الراوتر وأقلب فيه يمين شمال النت مفصول أفصل الراوتر وأرجع أشغله ومفيش فايدة قلت جايز عطل صغير وهيرجع تانى مفيش مشكلة نوصل اليو أس بى مع أنى ما دفعتش فلوس الشهر ده وأكيد مش هلاقى فيه نت بس قلت أجرب ورجعت نفس أبتسامة الأمل والتفاؤل على وشى من تانى أذ فجأة للمرة التانية اليو أس بى مش شغال وعمال يبحث عن الشبكة والشبكة كانت تايهة مسكت موبايلى أبص فيه قلت أكيد فيه حاجة غلط أو أنى لسة نايمة وبحلم لاقيت الموبايل مافيهوش شبكة وفاقد للنطق هو كمان

شلت اليو أس بى وأنا بجر أذيال الخيبة ورجعت أوصل الراوتر من تانى وبرضة لا حياة لمن تنادى

يعنى لا نت ولا موبايل قلت ما بدهاش بقى وجريت على التليفزيون وأنا متوجسة خيفة وخايفة أفتح الاقيهم بيقولوا سمكة قرش كلت كابلات النت من تانى وبلعت شبكات الموبايلات كلها على أعتبار أن الشبكة بالنسبة للسمك شىء ضار وخطر على صحتهم وقلت مش معقول يكون النت والموبايل وكل حاجة فاصلة عندنا أحنا بس

أذ فجأة للمرة معرفش الكام ما الاقيش أى كلام ولا فيه أى أسماك قرش وكل الأخبار زى بعضها ولا القنوات المحلية ولا الفضائية بيقولوا حاجة يبقى لازمن ولابد المشكلة عندنا

طيب موبايلى ووقع منى حوالى مليون أتنين مليون مرة وممكن يكون فاقد الشبكة والحياة من زمان

النت مااااااااااااااله وفضلت أجرى من الراوتر للتليفزيون للموبايل ومفيش فايدة

شوية وماما جت من الشغل وأول ما فتحت لها الباب ودخلت لاقتنى قدام التليفزيون قالتلى هو النت فاصل صح قلت لها أيوة هو فيه إيه قالتلى من الضهر والنت فصل وشبكات الموبايل كلها مش شغالة والشغل كله واقف فى كل المصالح وحتى التليفون الأرضى المباشر مش شغال

قلت فى نفسى لا كده الموضوع كبير وجريت مسكت تليفون البيت فيه حرارة أهو أجرب أتصل بحد فى محافظة تانية وفعلا لا حياة لمن تنادى

وبكده بقينا منعزلين عن العالم لا نت ولا موبايل ولا تليفون أرضى وطبعا كل المصالح الحكومية عندنا فضلوا يتفرجوا على بعضهم لأن كل حاجة شغالة بالنت

وفضل عقلى يودى ويجيب هو فيه إيه وكل حاجة فصلت فجأة وبقينا فى صحرا وعمالة أقول فى تخمينات لبابا وماما وشطح خيالى لبعيد وقلت لهم مش أحتمال يكونوا فصلوا كل وسائل الأتصال عن مصر كلها عشان الناس اللى عايزة تعمل ثورة كمان يومين ما يعرفوش يوصلوا لبعض وبكده ما يحصلش ثورة ومش هنقول سعد سعد يحيا سعد بس حتى لو فصل عن مصر كلها أكيد كان هايجى خبر فى التليفزيون

وقعدت أفكر مع نفسى طيب دلوقتى لو فيه أتنين مواعدين بعض أنهم هيتقابلوا على محطة القطر ويسافروا سوا مثلا ومتفقين على رنة أول ما الرنة توصل ينزلوا دلوقتى مفيش رنات ويااااااااه منى مش هتعرف تقابل أحمد وأحمد هيسافر لوحده وبعد ما الشبكة ترجع منى تتصل بأحمد

- أنت فين يا أحمد

- أنا خلاص سافرت يا منى

- بقى كده يا أحمد تسيبنى مش متفقين على رنة ولا أستخسرتها فيا إيه البخل ده ده الرن ببلاش

- لا أبدا يا حبيبتى بس الشبكة واقعة من زمان ومش عارف أوصلك وهو فى عقل باله بيقول قشطة خلعت منها دى كانت لازقة

- خلاص يا أحمد أنا مش هقف فى طريقك ولو عايزنى أنت عارف طريقى وفى عقل بالها يالا فى ستين داهية هو كان لاقى ياكل ده أنا أستاهل سيد سيده

وبعدين فوقت من الخيال العلمى ده وأنا عمالة أتنطط ما بين التليفزيون واللاب والموبايل ومفيش فايدة طيب دلوقتى لو الوضع فضل مستمر كام يوم الناس هتقبض مرتبها أزاى

ولو حد له مصلحة مهمة وعايزها تخلص هيعمل إيه

طيب أخواتى اللى بره مصر دلوقتى لما يجوا يتصلوا ويلاقوا كل حاجة مش شغالة هيعملوا إيه ولاقتنى فوقت من الخزعبلات دى وقلت لنفسى يالا أهو فرصة الواحد يرتاح شوية من رن التليفون والموبايل ومن القعاد على النت والرخامة على خلق الله بس فعلا الرخامة هتوحشنى كده كتير بقى

وفكرت أعمل إيه والتليفزيون كله شبه بعضه وممل ومفيش حاجة أعملها وبابا دخل نام وماما بتطبخ قلت بس ما بدهاش وجريت جبت المكنسة وعلى وشى أبتسامة طويلة عريضة وكأنى هجيب الديب من ديله ويادوب أتنططت بيها شوية فى أوضة الصالون وأنا مازلت بفكر فى لغز أننا بقينا فى صحراء مرة واحدة وبعد ما خلصت الصالون ولسة هكمل باقى الشقة ببص على موبايلى وآن آن آآآآآآآآآآآن الموبايل فيه شبكة هيييييييييييييييييييييييييييه جريت على الراوتر لاقيتة شغال وفل الفل شغلت اللاب ولاقيت الدنيا رجعت من تانى وقلت لنفسى أهو أحنا كدة ما بنحسش بقيمة اللى فى إيدينا الا لما يضيع

ودخلت أشوف الدنيا بقى وأشوف الموضوع ده عندنا أحنا بس ولا فيه ناس زينا وحسيت أن ماما بتقول فى سرها يارب كان فضل النت مقطوع شوية عشان تكمل جميلها وتخلص باقى الشقة وقبل ما تحدفنى بحاجة قلت لها هشوف أخبار الدنيا بقى وأرجع أكمل كنس

ومن هذا المنبر نستفيد بشوية حاجات

- أننا نحمد ربنا على أى نعمة عندنا ونحاول نستغلها صح وما نضيعش وقتنا بدون فايدة وبدون أستغلال كل دقيقة وثانية فيه

- أن حب أحمد ومنى فاضل له خمس دقايق ونص وينتهى ليه بقى لأنه ماكانش أبتدا أصلا وكانوا كلهم شوية رنات وقلب مرمى على الآثار ولما حبوا يحافظوا عليها مسحوا القلب بأساميهم وبكده الحب أنتهى

- أن الشاطرة ممكن تغزل برجل سلحفة وممكن جدا تبقى فاتحة اللاب والنت وماسكة المكنسة وبتكنس عادى وكل شوية بصة هنا وبصة هناك

- أنه لازمن ولابد نسمع كلام ماما وما نزعلهاش ونبطل بلطجة بقى

ويالا فوتكوا بعافية بقى عشان أكمل لعب مع المكنسة

وشوش

وشوش كتيرة أتغيرت وملامح كتيرة أتبدلت

ناس فرحتها أختفت وبتضحك من كتر همها

وشوش ضاعت وتاهت وجرحت وهانت

وشوش ظهرت كأنها ما ظهرتش

بقينا تايهين ما بين أه ولأ وحتى الأتنين ما بقوش مريحين

أحزان بتزيد وجراح بتوجع وآحلام بتموت

عايشين زى ما نكون مش عايشين

كل الملامح أتغيرت والوشوش أتبدلت

بقينا زى الأشباح ظاهرين ومش ظاهرين

عايشين لكننا مش عايشين

صاحيين لكنا لسة نايمين

عمالين نجرح ونأذى فى بعضنا

وياريتنا يوم فكرنا فى جرح الغير وأزاى وجعه ممكن يقتله

هموم بتزيد ودنيتنا عمالة تضيق

طيب أخرتها إيه يا دنيا وفى ناسك اللى مابقوش عايشين

مابقاش فاضل لنا غير شوية آحلام وأمال على أوهام

ولكن مش عارفين مين اللى هيكسب آحلامنا ولا أوهامنا

ولكن مابقاش فى إيدينا غير الأمل والصبر وكلمة يارب ودعوة فى عز الضيقة

وأكيد فيه أمل وحتى لو بعيد أدينا مستنين

يـــــــــــــــــــارب

حصاد 2010 الجزء الثانى

الجزء الأول هنا

أكثر شىء يؤلم أى أنسان أن يضحك وبداخله أحزان كثيرة ولا يشعر بها أى شخص

الموت الحقيقي يبدأ عندما تموت كل آحلامك ولا تستطيع تحقيق أي حلم منها وتظل تتراكم حلم وراء الآخر حتي تشعر كأنك شبح يعيش بدون حلم ولا أمل في تحقيق أي حلم بعدما تداس كلها تحت أقدام الآخرين

الحياة محطات وكثير منها يجرحنا ويؤذى مشاعرنا

شعور مرير عندما تحمل هموم كل من حولك ولا تجد من يحمل معك همومك وقتها يجب عليك حملها بمفردك لأنك الوحيد القادر على فهم نفسك

لماذا نستسهل جرح بعضنا البعض وبعدها نبكى على اللبن المسكوب ؟

أحيانا يكون الوقت عائقا أمام بعض آحلامنا ووقتها نتمنى أن نوقف الزمن وأن نعود قليلا للوراء ولكن الذى يذهب لا يعود أبداااااااااااااااااااااااااااااا

عشقى لكل ما هو قديم يشعرنى كأنى أعيش فى زمن آخر لا أعرفه وروحى تعيش وحدها فى الماضى

الفرحة كالهواء نتقاسمها مع الجميع ويتسابق الكل لأخذ نصيبه منها ولكن الحزن لا يتسابق أحد لأقتسامه معك لذلك أحفظه بداخلك ولا داعى لظهوره أمام الآخرين

شعور مؤلم عندما تداس مشاعرك وأحاسيسك تحت أقدام الآخرين ولا يشعروا بما فعلوا ولكنهم نسيوا أن قسوة قلوبهم سوف ترد لهم حينما يأذن الله فلا تكن غليظ القلب ولا تبالي بما تفعل لأنه سوف يرد لك يوما ما

ربما يكون هذا هو الوقت المناسب لأصلاح الكثير من الأخطاء وتحرير الكثير من الآحلام وفك القيود والضغوط والبعد عن الحماقات والكثيرين الذين يسببوا الأحباط والمشاكل

نظرت الى المجتمع نظرة أشمئزاز وأخرجت له لسانى متمنية من الله أن يشفيه من أمراضه وعقدة

من المؤسف أن تجعل قلب من يحبك أرضا تدوس عليها بقدميك ولا تبالى بما فعلت

عندما تحتاج لأشخاص بعينها ولا تجدهم فمن الأفضل أن تصمت وتحترف الصمت وتجعله منهجا فى حياتك بدلا من شعور الأحتياج الذى يعذبك

شعور بالوحدة يتخلله صمت وبرود وجمود وأحتياج وبركان ثائر بداخلى يود أن يخرج ويصيح بأعلى صوت ويصرح بأنه بشر ويود أن يعيش مثل باقى البشر

أحيانا يشعر الأنسان بأشياء لا يستطيع ترجمتها لكلمات وتبقى وقتها لغة الصمت مع لغة العيون المعبر الحقيقى عن كل شىء وأى شىء

أحتاج للنوم كثيرا حتى أراك فى آحلامى فكما أراك فى آحلامى أراك فى واقعى بعد أستيقاظى

عندما نامت جفونى حلمت بك وتمنيت أن أقضى عمرى كله نائمة كى لا تغيب عن عينى ولكن تبا لذلك الأرق الذى يأخذنى منك دائما

حتما سيأتى يوما ما لتعرفنى جيدا وتعرف ما يفرحنى ويبكينى وحتى ذلك اليوم لا تنسى أى لحظة سعادة سببتها لك

ويأتى أجمل فصول العام لى وأحبهم لقلبى ويبدأ معه حنينى لكل شىء أحبه ولكل الأشخاص التى تفصل بينى وبينهم المسافات وأود أن أخرج لأسير على كورنيش النيل وهو خالى تماما من المارة ولا يوجد غيرى أنا والماء والهواء والبرد

عندما تسقط حبات المطر على الطرقات وتنظف كل شىء يقابلها أشعر بأنها تغسل همومى وتمحوها واحدة تلو الآخرى

عندما يصبح الهواء الذى تتنفسه هو وجود من تحب بجوارك فلا تمنعه من أستنشاق بعض الحب يوميا حتى يستطيع العيش بك ولك

عندما يصبح الحب الهواء الذى تتنفسه والماء الذى تشربه فاعلم أنك وصلت لمنتهى العشق

كلما أزادات برودة الطقس وتكاثرت الأمطار وتناثرت قطراتها على شرفات غرفتى أتذكر كلماتك التى تدفئ قلبى وعقلى وأنظر لهؤلاء الذين يجرون هنا وهناك هربا من البرد والمطر وأبتسم لهم غير مبالية بما يحدث ولا بنظراتهم لتلك التى تسير فرحة سعيدة بحبات المطر وبك

وعدتك أنى سأظل على عهدى معك طوال حياتى فكيف أخلف وعدى وأنت كل حياتى

يصبح يومها سعيدا جميلا مختلفا عندما يبدأ بسماع صوتة فلا تحرمها من سماعه كل يوم

شعرت الآن وبقوة أن قلبها أخذ وعد من الجراح طيلة حياتة بأن لا تتركها فما أن تهدأ قليلا لتستيقظ مرة آخرى لتجد الجراح تنظر لها وهيا تخرج لها لسانها لتذكرها أنها مازالت حية وتحت الطلب

افعل كل ما شئت بها واجرحها كما تشاء وتخلص من كل هواجسك ومخاوفك فقلبها من كثرة الجراح لم يعد ينبض ولكنه منتظر أن تنتهى من كل ما يؤلمك وتؤلمها حتى ترتاح وأعتبرها جبل أو جماد لا يشعر ولا يبالى حتى ترتاح أنت

لو كانت تعلم أن هذا الطريق يحمل لها فى كل خطوة جراح ما كانت سلكته من البداية ولكن عليها تكملته بمفردها حاملة جراحها على كفيها متظاهرة بالقوة ويعلو وجهها أبتسامة بلهاء بعد كسر فرحتها وقتلها قبل خروجها للدنيا

تذكرنى حبات المطر بك ويأخذنى حنينى اليك ويدفعنى جنونى للسير تحت المطر حتى أجدك أمامى مبتسما لتكمل معى مشوارى فى الحياة كما وعدتنى

حصاد 2010

سنة كاملة عدت بحلوها ومرها ولاقتنى بجرى على الأستاتيوس بتاعتى على الفيس بوك بتاعت 2010 كلها وجمعتها كلها وهكتبها هنا ولأنها كتيرة هقسمها على كذا مرة

من قلب ضعفنا تأتى قوتنا ولكن كلما كنا مترابطين لزادت قوتنا أكثر وجعلتنا نكسر كل الحواجز ونصل لما نريد فكن قوى دائما وامنحنى قوة فوق قوتى بوجودك بجوارى دائما وأبدا

عندما تتذوق المر كثيرا فى بدايات تناولك للعسل لا تغضب ولا تستعجل العسل الصافى فلكل شىء آوان ولكى تشعر بطعم العسل يجب أن تعرف طعم المر

لا يجب أن تلوم الآخرين على قسوتهم لأنها ربما تكون بسبب قسوتك عليهم وجرحك لهم

عندما تفتقد الأمان يتساوى عندك وقتها كل شىء وتفقد أجمل المشاعر الأنسانية الموجودة بداخلك

من الممكن أن تجرح شخص بكلمة أو موقف ما ولكن الجرح الأكبر فى تجاهلك لمن جرحته بقصد أو بدون وتركه بدون كلمة أعتذار أو عتاب أو لوم واحدة

الحب أجمل المشاعر الأنسانية والكره أبشع المشاعر الأنسانية ولكن بينهم خيط طويل أذا أردت السير نحو الحب فأفعل ذلك وأذا أردت العكس فلا تلوم الا نفسك

القسوة والجفاء لا يجنيان الا كل شقاء

الحياة تجارب وأختيارات وكثيرة هي الأختيارات الصعبة ولكننا دائما نحب الصعب فإذا كنت أختياري الصعب فأسأل الله معي أن يهون علينا كل صعاب الدنيا

لكل شئ بداية ونهاية الا الحب له بداية وليس له نهاية ولكن تبدأ نهايتة عند الكذب والخيانة والأهانة والجرح وأهمال أى طرف للآخر

قسوة الآخرين تجعلنا أحيانا نقسو على أنفسنا وعلى غيرنا وتبدلنا من حال لحال وأسوأ حال هو قسوتنا على أنفسنا وعلى أحبابنا

أعظم قوة هى التى تولد من قلب المحن وتجعلنا نتخطاها بسلام ولكن أذا أصابنا اليأس وتملك منا فسوف تقتلنا المحن فكن دائما قوى وتسلح بالصبر فهو سلاحنا لتخطى كل شىء

قف وأنظر حولك وراجع سجلات حياتك وتذكر كم شخص اسأت اليه ( جرحت ، أهنت ، أغتبت ، قسوت الخ ) بقصد أو بدون وحاول أن تصلح أخطائك قبل فوات الآوان فكما تدين تدان

كثيرا لا نشعر بقيمة الأشياء التى نمتلكها الا عند أقتراب فقدانها !!! حقا عجبا لنا

أبحث عن وطن آخر به الناس تمتلك قلوب بشر لا حجر يحترمون بعضهم ويقدرون مشاعر الآخرين ويحافظون على كرامتهم ولا يقللوا منهم ويجرحوهم مهما حدث ولكن بعد بحث طويل لم أجد هذا العالم الا فى خيالى فقط

من الغباء أن تجعل قلبك وطن وسكن لمن لا يستحقة

أعظم قوة هى أن تبتسم وبداخلك آلام وهموم كثيرة ولا يشعر بها أحد غيرك

مع كل طلعة شمس جديدة بيتولد جوايا أمل جديد ومع فجر كل يوم بيكبر حلمى وينور قدامى ومع كل سجدة بقول يارب حققلى منايا

الذكريات المؤلمة غالبا ما تظل عالقة فى ذاكرتنا إن لم تحل مكانها ذكريات أفضل

أصعب شىء عندما تزداد قوتك بوجود أحد الأشخاص بجوارك وفجأة يتركك فى منتصف الطريق ويرحل

أصعب أحساس فى هذه الدنيا عندما تأتيك الضربة من أقرب الناس اليك وينسون كل شىء وأى شىء كان بينكم كأن العشرة والسنين والذكريات والآحلام كانت سراب ووهم كبير

عايزة أشتغل بواب

أيوة عايزة أشتغل بواب فيه حد عنده مااااااااااانع ؟؟

ما هو خلاص الكلية اللى طلع فيها عنينا ما بقاش ليها لازمة والشغلانة المتوفرة ليها حاليا أنك تبقى فرد أمن وده طبعا بالنسبة للولاد وماجابوش سيرتنا فى حاجة خالص طيب خلاص أنا بقى هطالب بالمساواة وأطالب بحقى فى أنى عايزة أبقى زيهم وأشتغل بواب على الأقل وواحدة واحدة أترقى وأبقى فرد أمن على أى مول

ما هو بعد أربع سنين درسناها فى الكلية أكتشفنا خير اللهم أجعله خير أننا مالناش لازمة أيوووووووون خريجين كليات الآداب والحقوق يروحوا يرموا نفسهم فى البحر بقى وده بناء على كلام وزيرة القوى العاملة بتقول لكم يا ولاد مالكوش مكان فى الوظائف الحكومية وروحوا أحسن لكم أشتغلوا أفرد أمن فاهمين الكلام ولا لا

ومش بعيد قريب يقفلوا الكليات دى ولا عزاء لينا ولا لأى حد يتشدد لنا كمان

طيب ممكن سؤال حضرتك معلش طيب هما المدرسين والمحامين المفروض يكونوا متخرجين من كليات إيه ؟

طيب يعنى هتعملوا ليهم كليات تانية ولا هتفتحوا قسم مدرسين مثلا فى كلية الطب وقسم محامين فى كلية الهندسة عشان تبقى كليات عملية أهى وفل الفل

وبالمرة يتخرج الواحد من كلية الطب يبقى دكتور ومدرس ومن كلية الهندسة يبقى مهندس ومحامى ولا أى أى ولا زى زى وبكرة نلاقى يافطة دكتور مكتوب عليها دكتور باطنة وقلب ومدرس مادة الحب لجميع المراحل الدراسية ولا سحر ولا شعوذة

ولا تكونوا ناويين تقفلوا المدارس كمان ما هى مالهاش لازمة وبالمرة مش عايزين محامين هيعملوا إيه يعنى ما هى خربانة خربانة

وكفاية علينا الولاد يشتغلوا أفراد أمن وعمال فى المصانع والبنات يبيعوا فل فى الأشارات ويمسحوا العربيات ويشتغلوا خدامات وفى الآخر لو حبوا يتجوزوا يشوفوا ليهم عشة فى أى خرابة وأهى هتبقى عيشة فل الفل أهى ولا محتاجة مهر ولا عفش ولا شبكة ولا أى حاجة وأهو هنبقى ساهمنا فى القضاء على ظاهرة العنوسة بالمرة وأهو كله موصل لكله

وطبعا بما أن العيشة هتبقى على القد هنقدر نحقق طلب السيدة مشيرة خطاب فى أن محدش يخلف أكتر من طفلين ولو حد خلف الثالث هو الجانى على نفسه بقى ومش هيبقى له أى دعم لأن الدعم هيبقى لأول طفلين

وبكدة واحدة واحدة هنخلص على الشعب كله ما هو الشباب والبنات من الشغل والنوم فى الشوارع هيموتوا من الجوع وكده كده لو أتجوزوا مش هيخلفوا ولو خلفوا عيالهم هيتشردوا وهيبقوا أطفال شوارع فالأحسن ما يخلفوش وشوية والأب والأم هيموتوا ومش هيبقى فيه أطفال وهنصفى الشعب واحدة واحدة وبراوقة كده

ويبقى ربنا كرمه اللى عرف يطفش من البلد ويشوف له بلد تانية يعيش فيها

مع أنى عايزة أعرف هو فين الدعم ده هو فيه حد لاقى ياكل

أخرجوا الشوارع وشوفوا عدد الناس اللى قاعدة تشحت بقى كام ولا شوفوا الناس اللى بتنام كل يوم من غير عشا ولا حتى غدا

وهتبقى آخرتها هنشتغل بوابين وخدامين ولا عزاء لأى حاجة بقى

وعشان كده أنا بطالب بدكة كويسة لزوم شغل البوابين وكمان شوية فل أسرح بيهم على الأشارات وفوطة نضيفة أمسح بيها العربيات

وهيبقى شعارنا الجديد بلا تعليم بلا كلام فارغ ومعاك كلية يبقى أنت الجانى على نفسك يا عنيا