( ما إحنا لو ما سمعناش اللي حوالينا هايجى علينا يوم ومش هنلاقى حد يسمعناخليك مستمع أكتر ما تكون متكلم هتكسب كتير قوووووووووووى )
فعلا ما هو مش من المنطقي أننا نطلب من الناس أنها تسمعنا وتبقى معانا في كل أحوالنا وظروف حياتنا وإحنا عمرنا ما كلفنا نفسنا وسمعناهم أو سمعنا أي حد
ابدأ بنفسك الأول وأسمع الناس
صدقني كل ما هتحس أنك ريحت حد لمجرد أنك سمعته هتحس أنك مرتاح من جواك حتى لو ما أتكلمتش وطلعت اللي جواك بس أكيد هايجى يوم وهتلاقى اللى يسمعك واللي بيطلب منك تتكلم وتطلع اللى جواك وممكن يكون حد مش متوقع أصلا
وهنروح لبعيد ليه قدامك الورقة والقلم طلع اللى جواك عليهم قدامك السما بص لها وأتكلم
قدامك البحر أقف قدامه وأتكلم
بس في النهاية خليك مستمع جيد وريح اللى حواليك هتكسب كتير قوووووووووى
قرب قرب قررررررررررررررب عروسة يا بيه عروسة يا هانم
عروسة صينى بأقل التكاليف ب 1500 جنية بس هتحصل على زوجة صغيرة الحجم لا تتكلم هتعمل فيها خرسة يعنى وحتى لما تتكلم سيبها تكلم نفسها بقى ما أنت مش فاهم حاجة
وصغيرة الحجم ممكن تشيلها فى جيبك جمب المحفظة ومش عايزة فرح ولا شبكة ما هو كفاية أنها لاقت حد يتجوزها وهتضمن أن عيالها يبقى ليهم شكل مختلف بدل النسخ المكررة عندهم
تقدس الحياة الزوجية وماهرة فى فنون الطبخ خاصة الضفادع والصراصير الطازجة وكل يوم هتعملك أكله مختلفة يوم صينية صراصير بالبشاميل ويوم صراصير محمرة ويوم ضفادع مقلية وهكذا وعيش بقى
قرب قرب قرب البضاعة مش مضمونة ولا ترد ولا تستبدل وعلى المتضرر اللجوء لمصلحة البضائع الصينية وقابلنى لو حد عبرك
قرب وجرب وممكن تاخد فكرة وتشترى بكرة
فبعد غزو الصين لنا بكل شىء بداية من الأبرة الى الصاروخ ودراستها لسوقنا وطريقة تفكير الغالبية العظمى بدأت فى الترويج لبضائع أكثر وأهم حتى تحظى على نسبة مبيعات عالية
فمنذ عدة شهور فاجئتنا العزيزة الصين بمنتجها الأكثر وقاحة الا وهو غشاء البكارة الصينى وبعد ما وجدت خيبه أمل فى ترويج بضاعتها أو ربما تكون كسبت منها الملايين الله أعلم فكرت فى غزونا بمنتج جديد سوف يلاقى رواجا هائلا الا وهو العروسة الصينى وبغض النظر عن العروسة سواء كانت صينى أو تايوانى أو حتى هولندى فكل أنسان حر فى أختياراتة وما يتبعها من مشاكل اليس داخل روؤسهم عقول يفكرون بها
ولكن أكثر ما أستوقفنى هو كمية الأتهامات الملقاه على عاتق الفتيات المصريات وأنهم أستغفر الله العظيم سبب كل مشاكل تأخر سن الزواج بالنسبة للطرفين وتعددت الأسباب منها المغالاه المبالغ فيها مع أنى أرى بعينى هذه الأيام ومنذ زمن الكثيرات يقللن جدا فى طلباتهن ويحدث شىء من أثنين يا أما يستخف بها الطرف الآخر ويراها تبيع نفسها ومش لاقية حد يبص لها ويا أما لا ينظر لها من الأساس ولا يفكر فى الأرتباط بها
وأسباب أخرى منها أن الفتيات متعجرفات وتريد أن تكون الند بالند بالرجل وأنها لا تتحمل مسئولية بيت وغيرها من الأتهامات التى أراها ظالمة وكلامى هذا عن تجربة ورؤية لفتيات كثيرات وليس كلام خيالى أو من كوكب المريخ مثلا
ولكن نسبة الى أن مجتمعنا مازال يتمتع بفكر ذكورى بحت فمازال يلقى كل التهم على الفتيات فى كل شىء
لذلك لم أرهق نفسى فى الكلام أو الدفاع عن جزء من الفتيات يأخذ فى الرجلين ولكن لى كلمة أخيرة للشباب أذا كانت الفتيات المصريات بهن كل العبر فالبهنا والشفا عليكم العرايس الصينى
ليس مستبعدا أبدا أن تتغير كلمات الأغانى مثلما تتعدد طرق الزواج وكل يوم نخترع طريقة زواج جديدة وأخرها الزواج النهارى لتصبح الأغنية
زغروطة نهارية رنت فى بيتنا وحاسبوا من عين الناس عليا
وطبعا مع أختلاف طرق الزواج من الممكن أن يتحول لزواج العصارى أو المغربية وكله حسب الطلب
ولا بأس عزيزى الشاب وعزيزتى الشابة فالسوق الآن أصبح به كل ما ترغبون فيه
تريدون زواج موضة جديدة لأن الزواج العرفى وزواج الدم وغيره وغيره أصبح دقة قديمة فوصل اليكم الآن الزواج النهارى
وهو بأختصار تسهيل لعمليات الدعارة والضحك على ذقون البنات والشباب ممن كبر سنهم وظروفهم منيلة بستين نيلة ويودون أخذ ما حلله الله بطريقة قذرة وطريقة راااااااااائعة للرجال معدومى الذمة والضمير ويريدون فعل ما يريدونه نهارا أوقات عملهم بدون علم الزوجة وهو بهذا لا يرى أى خطأ ويضحك على عقل أى فتاة تحت مسمى الزاوج
يذهب لها نهارا كأنه يسرق فى أوقات عمله وبعد ذلك يذهب لمنزله ولزوجتة وأولاده كأن شىء لم يكن
وأتوقع خلال أيام أننا سوف نرى من يحللون هذا الزواج على القنوات الكثيرة المتخلفة والذين يرتدون كل ما هو غالى وأستايل ويلبسون ثوب التدين وقبل أن تطلون علينا بفتوى أن هذا الزواج صحيح وحلال
أين الأشهار يا سادة أليس من شروط الزواج الأشهار
أين حقوق هذه الفتاة وهل هذا يعد زواج أم طريقة جديدة لتحليل الدعارة ولتسهيل كل شىء على الأزاوج أصحاب النفوس الدنيئة والعين الزائغة
وقبل أن يطل علينا آخرين بدعوى أنه سوف يحل مشكلة العنوسة بالنسبة للطرفين وأهو ممكن كل طرف يفضل فى بيته ويتجوزوا بالنهار وبعد الضهر كل واحد يروح لحاله ياعالم أين عقولكم ولا أنتوا بتوفروا فى الكهرباء
فهذا الزواج ما هو الا تحليل لبعض الرجال ما يريدونه فى الخفاء من وراء زوجاتهم وبعد قليل سوف نجده أنتشر بين البنات والشباب إيمانا منهم أنه حلا لتأخر سن الزواج وأهو كله أسمه جواز
وليس مستبعدا أن نصل الى زواج التيك أواى أتنين يتقابلوا فى أى كافية يتعرفوا ياكلوا حاجة مع بعض يتجوزوا وعند أول كافية يدخلوا ويطلقوا وعيشى يا بلد
مع أنى ما بصدقش ولا بقتنع بأمور الأبراج دى ولا بأنى أمسك الجرنان أشوف حظى إيه النهاردة وأفضل مقتنعة ومصدقة باللى مكتوب
ولكن اللى لاحظتة من خلال أحتكاكى بالناس أنه فعلا مواليد أيام وشهور معينة بتبقى فيه بينهم صفات كتيرة مشتركة بغض النظر عن تسمية البرج وبغض النظر عن أن مش كل اللى بيتقال عن أى برج بيبقى فى الأنسان بشكل صحيح
ولكن بما أنى أعتبر من مواليد شهر أغسطس ( 31 أغسطس ) وخلوا بالكم أخر يوم فى الشهر يعنى قفلتة بالضبة والمفتاح علشان محدش يجى ورايا
وبما أن ليا عدد من الأصدقاء مواليد نفس الشهر ويعتبروا من نفس البرج ومن قبل حتى ما أعرف حكاية الأبراج دى ولا أعرف تاريخ ميلادهم بس كنت بلاقى صفات كتيرة قوووووووووى مشتركة بينا
والصفات مشتركة عامة بين الجنسين الرجل والمرأة
فحبيت ألعب لعبة صغيرة مع نفسى وأكتب الصفات اللى شيفاها من وجهه نظرى موجودة فى مواليد برج العذراء عاااااااااااامة ومحدش يفكر أنى بقول صفاتى أنا بتكلم عامة لأنى ما ينفعش أساسا أقيم نفسى لذلك وجب التنوية
التناقض فى صفات الشخصية أيون بيبقى جواهم صفات وعكسها وكلها بتبقى شغالة وأنا شيفاها ميزة مش عيب لأن الشخصية دى بتبقى أكتر شخصية ممكن تتكيف مع أى وضع لأنها بتبقى فاهمة كويس اللى حواليها وعارفة معنى كل صفة موجودة فى الناس اللى حواليها ودة لأن الشخصية دى تقريبا بيبقى فيها كل الصفات أو معظمها
الصراحةشخصية صريحة جدا جدا ولكن عيبها الوحيد فى موضوع الصراحة أنها ساعات بتقول اللى جواها بتحديف طوب وبكلمات ممكن تضايق اللى قدامها ولكن صراحة الشخصية دى دايما بتبقى محببة ومرغوبة من كل الناس اللى حواليها بغض النظر عن شوية التحديف اللى بيحصلوا ولكن الناس اللى بيبقوا عارفين الشخصيات دى مش بيزعلوا منها أبداااا
الجدعنة الغير طبيعيةشخصيات البرج ده بتبقى فيهم جدعنة مش طبيعية وبطريقة كبيرة جداااااااا جداااااااااااااااا حتى لو وقعتهم فى مشاكل كتيرة ولكنهم ما بيحرموش وبيفضلوا برضة جدعاااااااااان
الرومانسيةمشاعرهم رقيقة جدا جدا ورومانسيين لأبعد حد حتى لو ماكانوش بيظهروا المشاعر دى وكتير بيقسوا على نفسهم وعلى اللى بيحبوهم وبيداروا مشاعرهم ويكبتوها بشكل كبير قوى
ولكنهم فى نفس الوقت لما بيبحبوا بيحبوا قووووووووووى وممكن يضحوا بحياتهم علشان اللى بيحبوه ومش سهل أبدا يحبوا ومش سهل برضة ينجرحوا لأنهم بيتحملوا الطرف التانى ويفضلوا يفوتوا له كتير لكنهم أول لما ينجرحوا بيبقى الجرح كبير قوى قوى ومش سهل ينسوا جرحهم
الصداقة بيحبوا تكوين الصداقات والعلاقات الأنسانية بشكل كبير قوووووووووووى ودايما بيبقوا مميزين عند الناس اللى تعرفهم
الحياة العمليةناس عمليين جداااااااااا وبيحبوا شغلهم قوووووووووووى ودايما بينجحوا فيه
طموحين جدا جداااااااااااا وعندهم آحلام كبيرة وكتيرة قووووووووووى وبيسعوا دايما علشان يحققوها
ولكن فيه نقطة بيختلف فيها مواليد البرج ده يعنى جزء منهم مش بيخاف من الشهرة والأضواء وبيقدر يبقى قدام الناس عادى وطبيعى وجزء تانى بيخاف جدا وبيتكسف من مجرد الظهور قدام الناس وتبقى الأضواء مسلطة عليه مع أن الأتنين بيكونوا طموحين وطموحهم لازم يخليهم ناس معروفة فى المجتمع نوعا ما
ونكتفى بهذا القدر من تحليل شخصية برج العذراء من وجهه نظرى الشخصية ولنا لقاء آخر للكلام عن باقى الصفات
مع أقتراب عيد الحب ( الفالانتين داى ) نجد كل شىء تغير وتبدل وليس فقط فى اللون الذى يتحول للأحمر فى كل شىء فتسير فى الشوارع تجد كل شىء لونه أحمر الملابس والهدايا ومن الممكن أن تتعثر قدمك فتنظر لتجد دبدوب أو قلب أحمر بجوارك تظل تسير وتنظر حولك وكل شىء تحول لهذا اللون
تعود الى منزلك ويسيطر على عينيك اللون الأحمر تجلس على جهاز الكمبيوتر الخاص بك لتذهب الى العالم الأفتراضى وتصطدم كثيرا عندما تجده تحول هو الآخر الى هذا اللون وفى جولة سريعة على المدونات وموقع الفيس بوك تجد كما هائلا من الورود والهدايا والأمنيات والآحلام وغالبا ومعظم من يرسلوا هذه الهدايا ويكتبون الكلمات الجميلة يحتفلوا بهذا العيد بمفردهم ولكنهم يريدوا أن يشبعوا رغبتهم ويدخلوا بعض السرور الى قلبهم وقلوب من حولهم فيبدأو فى أرسال الهدايا الحمراء بالبطبع وكتابة المواضيع على المدونات والفيس بوك أحتفالا بالحب
ولكن أى حب هذا الذى يحتفلون به ؟؟
فأغلبهم لا يجد قوت يومه ويجرى طوال حياته يبحث عن لقمة العيش وأبسط أحتياجاته الأساسية فالبطبع أشخاص كهؤلاء ليس معهم ما يؤهلهم للأرتباط أو التفكير حتى فى هذه الكلمة وحتى لو وجدوا الحب سوف يكتموه بداخلهم لأنهم لا يملكون شىء يحولوا به هذه المشاعر الى أرتباط رسمى أمام كل العالم ويظل كل طرف منهم يكتم مشاعره وحبه بداخله ولا يبوح به لأنه غير مسموح لهم حتى بالحب فحتى الحب الأفتراضى ممنوعون منه وكم الهدايا والورود وخلافه ما هى الا تعويضا عما يعانية آلاف الشباب والبنات الذين يكبر سنهم يوما وراء يوم ولا يجدوا سبيل للتعبير عن مشاعرهم المكبوتة الا بأرسال التهانى والهدايا الافتراضية بالبطبع الى أصدقائهم وأقاربهم علهم يشعرون ببعض من التخفيف عن ما يعذبهم ويؤلمهم
ومن ناحية آخرى فالحب ليس بحاجة الى يوم واحد أو يومان فى السنة لأظهاره ولكن هى عادة تعود عليها الناس وياليتهم بالفعل يشعروا بالحب الحقيقى ويعيشونه ولكن الواقع أن أغلب الموجودين يا فاقدين للحب يا غير قادرين على البوح بما فى داخل قلوبهم نسبة الى ظروف كثيرة تحيط بهم
وبعد جولة سريعة على المدونات والفيس بوك ورؤية كم الهدايا والورود وأيضا معها كم هائل من القلوب المحطمة التى تتمنى يوما أن تجد الحب ونصفها الآخر فكرت فى أن أخترع يوما لأحتفل به أنا وأصدقائى وكل الناس سواء أعرفهم أو لا ممن مثلى (لا يعيشون قصة حب أو بداخلهم حب )ويكتمونه مثل ملايين البشر وظللت أفكر فى أسم هذا اليوم وماذا سوف يكون رد فعل المحيطين بى عند رؤية كلماتى هذه فأنا لا أجرب يوما ما شعور هذا الفالانتين وحتى يأتى اليوم الذى أعرف فيه ما هو هذا الشعور سوف أخطط لليوم الجديد وليكن أسمه مؤقتا اليوم العالمى للسناجل نسبة الى كلمة
single
أو عيد الحب السنجلاوى والى أن أستقر على مسمى معين لليوم وابدأ فى التخطيط له والترويج له عبر الوسائل المرئية واللامرئية والمسموعة والغير مسوعة
كل فالانتين وأنتوا بخير
وفالانتين إيه اللى أنتوا جايين تقولوا عليه أنتوا عارفين قلبى جواه إيه
مجرد رسالة منى لغرض ما فى نفسى ما قلت لغرض ما فى نفسى
الدنيا كلها بقت عاملة زى المولد هيصة وزيطة وناس مش عارفة بعضها وعمالة تخبط فى بعض ومش فاهمين أى حاجة فى أى حاجة وكله بيخطف من كله واللى بيقدر على حاجة بيعملها علشان يعيش ومش مهم الباقى يموت وواخدين مقولة أنا ومن بعدى الطوفان
وبالمناسبة دى سمعونى أغنية مولد يا دنيا مولد
زمااااااااااااااان كانوا بيقولوا أنا وأخويا على أبن عمى وأنا وأبن عمى على الغريب
دلوقتى بقى أنا والغريب على أبن عمى ومن قبله على أخويا
وهو ده شعار المرحلة الجديدة وهدية لكل واحد سنجة ومطوة علشان كل واحد يقطع أخوه براحته
كان زمان الناس الغريبة ما بتجيبش سيرة بعضها وشوية بقت الحاجات دى مقتصرة على أبناء العائلة الواحدة يعنى كل عيلة بيحافظوا قوى على سيرة بعضهم ولا يونكن بتاااااااااااااتاااااااااااا يجيبوا سيرة بعضهم
ولكن بالنسبة للتطور الطبيعى للعادات والتقاليد بقى الطبيعى أن كل عيلة تقطع فى فروة بعضها
كل شوية كده قاعدين ماسكين فروة
لا لا مش فروة خروف ده فروة فلان ولا فلانة اللى من نفس العيلة وشغالين كلااااااااااام ولوك لوك لوك سواء الكلام صح ولا غلط والأكتر بقى الكلام الغلط
وياريت كل واحد بقى يخلى باله من فروته أصل الفرو غلى قوى الأيام دى
وسمعنى أغنية كلام الناس لا بيقدم ولا يأخر
جواز عتريس من فؤادة باااااااااااااااااااااااااطل
ياترى عملتوا إيه لملايين الشباب اللى مش عارفين يتجوزوا يعنى فكرتوا فى مرة قبل ما تناموا كده فى ملايين البنات والولاد اللى لا لايقين ياكلوا ولا يشربوا وطبيعى مش عارفين يتجوزوا وأنتوا بتتجوزوا مرة وأتنين وثلاثة وطبعا براحتكم عيشووووووووووووووا أنا مش ضد الجوازة دى ولا هعمل زى عتريس وفؤادة وأقول الجوازة دى باطلة ولكن كفاية بقى سايبين الناس تتحرق أعملوا اللى يريحكم فى سركم بلاش تخنقوهم أكتر وسمعنى أغنية النهاردة فرحى يا جدعااااااااااان هتجوز هتجوز
يمكن بتخاف للحظات السعادة دى تنتهى بسرعة وللأسف هما بكده بيضيعوها بمزاجهم فى تفكيرهم فى الخوف وبيفوقوا بعد ما بتخلص اللحظات دى وبعدها لو حصل أى حاجة لا قدرالله يقولوا للى حواليهم شوفوا مش قلت لكم أنا كان قلبى حاسس وخايف وأحساسى طلع صح
أحساس إيه بقى اللى طلع صح
هو مش المفروض أننا بشر وعايشين فى دنيا فيها الحلو والوحش والسعادة والحزن يعنى أكيد هنمر بلحظات سعادة ولحظات حزن وحاجات كويسة وحاجات وحشة
يبقى مش غريب لو مثلا حصلت حاجة وفرحتنا قوى وبعدها بيوم ولا يومين حصل أى حاجة وحشة لأننا عايشين فى دنيا مش فى جنه
ولكن للأسف أحنا اللى بنضيع لحظات السعادة والفرح وبنقتلها بسبب خوفنا من اللى جاى ويا سلام بقى بنعيش لحظات الحزن بدقة وأخلاص قوى وكل واحد كده يبص جوه نفسه لما بتحصل حاجة تزعله هتلاقيه بيعيش الجو الحزين قوى ويتمادى فى حزنه ولكن لما تحصل حاجة تفرحه يادوب شوية كده يفرح وبعدين يفضل خايف من اللى جاى
تقريبا ماعندناش ثقافة الأستمتاع بالسعادة
أحنا لية بنتسعجل الحاجات الوحشة
عايزة الناس تقولى هل فعلا بتخافوا من لحظات السعادة والفرح ولا بتحاولوا تعيشوها صح ؟
يمكن اللى هقوله كلام أتقال كتير قبل كده وهيبقى كلام متعاد ولكن كل مرة بحاول أكتب فيها موضوع خاص بالبنات بحاول أكتبه بصيغة الجمع يعنى بتكلم عن كل البنات مش عنى أنا ولكن المرة دى حسيت أنى عايزة أتكلم عنى ويمكن لما هقول اللى جوايا واللى حاسة بيه الموضوع هيوصل أكتر فى مجتمعنا دايما بتلاقى البنت فى كل مرحلة من عمرها ليها مسمى ولكن فيه مسمى بيبقى جارح قوى وبيسيب علامة مش كويسة جوه أى بنت وهو عاااااااااااااااااااااااااانس يمكن أنا عن نفسى مش مقتنعة بالموضوع ده ومش فارقة معايا أى سن ولا شايفة أن الجواز والأرتباط لازم يكونوا فى سن معين وبعد كده نبدأ نتهم البنت ونرمى عليها كلام وشوية ونقول خلاص القطر فاتها بقى ومحدش يفكر يقرب لها ولأن ديننا كمان محددش سن للجواز وقال أن بعد كده خلاص ما ينفعش ولكن مجتمعنا هو اللى عمل كده ولأن الحكاية مش حكاية جواز وخلاص ما هو فيه ملايين الناس متجوزة ولكن هل هما عايشين صح ؟ هل هما مبسوطين ؟ هل هما حاسين بأى حاجة حلوة فى الدنيا ؟ ولا كل يوم يلعنوا فى الجواز وسنينه مش قادرة أقول لكم كم الأذى اللى بحس بيه لما بحس أن حد بيعتبرنى خلاص القطر فاتنى وعليا أنى أقبل بقى بأى حد وخلاص والا ما ألومش الا نفسى ويمكن أنا فى المكان اللى عايشة فيه الموضوع مش كبير قوى أو مش كل الناس شايفين كده ولكن لأنى من بلد ريفى فالموضوع بقى واخد شكل تانى ويمكن مش بالنسبة لكل الناس ولكن الأغلب عندهم أن البنت لما توصل ل 20 سنه من غير أرتباط تبقى دخلت فى سن الخطر وأول ما تخلص جامعة عند سن 21 تقريبا ومفيش حاجة بقى يبدأ الكلام والهمس ويا سلااااااااااااااااااام بقى لما توصل لسن 25 ولسة مفيش خطوبة ولا جواز كده تبقى كارثة بكل المقاييس ولأنى خلاص عديت ال 25 سنه فالموضوع بقى واخد خط مش لطيف أبدا مع ناس كتيرة ويمكن بتحط فى مواقف تخلى الحجر ينطق وخاصة فى الأفراح اللى أنا بصمم أحضرها زى أى بنى أدم طبيعى ولأن مفيش فيا حاجة تخلينى أهرب من الناس ولكن للأسف الناس هيا اللى مريضة بمرض أسمه الجواز والعنوسة وخلافه ويمكن قبل كده كانت كلمة عقبالك بتتقال ليا عادى مع أبتسامة أو ضحكة أو هزار من أى حد ولكن دلوقتى الوضع أختلف تماما بقيت بسمع كلمة عقبالك بنظرة كلها حزن ويأس وحسرة عليا وعلى عمرى بالأضافة الى كم الدعوات اللى بسمعها بودنى وببقى نفسى فى اللحظة دى أفقد سمعى علشان ما يحصلش ليا حاجة من الكلام ده عارفين كده لما واحد يبقى بيشحت ومصمم أنك تديلة حاجة ويفضل يدعيلك بطريقة مستفزة جداااااااااااااااااا هو ده بالظبط اللى بقى بيحصل دعوات بأن ربنا يكرمنى وياريت الكلمة تتقال مرة واحدة لا دى بتتقال مليون مرة مع طبطبة على الكتف وشوية وهياخدونى فى حضنهم ويعيطوا ويكون نفسهم أعيط معاهم علشان الدعوة تجيب أثر وطبعا أنا فى المواقف دى بتجيلى حالة هستيرية من الضحك وبتبدأ بأبتسامة بلهاء ورد بأن اللى ربنا عايزة هيكون وبأن محدش هيموت من عدم الجواز وبأنى مش مستعجلة ولا عايزة أسيب أهلى ولا أهلى أشتكوا منى ولأن الموقف ده فعلا بيبقى مهين وجارح جدا ومش أى حد هيحس بيه الا بنت وتكون مرت بواحد زيه تخيلى نفسك كده رايحة مثلا خطوبة بنت عمك وهيا أصغر منك بحوالى خمس سنين وانتى مبسوطة ليها جدااااااااااااااااااااااا وعايزة تطيرى من الفرحة ليها وفجأة أول ما توصلى وتسلمى عليها وتاخديها فى حضنك وتباركى ليها وتبدأى فى السلام على باقى الناس تحسى أنك واقفة فى جامع والكل عمال يدعى ليكى بطريقة مستفزة وياريت الكلمة تتقال مرة واحدة لا لا أزاى لازم تتقال مليون مرة وكل شوية تلاقى حد جاى وراكى ويكمل دعاء ويملس عليكى قال يعنى علشان الدعاء يبقى صح ويتحقق وكمان شوية وتحسى أنهم هيشحتوا عليكى عريس ولا لما تحسى أن الناس خايفة أنك تحسدى قرايبك البنات اللى أصغر منك وأتخطبوا أو أتجوزوا وبيبصوا ليكى بصات مش كويسة ومعناها أنهم خايفين من عينك ومن حسدك فعلا هو أحساس وشعور بشع وموقف سخيف وبايخ جدااااااااااا وبيجرح بنات كتير قوووووووووووى وبيعلم جواهم ولكن أحسن حاجة أن كل واحدة تبقى واثقة فى نفسها جدا وما تحاولش تتأثر بالكلام ده بالعكس ده تحاول تبقى طبيعية جدا وعادية مع الناس وترد عليهم بكلام يخليهم يكسفوا من نفسهم ومن أفكارهم الغريبة دى وتعيشى حياتك عادى جدا وما تقبليش بأى واحد علشان تخلصى من كلام الناس لا طبعا ده غلط ولأنه ممكن يؤدى لمشاكل ولا قدر الله لطلاق بعد كده يبقى إيه الأحسن جوازة فاشلة ولا طلاق ولا تبقى عانس زى ما الناس عايزة أنا عن نفسى هفضل سنجل وعااااااااااااااااانس زى ما الناس عايزة لحد ما ألاقى اللى أنا عايزاه وغير كده يبقى بيت أهلى أولى بيا وحياتى ومستقبلى أهم لأن الموضوع مش جواز وخلاص ولا بيعه وشروه وصفقة هنعملها ده عمر وحياه وحاجات كتيرة مهمة لازم تبقى موجودة مش عارفة لية حاسة أن عمرى ما هعيش لليوم اللى هشوف التفكير ده أتغير ناحية البنت وحتى لو ما أتغيرش وأنا لسة عايشة بتمنى يجى يوم ويتغير وبيتهيألى التغيير هيجى مننا أحنا يعنى أحنا دلوقتى سواء كنا بنات ولا ولاد أكيد فاهمين الكلام ده وبقينا شايفين أنه فيه موروثات وتقاليد غلط جدا وطالما عارفين كده يبقى نبدأ نغيرها ونعمل الصح بالأضافة الى أننا نعلم ولادنا الصح ونغرس جواهم المفاهيم الصح مش الموروثات الغلط اللى عمالة تدمر فينا
وعلشان كده أنا برجح أفضل سنجل وبناشد كل البنات تفضل سنجل لحد ما يلاقوا نصهم التانى بس يلاقوه صح مش أى كلااااااااااااام
أيوة فعلا بكرة 6 أكتوبر بس ياترى كام واحد وواحدة عارفين يعنى إيه 6 أكتوبر وخصوصا الأجيال الجديدة كل الناس بتسأل هو أجازة ولا لا وكل اللى بيربطهم باليوم أنه أجازة والناس هترتاح من شغلها والطلاب من الجامعات والمدارس
اللى خلانى أتكلم فى الموضوع ده أمبارح ماما بتقولى بعد بكرة 6 أكتوبر مش هتكتبى عنه قلت لها لا مش هكتب قالتلى لية أمال أنتى بتشتغلى إيه مش المفروض برضة تفكروا الناس بتاريخهم قلت لها مش النظرية أنا بس ما بحبش أكتب فى الأتجاه ده مبعرفش أكتب فى المواضيع دى ما بلاقيش نفسى فيها ولا بعرف أعبر عن اللى جوايا قالتلى يعنى المجلات ولا الجرنان اللى بتكتبى فيه مفيش حد خالص هيكتب عنهم قلت لها أكيد فيه ناس هتكتب لكن أنا مبعرفش أكتب فى الحاجات دى وبعدين أساسا محدش بقى عارف حاجة عن 6 أكتوبر غير أنه أجازة وبس ردت وقالتلى هو فعلا كل الناس بتدور على يوم الأجازة بس أكيد برضة لازم يكونوا عارفين هو حصل إيه فى اليوم ده قلت لها يا ماما خلاص الموضوع ده أنتهى كان على أيامنا زمان وفى جيلى أنا وأخواتى اللى هو جيل التمانينات وما قبلة هما بس اللى عارفين معلومات عن 6 أكتوبر وكنا زمان لازم نعمل موضوع تعبير عنه وكمان مدرس الرسم كان يخلينا نرسم عنه وكانوا بيعملوا أحتفال فى المدرسة ونلاقى فيه كلمات ومواضيع وحاجات عن 6 أكتوبر ولكن خلاص أعتقد الأجيال اللى بعد كده الوضع أختلف معاها تماما ومابقاش فيه حاجة أسمها موضوع تعبير ولا حصة رسم ولا حفلة ولا كلمة فى الاذاعة الصبح عن 6 أكتوبر أحنا أتربينا على الحاجات دى وعرفناها مش من تاريخنا ومادة التاريخ وبس ولكن كل حاجة حوالينا كانت بتحكيها حتى التليفزيون نفسه كان فيه مسلسلات وأفلام زمان لما كنا صغيرين بتحكى التاريخ غير البرامج وغير أنى سمعت من بابا ذكرياته مع الحرب ولكن خلاص دلوقتى ما أعتقدش أنه فيه حد بقى عارف حاجة كل اللى يعرفوه أنه يوم أجازة وبس وأنتهى الحوار مع ماما ولكن لاقيت نفسى جريت وبرضة عايزة أكتب عن الموضوع وذكرياتى معاه من زمااااااااااااااااان
أنا فاكرة فعلا لما كنت صغيرة أنا وأخواتى أننا كنا عارفين مناسبات وحاجات كتيرة تاريخية وكنا بنلاقى حد فى المدارس يحكيلنا عن التاريخ والحرب وحاجات كتيرة وحتى لما كنت لسة فى أبتدائى وأنطلب منى موضوع تعبير ورسم عن 6 أكتوبر جريت على بابا اسأله ولاقيتة حكالى وكتبلى موضوع عن الحرب واللى شافه واللى حصل وبعدها أنا قريت وفهمت وكتبت ورسمت وساعدنى فى الرسم وكمان كان بيحكيلنا عن اللى بيحصل وحصل
عارفين زمان شبابنا كان بيحصل معاهم إيه كان ممكن الواحد يدخل الجيش ويقعد 7 سنين وما يبقاش عارف هيخرج أمتى ولا هينزل أجازة أمتى أنا بابا قعد فعلا حوالى 7 سنين فى الجيش لحد الحرب ما خلصت وماكانش فيه زى دلوقتى موبايلات ولا تليفونات تقدر تطمن على أهلك ولا هما يطمنوا عليك وكان ممكن تقعد بالشهور محدش يعرف عنك حاجة وأهلك يفتكروا أنك مت خلاص لأنه مفيش أى أخبار وكل شوية يسمعوا أن فلان مات أو مصاب
ولا واحد يكون خاطب واحدة وبقاله كام سنه فى الجيش مش عارف ينزل وياخد أجازة 24 ساعة ولا 48 وينزل يعمل الفرح ويتجوز ويرجع الجيش وما يرجعش تانى لعروستة لأنه أستشهد متخيلين مشاعر الناس وقتها كانت عاملة أزاى
بابا كان بينقل ذخيرة فى عربية من مكان لمكان وبيقولى كان ممكن نبقى لسة نازلين من العربية وبنحط الذخيرة فى مكان ونلاقى العربية أنضربت أو يادوب لسة هنخرج من الخندق نلاقى الضرب يمين وشمال
أحنا الجيل بتاعنا جيل التمانينات وجيل السبعينات كان محظوظ شوية يعنى حتى اللى ماكانش عنده حد فى الجيش وحكاله عن اللى حصل كان فيه مدارس وحاجات تانية بتنقل لنا اللى حصل
ولكن جيل التسعينات وما بعد أنتهى خلاص الموضوع ده لا بقى فيه أهل بتحكى حاجة ولا المدارس بتعلم حاجة والتليفزيون حاله زى ما الكل عارف كل سنه اللى بيحصل فيلم ولا أتنين عن الحرب وده مش كل حاجة طبعا وده على القنوات المحلية واللى ما بقاش حد بيتابعها أصلا
وما فاضلش غير النت والجرايد والمجلات ياترى هيكتبوا إيه بقى المتوقع أنهم هيعملوا مقارنة بين زمان ودلوقتى وهنلاقى أغانى ومواضيع عن أول ضربة جوية فتحت باب الحرية وكمان خناقات عن مين كان أحسن فى الرؤساء وأى عصر أحسن وكلام متقال ومتعاد مليون مرة
بالأضافة الى أننا هنلاقى كمان أخبار عن الأستعداد لعيد ميلاد عمرو دياب ومشكلة نور الشريف ومشكلة أيناس الدغيدى والماتش النهاردة حصل فيه إيه ومش ده اللى عايزين نسمعه لأننا زهقنا منه
بس مش عارفة تقريبا أنا بحلم لأنه خلاص اللى أحنا عرفناه عن تاريخنا وأتعلمناه ومحفور فى عقلنا صعب أنه يتحفر فى عقول الأجيال الجديدة لأنه خلاص مفيش أهل عندهم وقت يحكوا حاجة والمدارس ما أعتقدش حد هيعمل زى زمان والتليفزيون راحت أيامه وده على أعتبار أن حد لسة متابعه والنت فى وادى تانى والجرايد والمجلات وغيره زى العاده وزى ما قلت
طيب إيه الحل بقى أعتقد أننا كمان كام سنه مش هنعرف 6 أكتوبر ده كان علشان إيه هنفتكرها أجازة عادية وخلاص زى أى أجازة وتاريخنا يتمحى وكل سنه وأنت طيب وسلملى على حضارة اللى مش عارفة كام سنه وتاريخنا اللى ضاع وعمال يضيع
تفاجئنا الصين هذه الأيام بأعلانها عن منتج جديد جدا ولكنه مختلف عن أى منتج آخر فهو ليس غسالة ولا ثلاجة ولا تليفزيون 20 بوصة ولا فانوس ولا أى شىء من المنتجات التى أغرقت السوق المصرى ولكن هذا المنتج الذى سوف تجدونه قريبا فى الأسواق وبعد العيد مباشرة ما هو الا وصمة عار جديدة لكل المصريين ولو تجاهلنا ما يحدث ووقفنا نشاهد من بعيد بدون كلام رافعين شعار ( وأحنا مالنا ) لم يتبقى لنا شىء بعد ذلك نخاف عليه أو نتكلم عنه لأن كل شىء ممكن السكوت عنه الا الحديث عن الشرف فهو أغلى من كل شىء
وبعيدا عن شعارات البعد عن التخلف والجهل وأن شرف البنت لا يتمثل فى وجود هذا الشىء من عدمه فأنا أقولها لكم بعلو صوتى أن شرف البنت بالفعل لا يمكن أن يكون متكامل بدون هذا الشىء فلا الدين ولا العادات ولا التقاليد ولا أى شىء أخر يتقبل كل هذا الهراء
وأذا وضعنا الدين جانبا وتكلمنا تبعا لتفكير الرجل الشرقى بغض النظر عن ديانته فأنا أقولها لكم لا يوجد رجل شرقى أيا كان يستطيع قبول أى امرأة فقدت عذريتها قبل زواجه بها سواء أكتشف هذا الأمر قبل الزواج أو بعده وكما يقال أن الأمر ليس فى بعض نقط الدم المنساله لأنه فى حالات كثيرة ومتعددة وشرحها الأطباء كثيرا بأنه لا يحدث نزول دم لأسباب متعددة ولكن أى طبيب يستطيع معرفة هذا بكل سهولة وهل عدم نزول الدم سببه فقدها لعذريتها أم لأى سبب آخر سوف أقوم بنقله لكم من مواقع طبية كثيرة
فدعونا نتحدث بكل صراحة وواقعية وأنقل لكم آراء الرجال والشرقيون خاصة
الرجال لا يمكن أن يقبلوا فتاه فقدت عذريتها وأصبحت بدون هذا الشىء التى تروجه لنا الصين قريبا
النساء والفتيات أغلبهم يرون أن شرفهم أغلى شىء يملكونة فى هذه الدنيا ويحتقرون أى فتاه تفرط فى نفسها وفى شرفها بغض النظر عن أى حادثة أو شىء جعلها تفقده رغما عنها
وكل أم منذ ولادة بنتها وهى تحاول بكل الطرق توصيل لأبنتها فكرة ممنوع أقتراب أى شخص منك وخاصة هذه المنطقة ولأنها فى السن الصغير لا يمكن أن تفهم شرح الأم ولكن أى أم تحاول بقدر الأمكان توصيل المعلومة للبنت بطريقة بسيطة جدا ( وهى أنه عيب أى حد يلمسك فى أى حته فى جسمك خصوصا لو كان ولد وخصوصا المنطقة دى ) وتحاول بكل الطرق غرس الفكرة داخل عقلها حتى تكبر وتفهم أكثر وتستطيعوا سؤال أى أم عن كلامى هذا
وليس معنى وجود عدد من الفتيات ليس عندهم أخلاق أو شرف أن كل البنات هكذا وبغض النظر عن أى شىء فمجتمعنا بكل طبقاتة وطوائفه يرفض هذا المنتج الغريب وعلينا جميعا رفض دخول هذا المنتج بأى طريقة وعلى حكومتنا الدور الأكبر فى هذا
وأخيرا أنا كفتاه مثل ملايين الفتيات حاولت قدر الامكان منع نفسى من العصبية وأنا أكتب هذا الكلام دفاعا عنى وعن شرف بنات مصر ولى كلمة بسيطة أريد أن أوجهها لكل الناس أنه ليس بهذا المنتج أو غيره سوف تنحرف الفتيات أو تترك أخلاقها لأن الفتيات التى بداخلها فكرة الأنحراف والتفريط فى الشرف ليسوا أى فتيات ولا يوجد شىء يمنعهم من هذا ولا يهمهم هذا المنتج من غيره ويوجد عوامل كثيرة تدفعهم لذلك منها عوامل نفسية وأسرية وبيئية فالفتاه المحترمة مهما حدث حولها لا يمكن أن تتخلى عن أخلاقها ولا عن شرفها فمهما فعلتوا فستظل فتيات مصر أشرف فتيات على وجه الأرض وليس معنى كلامى أننا نسمح بدخول هذا المنتج لأن المسألة مسألة مبدأ ولأن مصر ليست وكرا لكل ما هو فاسد وغريب وغير أخلاقى وضد ديننا وعاداتنا وتقاليدنا
غشاء البكارة الصينى يثير جدلاً.. مواطنون: سيزيد العنوسة ويحبس البنات فى البيوت.. أطباء: يسبب العقم ويفتح باب الانحراف.. حقوقيون: إهانة بالغة لا يمكن أن نتجاوزها
مين فينا مش لاقى حد يحكيله عن مشاكله وياخد رأيه فيها
الفكرة بدأت بسيطة جدا بمدونة للمشاكل كنت عملاها مع صديقة ليا من سنين عبارة عن فضفضة بينا وبين الناس ولكن المفاجأة أنه بقى بيجيلنا مشاكل كتيرة وبقينا بنرد عليها وكلامنا بقى بيعجب الناس وبياخدوا بيه
حلال المشاكل قسم فى مجلة وسط البلد لـ بسمه عبدالباسط
على قد ما بقدر بحاول أقدم أى نصيحة بشوفها مناسبة والحمدلله جاتلى مشاكل كتير ومع أن الواحد ساعات ما بيقدرش يحل مشاكله هو شخصيا بس ببقى فى قمة سعادتى وأنا بساعد أى حد فى حل مشكلتة وعلشان كده عايزة الموضوع يكبر قوى علشان أحس أنى عملت حاجة يمكن أعوض حاجات كتيرة مش عارفة أعملها لنفسى بالموضوع ده وتقريبا موضوع الدبلومة اللى عايزة أعملها مرتبط بالموضوع ده أدعولى بقى أعملها على خير وربنا يوفقنى فيها
وأكيد مش كل المشاكل بنشرها على الجروب أو المجلة باخد أذن صحابها الأول ولو ماعندهمش مانع بنشرها ولو مش موافقين ما بنشرهاش طبعا
------------------------------------
لو عجبكوا الكلام بتاعى وعايزين تتكلموا وتفضفضوا أبعتولى على
دى دعوة منى أنا مش من أى حد ولا من أى داعية ده كلامى أنا اللى بوجهه للناس سواء كانوا يعرفونى ولا لا سواء كانوا بيحبونى ولا لا سواء كان بينى وبينهم حاجة حلوة أو وحشة ولا لا
ياريت ياريت مليون مرة والكلام ده بقوله لنفسى قبل أى حد ياريت نتصالح مع نفسنا شوية وكمان نتصالح مع كل الناس
ياريت نبطل نكره بعض ونقف لبعض على الواحدة سواء كنا موافقين بعض فى كلامنا وآرائنا ولا لا لية ما نختلفش بهدوء ونعرض وجهات نظرنا بهدوء ومن غير ما نكره ونعادى بعض
وكمان فى حياتنا العادية وعلاقاتنا الأنسانية بكل الناس بلاش نتخانق بلاش نكره بعض بلاش نزعل بعض بلاش نقف لبعض على الواحدة ونبقى مستنين غلطة لبعض علشان ننتقم من بعض لية بس كده
أحنا بنى آدمين وأكيد مفيش حد مننا ما غلطش وما أتنرفزش وما زعلش ناس منه ولكن لية ما نحاولش نصلح نفسنا ونصلح علاقاتنا مع الناس لية ما بننساش الغلط لبعض لييييييييييييييييه
ياريت كلنا نتصالح مع نفسنا الأول لأننا ساعتها هنقدر نتصالح مع غيرنا وياريت كل واحد زعل حد ولا عمل فيه حاجة يصالحه أو حتى يعمل أى فعل يدل أنه نسى اللى حصل
ياريت بلاش لما تنتهى علاقات فى حياتنا ننتقم من بعض بعدها ونقف مستنين غلطات بعض علشان نشمت ونبهدل بعض
ياريت بلاش نكره بعض لأنه مفيش حاجة تستاهل
ياريت نتسامح أكتر من كده
ياريت ما ندخلش ونشتم فى بعض ونقول كلام مالوش لازمة وهنتحاسب عليه بعد كده
بالله عليكم أتصالحوا مع نفسكم ومع الناس الحياه مش مستاهلة كل ده وبكرة تفتكروا كلامى كويس
جربت مرة تجرح حد ، طيب أنجرحت مرة قبل كده ممكن أعرف أحساسك فى الحالتين وأنت بتجرح وأنت مجروح أكيد فيه أختلاف شاسع بين الأتنين لأن أحساس المجروح غير أحساس الجارح فرق السما والأرض بالظبط
طيب لو كنت طول عمرك بتجرح وبس وماشى تضايق فى الناس وتجرح فيهم فكرت مرة كده ممكن يكون نتيجة جرحك ده إيه وهل حطيت نفسك مكان اللى جرحته وشفت هتحس بإيه أراهن أى حد بيجرح الناس لو حط نفسه لحظة واحدة مكان الأنسان المجروح هيفضل ندمان طول عمره على اللى عمله وهيتمنى يرجع بيه العمر من تانى وما يعملش اللى عمله ولكن للأسف ساعتها بيكون الوقت عدى وفات طيب لية أحنا بنعمل فى نفسنا كده ولية بنجرح بعض ونضايق بعض
تحبوا أقولكم لما بتجرحوا حد ممكن يكون نتيجة ده إيه
مفيش حد كبير على الجرح والصدمات ومفيش حد ما قابلش مشاكل ولا عقبات فى حياته ولكن فيه حاجات بتكون أقوى من أى أنسان وممكن جرح أو صدمة واحدة تضيع حياه أنسان بحالها ويفضل سنين أثير الصدمة والجرح دة وارد جدا أن أى صدمة تجيب الأنسان الأرض وتخليه بدل ماكان أنسان عادى وعايش طبيعى جدا أتقلب للعكس وده مش بمزاجة لأنه مش هو اللى بيتحكم فى مشاعره ولا أحاسيسه وساعتها حياته كلها هتتقلب ومش هتبقى حياه أصلا هيكون زى الميت بالظبط لا منه ميت فعلا ولا منه عايش
حاله كده مالهاش معنى كمان ممكن جدا يحصل للأنسان ده تعب عضوى بسبب الجرح أو الصدمة ممكن جدا الأنسان ده بسبب الصدمة تجيله حالة من الخوف والرعب من الناس كلهم أيا كانوا الناس دول حتى لو أقرب الناس ليه وتلاقية مش قادر يخرج ولا يختلط بالناس ودايما حابب يقعد لوحده وممكن يفضل فترة طويلة كده على الحال ده لأنه أتفزع من الناس بسبب اللى شافه وقابله ونتيجة لده بقى خايف يخرج ولا يشوف أى حد ولما يفكر يخرج بسرعة العقل الباطن بيدى أشارات للجسم بتخلية يتراجع تماما عن فكرة الخروج لأنه بيتعب فورا ممكن كمان اللى أنجرح سواء كانت واحدة أنجرحت من واحد أو العكس أو أى ناس جرحوا بعض ده يسبب لهم عقدة من الطرف الثانى طول حياتهم ويخليهم شايفين الطرف التانى ده عدو ليهم وأن كل الناس وحشه
تخيل بقى لو أنت جرحت حد وبسبب جرحك فضل يتعذب وحياته باظت وقت طويل شوف أنت هتاخد سيئات قد إيه وهتتعذب بسببه قد إيه
وعلى فكرة كلامى ده ممكن تسألوا فيه أى دكتور أن أى صدمة أو جرح ممكن فعلا تدمر حياه أنسان هو يمكن فيه ناس مش أى حاجة تأثر فيهم ولكن فيه ناس تانية ممكن يتأثروا وقوى كمان وفعلا ممكن بسبب جرح أو صدمة تعمل عقدة للأنسان ده من كل الناس وتخليه خايف ومفزوع من مجرد الخروج من بيته ومقابلة أى حد وممكن كمان يتعب وتجيله مثلا قرحه عصبية أو أى حاجة تبقى مدمرة عليه حياته وخلاص فى النهاية أى شىء هيحصل هيعتبر أذى للأنسان ده
طيب إيه رأيكم وأحنا فى الأيام الحلوة دى نحاول نصلح غلطاتنا وكل أنسان جرح حد يطلب منه يسامحه ويحاول يصلح غلطته ولو ده صعب على الأقل يدعى ربنا يغفر له ذنوبه ويسامحه على اللى عمله ويدعى للأنسان اللى ظلمه وجرحه بأن ربنا يفك ضيقتة ويطلعه من اللى هو فيه
ما تيجوا نسامح بعض ونصالح بعض ونبطل نجرح فى الناس وقبل ما نعمل أى شىء وحش نحط نفسنا مكان الناس ونشوف هنحس بإيه وساعتها لا يمكن هنزعل ولا نضايق حد
جربت مرة تدخل جوه نفسك وماتعرفش تطلع تانى أو تلاقى نفسك عايز تفضل جوه نفسك طبعا كلام غريب هو مش غريب لأن كتير مننا بيحسوا بيه وبيعشوه كمان طيب نبدأ من الأغتراب والأحساس بالغربة اللى الواحد بيحسه وبيخليه يدخل جوة ذاته فى دراستى للفلسفة كان فيه موضوع عندنا بيتكلم عن الأغتراب والغربة مع توضيح بسيط لأنواع الغربة فى البداية لازم نفرق بين نوعين من الغربة وهما زى ما قال التوحيدى :- غربة مكانية وغربة نفسية مأساوية الغربة المكانية بيعتبرها التوحيدى غربة مؤقته أو مرهونة بارتحال الغريب وهجرته عن أهله وذويه والغربة النفسية بيصفها بأنها الغربة الحقيقية لأنها غربة دائمة وعميقة ومريرة فالغريب الذى يعنيه التوحيدى غريب فى وطنه وغريب وهو بين أصحابه وأحبابه لأنه بيحمل الغربة فى داخله لذلك هو دائما متبرم ومتمرد على المكان ياترى فيه حد حس بالغربة دى بالنوع الأقوى واللى بيأثر أكتر على الأنسان طيب كنتوا بتحسوا بأيه وهل الأحساس ده موجود دايما ولا بيجى ويروح لأنه لو بيجى ويروح هتكون حاجة كويسة لأن كده أنت مش هتكون أنسان تعبان نفسيا وبتعانى ولكن لو كان موجود على طول هتعمل أيه كتير ناس مننا ساعات بتضايق وبتحصل مواقف تضايقها وتلاقى الواحد كرد فعل لاأرادى منه بيبعد عن الناس وبيعيش جوه نفسه زى ما أنا قلت ويكون فعلا حابب يبقى بعيد وبيحس بغربة شديدة حتى وهو بين أهله وأصدقائة وكل الناس المقربين له لكن فيه نوع الطبيعى بتاعهم أحساسهم بالغربة يعنى حاجة طبيعية كده عندهم أنهم يكونوا حاسين بالغربة وهو فى وسط كل الناس وده طبعا أحساس بشع جدا وهو ده النوع التانى من الأغتراب عند التوحيدى اللى بيسميها غربة نفسية مأساوية وأنا لما فكرت فى النوع ده وحطيت نفسى بجد مكان الناس اللى بتكون حاسة بكده بجد مقدرتش أحس بأى حاجة حلوة أو كويسة ولاقيت أنه مهما الناس اللى حواليا عملوا أو أنا عملت برضة الأحساس ده هيفضل متملكنى وأتمنيت فعلا مايكونش فيه حد فى عصرنا ده عايش النوع ده من الغربة هو يمكن فى عصرنا كترت شوية الأزمات النفسية والصراعات الداخلية جوه الأنسان ويعنى بتوصل للى أنا قلته أنك بتحس أوقات بالغربة عن كل اللى حواليك وفى نفس الوقت بتحب تعيش جوه نفسك وتفضل معاها وما بتكونش عندك الرغبة أنك تطلع منها ولكن سؤالى برضة فيه حد بيحب يعيش جوه نفسه سواء كانت فيه حاجة مضيقاه ولا لا بمعنى أيه بمعنى أنى أقول كل حاجة جوايا لنفسى أفضفض لنفسى وما أكونش من النوع اللى بيحكى للناس وكل حاجة بخليها لنفسى لأنى حاسة أن نفسى أكتر حد هيحسنى وهيفهمنى وعمرها ما هتقلب عليها ولا هتعايرنى بأى حاجة غلط وهيا برضة أول حد هيحاسبنى وهيلومنى وهيوجهنى فيه حد حس الأحساس ده أو حابب يعيشه أو يحسه طيب لو حد عاشه كان بيحس بأيه ولو حد ما جربوش هل نفسك تجربه ؟ أيه اللى بيخلى الناس توصل لكده هل كتر المشاكل والأزمات والضغوط اللى حوالينا بتدفع الناس الى انها تكون تعبانة نفسيا ؟ ولا الحاجات الكتير اللى بيكون الواحد بيعملها رغما عنه زى مثلا بيتعلم حاجة هو مش عايزها بيشتغل حاجة مش حابهها بيعيش حياه بطريقة مش عجباه وايه اللى بيخلى الناس عايزة تدخل جوه نفسها وتفضل جواها وما تطلعش وما تحكيش لحد أى حاجة هل لعدم ثقتهم فى أى حد ؟ ولا لأن الناس ما بقتش زى زمان لية الناس بقت بتخاف من بعضها كده فيه حد عنده أجابه أعتقد لو الناس رجعت زى زمان ورجعت لها الأخلاق والعادات والتقاليد والحاجات اللى نسيناها وما بقتش موجودة مش هنكون محتاجين نعالج نفسنا نفسيا ولا هنقول أننا عندنا يأس ولا أحباط ولا الكلام الكبير ده بس هل ممكن ده يحصل ولا خلاص دى بقت أحلام ومستحيلة ؟
مش عارفة لية لما كل واحد بيطلب التسامح بينسى نفسه أصلا وأزاى لما ندعو بعض للتسامح وناس كتيرة تنزل على مدوناتها مواضيع عن التسامح وهما مش قادرين أصلا يتسامحوا مع غيرهم ولا يتقبلوه ويتقبلوا كلامه أعتقد كل واحد شاف الموضوع من وجهه نظره وكتبه زى ما هو شايف يعنى الموضوع مش محتاج سخرية من حد وبيتهيألى طالما أحنا مش قادرين نتقبل كلام بعض وأسلوب كل واحد مننا فى التعبير عن اللى جواه واللى عايزة يبقى بلاش نكتب شعارات مالهاش لازمة ونطلع نفسنا ملايكة وأحنا أصلا مش كده ومش عارفين نتسامح مع بعض ومزعلين ناس كتيرة مننا ومستكترين نقول لهم كلمة كويسة لا وكمان بنلقح عليهم بكلام مالوش لازمة
والأحسن بقى بلاش نكتب ونتعب نفسنا طالما فيه ناس عايزانا فى صورة معينة ومش قادرة تتقبل طريقة كل واحد فى التعبير عن نفسه يبقى أزاى كل واحد بيطلب من الناس أنهم يتقبلوا كلامه وهما أصلا مش قادرين يتقبلوا كلام غيرهم فعلا منتهى التناقض
-------------------------------------------
البوست الأصلى قبل التحديث
الله يسامحك يا بدراوى أنت السبب فى البوست ده لأنى أول ما فتحت المدونة دخلت عندك بسبب عنوان البوست بتاعك ولاقيت الموضوع اللى مقدرتش ما أكتبش أنا كمان عنه وشفته عن البنت مشمشية وعند ناس كتيرة
هو أصلا دعوة للتسامح وأننا نسامح بعض دى حاجة كبيرة قوى وعلى قد ما كتير مننا بتيجى عليه لحظات بيفتكر كل حماقاته وبيعتذر للناس بس بقى فيه ناس ما بتقبلش الأعتذار بسرعة وتفضل تتقل وتتصرف تصرفات غريبة كأنك لازم تفضل تحايل فيهم وتعتذر مليون سنه بس المهم أننا نعمل اللى علينا ومحدش يخجل من الأعتذار أبدا لأن مفيهوش تقليل من الشخص خالص أنا عايزة أعتذر لناس كتيرة قوووووووووووووووووووووووووى وبتمنى يقبلوا أعتذارى
أول حد ماما اللى تعباها ومدوخاها معايا من يوم ما أتولدت ولحد دلوقتى وخصوصا فى أخر كام سنه دول اللى شافته منى بجد مفيش أى حد يقدر يستحمله ولا يضيقة وفعلا مش عارفة أقول لها إيه ولا أعمل لها إيه علشان تقبل أعتذارى وتسامحنى على كل الحماقات والهبل اللى كنت بعمله ولو تعرف أنى أصلا من غيرها معرفش أعيش كانت عرفت غلاوتها عندى قد إيه
بجد بحبك قوى وياريت تسامحينى وبجد أسفة على كل حاجة عملتها فى حقك
كفاية أنه بسببك وصلت لكل اللى أنا فيه ومن غيرك ومن غير وقوفك جمبى ماكنتش هعمل حاجة كفاية أنك شايلة هم البيت كله لوحدك وسايبانى أشوف شغلى ومستقبلى ومش بتطلبى منى حاجة
بجد أنا فعلا معنديش دم ولا أحساس ياريت تسامحينى وإن شاء الله هرجع قريب زى ما كنت وزى ما انتى حابة تشوفينى
بحبك قوى يا أغلى وأعظم أم فى الدنيا
ثانى حد هعتذر ليه أصدقائى أو صديقاتى بمعنى أصح علشان محدش يفهم غلط فعلا مش عارفة أقول لكم إيه على تقصيرى فى حقكم اللى طال قوى وللأسف برضة بغبائى كنت زعلانة منكم لأنكم ما بتسألوش عنى مع إنى عارفة ظروفكم كويس قوى واللى مانعكم عنى الشديد القوى وبرضة مهما كان المفروض أنا مقصرش مهما حصل بجد أنا أسفة جدا جدا جدا والكلام ده لصحابى من أيام الدراسة والكلية وشغلى وأكيد هما مش هيشوفوا الكلام ده بس بتمنى يوصلهم بأى طريقة
ثالث حد صديقتى وتوأم روحى بدرية عايزة أعتذر ليها جدا لأنها فى عز مشاكلها اللى يمكن كانت أكتر من اللى عندى بس وقفت جمبى وقفة محدش عملها ولا تخيلها لدرجة أنى كنت بتصل بيها فى اليوم أربع خمس مرات وكل مرة مش أقل من ساعة وهيا فاهمة أنا قصدى على أى أيام ويمكن ساعتها نسيت خالص أنا كمان أقف جمبها وأعرف هيا عاملة إيه وهيا بسبب أخلاقها العالية عمرها ما أشتكت ولا أضايقت وكانت واقفة جمبى وقفة محدش عملها وعمرها ما جابت سيرة مشاكلها ليا الا بعد وقت طويل قوى علشان ما تشيلنيش هم أكتر من همى بجد مش عارفة أقولك إيه ولا أعمل معاكى إيه ومش عارفة أعتذر ليكى أزاى بس أنا عارفة أنك فاهمة وحاسة باللى جوايا
بجد أنا أسفة جداااااااااااااااااااااااااااااا وبحبك قوى قوى يا أغلى من عمرى
رابع حد هو حد وقف معايا وقفات كتيرة قوى وكان أكتر من أخ وللأسف عمرى ما عرفت أقف جمبه ولا أرد له جزء من اللى عمله معايا وكمان كنت خنقاه دايما بمشاكلى وبوش الأكتئاب والحزن والخنقة اللى خليته يكره اليوم اللى عرفنى فيه وللأسف من غير قصد ولا تعمد منى خليته يفهمنى غلط جدا ومش قادرة ألومه ولا أعتب عليه بس خلاص أعتقد أنه أنتهى عصر الغباء بقى اللى أنا كنت فيه بتمنى فعلا يقبل أعتذارى على أى تصرف حصل منى ضايقة سواء أضايق منى أو زعل عليا وبوعده أنه هيشوف حد تانى وإن شاء الله هنفذ وعدى ومن غير ذكر أسماء هو عارف نفسه كويس جدا
خامس حد كل الناس اللى عرفتهم عن طريق النت والمدونات والفيس بوك والمجلات وغيره وغيره بجد أسفة لو حصل منى أى تصرف زعلكم منى وبتمنى ما تكونوش شايلين جواكم حاجة منى وأى حد جواه حاجة ياريت يقولها ونصفى كل شىء
سادس حد أخويا الكبير أنا مش هعتذر له علشان غلطت فى حقه ولا عملت حاجة غلط ولكن لأنه عمل معايا ولسة بيعمل كتير قوى ومهما عملت مش هقدر أرد له ولا جزء واحد من اللى عمله ولسة بيعمله فعلا أسفة لأنى مش قادرة أرد له حاجة واحدة من اللى عملها وأسفة لأنك واحشنى قووووووووووى ودايما بيوصلك أنى محتاجاك وغصب عنى بيوصلك أحساسى وبتقلق عليا ما أنت مش عارف أنت بالنسبة ليا إيه وأنى محتاجاك قد إيه ومحتاجة لحضنك اللى مفيش أحن ولا أحلى منه فى الدنيا
سابع حد أتنين غالين عليا قوى قوى وهما وليد جودة ( كنج توت ) وهبه القاضى ( حكايات بوبو ) بجد مهما قلت مش هقدر أوفيكم حقكم أنتوا فعلا أتنين مفيش زيكم ولا عمرى هقابل ناس زيكم وبسببكم قدرت أعمل حاجات كتيرة قوى ياريت تسامحونى على تقصيرى فى حقكم بس والله غصب عنى أنتوا بجد وحشتونى جدا والجميل عمر أبنكم وحشنى جداااااااا ونفسى أشوفه وأشوفكم وإن شاء الله فى أقرب فرصة هجيلكم بجد بحبكم جدا يا أحلى أخوات وأصحاب فى الدنيا
ثامن حد مجموعة صديقات جميلات قوى وهما سارة الأسكافى وولاء البرى ومروة حسن وأسماء رمضان وأيناس لطفى ورشا نعمان بجد عايزة أشكركم على حاجة عملتوها معايا وعايزة أعتذر ليكم على تقصيرى برضة معاكم على الرغم أنكم عمركم ما اتأخرتوا عنى بجد بحبكم جداااااااااااااا
فى النهاية خايفة أكون نسيت حد لأن الموضوع قلب عليا حاجات كتيرة ولما هفتكر حد تانى هكتب على طول أو هعمل موضوع تانى بس رسالة منى لكل الناس سواء اللى قلت أسمهم أو لا ياريت تسامحونى على أى حاجة عملتها فى حقكم ولو فيه أى حد جواه حاجة من ناحيتى ياريت يقولها ونصفيها
بعد سفر ولف أسبوع وحضور عدد لا بأس به من حفلات الزفاف وسط تجمع الناس ومنهم اللى الواحد يعرفه والواحد ما يعرفوش وده بيكون سبب للتطفل الغريب والرخم والغلس أحيان كتيرة بصراحة الواحد أكتشف أن التطفل طبع أصيل ومميز فى الناس وصعب يتخلوا عنه ولا يسيبوه
ده ممكن يموتوا لو بطلوا تطفل نبدأ بالتطفل على النت وخاصة الفيس بوك والمدونات وخلافه تلاقى ناس لا تعرفها ولا يعرفوك وداخلين يعلقوا عندك والتعليق فى حد ذاته سواء كان مع كلامك أو ضده مش عيب ولأن الواحد ما بيكتبش لنفسه ولكن العيب بقى فى اللى يدخل ولا تدخل ويفضل يوعظ فيك ويديك نصايح كأنك من باقى عيلته مثلا أو أنكم تعرفوا بعض من زمان أو مثلا يلاقيك كاتب أستاتيوس ولا أى موضوع ويفسره هو بمزاجة أو بمزاجها على أنك بتتكلم عن نفسك ويدخل يديك شوية نصايح حلوة كده أو يفهم كلامك غلط ويطلعك مثلا كافر ولا ملحد ويفضل يشتم فيك ويقول أنك كافر وملحد ويفضل يدعوك للهداية أو حد يلاقيك منزل كام صورة ومفيش بينك وبين الحد ده أى كلام وتلاقية عمل لنفسه تاج على الصور كأنها صورة مثلا ومن غير أى أستذان أزاى حد يدخل على صور حد ويعمل لنفسه تاج الواحد ممكن يقبل ده من حد يعرفه صاحبه من غير أى أستئذان ولكن حد متعرفوش ويدخل كده على صورك ويعمل لنفسه تاج طيب يستأذن الأول ولا أحنا خلاص بقى الناس بتعتبرنا من بقيه عيلتها طيب مثلا يدخلوا يعلقوا على الصور يقولوا أى حاجة ولكن يعملوا تاج لنفسهم ده شىء غريب عجيب
وطبعا فيه أمثلة كتيرة على الموضوع ده زى مثلا لما واحدة تكتب مواضيع عن العوانس وعن الوصف ده وعن المواضيع الخاصة بالبنات تلاقى ناس باعته ليها وبتدعى ربنا يرزقها بأبن الحلال على أعتبار أنها كانت منزلة أعلان طالبة فيه عريس طبعا ده نتيجة للتفكير المتخلف اللى للأسف مازال منتشر وأكيد مش كل الناس كده ولكن لسة فيه ناس كده
نيجى بقى لحاجة تانية مهمة قوى وهيا تجمعات الناس فى حفلات الزفاف والخطوبة وما شابه وياسلام بقى على التطفل حاجة تجنن بجد خصوصا بقى لما يكون فيه مجموعة بنات وفيه ناس متعرفش البنات دى يعنى مثلا يكونوا قرايب العريس وقرايب العروسة مش عارفينهم أو العكس أو حتى ناس صحاب أو معارف العروسين وباقى الناس مش عرفاهم يا سلام بقى الستات والرجالة كمان على فكرة ههههههههههههههههههههه يفضلوا يفصصوا فى البنات بطريقة غريبة
وطبعا مع تطور التكنولوجيا اللى لحست دماغ الناس تلاقى الست ولا الراجل من دول مش شايفين قدامهم أصلا وماسكين ليا الموبايل وقال إيه بيصوروا العروسة والعريس وهما نازلين تصوير فى البنات الموجودة علشان يعرضوها فى سوق الجوارى قصدى فى سوق العرايس يوووووووووووووووه قصدى يوروها لأى شاب يعرفوه سواء كان أبنهم ولا قريبهم ولا جارهم ولا يعرفوه من أى مكان على أعتبار أن البنات دول بضاعة ولازم ينقوا ويختاروا ربنا يشفى
وطريقة تانية تلاقى الواحدة من دول جاية بدون أى أستئذان ولا أحم ولا دستور وقاعدة جمب أى بنت وتفضل تفصص فيها وتحقق معاها أحيانا وتقلب فيها وتبص على إيديها ده أهم شىء تشوف فيه دبلة فى ايديها دى ولا دى ولا لا ولما تطمن تكمل بقى باقى التقليب فى البضاعة يوووووووووة قصدى البنت ومش بعيدة كمان تحقق معاها وتفتح معاها محضر كأنها فى قسم شرطة ولا قاعدة مع مخبر
حاجة كمان غاية فى الروعة كلمة عقبالك اللى بتتقال لأى واحد أو واحدة فى أى فرح لية بقى الكلمة دى ممكن تتقال مليون مرة من نفس الشخص فى نفس الوقت وتقريبا فى خلال ساعة أو أتنين أى واحدة أو واحد يسمعوا كلمة عقبالك خمسين مليون مرة لا وكمان لما تلاقى حد بيقولها ليك وهو فى عينه حسرة وزعل لأنك لسة مش مرتبط وبيقولك عقبالك وشوية وهيرفع ايده لربنا يدعيلك بأنه يرزقك بنصك الثانى كأنك لو ما لحقتش نفسك وأتجوزت ولا أتجوزتى يبقى أرتكبتى جريمة ولازم بقى تلحقوا نفسكم أحسن القطر يفوتكم وممكن يدوسكم كمان ده أنا ماكانش داسكم بناء على نظرات وكلام الناس
نيجى بقى لكلام غريب وعجيب بيتقال لأى واحدة فى أى فرح أو أى تجمع للعيلة هو إنتى لية قاعدة كده وده نتيجة مثلا لأنها بتبقى قاعدة فى حالها مثلا مع أهلها أو مع قرايبها فى أى فرح بتتفرج وخلاص
لا لا ده كلام قديم وتخلف ورجعية لازم تقوم تلف لها لفة فى الفرح كده يمكن تطلع لها بعريس ولا حاجة ولا تكعبل واحد فيها وطبعا نفس النصايح بتتقال للشباب اللى بتلاقيهم مالهمش شغلة غير اللف من هنا لهنا فى أى فرح والتفصيص فى كل البنات الموجودة يمكن البضاعة تعجبه ولا حاجة يوووووووووه قصدى يمكن واحدة تعجبه ويا بخت من وفق راسين فى الحلال وسمعونا زغروطة بقى وياعينى على التخلف والجهل اللى مش هيخلص والتطفل والهبل فى التعامل وأحسن حاجة ونصيحة منى لأى واحد وواحدة ما تعملوش غير اللى أنتوا مقتنعين بيه وبس وشايفينة صح ومش متعارض مع أخلاقنا ولا عاداتنا وتقاليدنا وسيبكم من كلام وتطفل الناس لأن الناس كده ولا كده بتتكلم وسمعونا أجدع سلام للتطفل والمتطفلين وتخلف وجهل الناس اللى مش ناوى ينتهى
أشعر بكم كبير من الخزى والعار لما يحدث كثيرا ومازال يحدث من هجوم على الأسلام عامة والحجاب خاصة وفى كل
مرة أرى فيها أضطهاد للحجاب أشعر بضيق وبجرح عميق داخلى ولا أعلم ماذا فعل لهم الحجاب ولا الأسلام لكى يفعلوا كل هذا
ولكن سؤالى الآن هل أنتم لم تشعروا بأضطهاد الآخرين لنا الا عندما قتلت مروة الشربينى أقولها لكم لا وألف لا فأنا أشعر بالأضطهاد يوميا وآراه فى عيون الكثيرون وفى كلام وهجوم الآخرين ولكن المشكلة الأكبر ليست فى الهجوم والأضطهاد الخارجى فقط فنحن نتعرض لهجوم داخلى من داخلنا نحن بشر مثلنا يعيشون فى وطننا ولكن بداخلهم كم أضطهاد وهجوم غريب على الحجاب
شعرت بالأسى عندما تابعت عدد من المواضيع لفتيات وسيدات يتكلمن عن الحجاب وعن أضطهادهم الواضح له مع أنهم من داخل هذه البلد وشربوا من نيلها ولكن بداخلهم أضطهاد لنا وهذه ليست أول مرة أرى فيها هذا الهجوم فكيف نلوم على الآخرين ما يفعلونه بنا أذا كنا نضطهد بعضنا بكل قسوة وشراسة
مازلنا لا نعلم كيفية تقبل آراء ومعتقدات الآخرين فأنا لا أتدخل ولا أهاجم أى فتاه مسلمة وغير محجبة ولا أتدخل فى أى عقيدة غير الأسلام وأهاجم معتقدات أى بشر فلماذا كل الآخرين يهاجمون الأسلام والحجاب ومن سمح لهم بالتدخل فى أمور ديننا وعقيدتنا هل تدخل أحد منا فى أمور دينهم
والعجيب عندما تجد مسلمات يصدر منهم هذا الأضطهاد أعتقد أن كل واحدة مسؤلة عن تصرفاتها ترتدى الحجاب أم لا هذا شىء يخصها وجزائها عند الله ولكن ليس من حقك الهجوم ولا الكلام على الحجاب فطالما إنت حرة فغيرك من النساء والفتيات أحرار فى أرتداء ما يريدون
فأنتن جعلتونى أشعر بجرح عميق جدا بداخلى بسبب ما تفعلن وتقولن وتكتبن كفى ما تفعلون ولتفعل كل واحدة منكن ما تريد ولكن أبتعدوا عن الحجاب وعن أضطهاده بهذا الشكل كفى الهجمات والأضطهاد الخارجى علينا أعتقد أننا لسنا فى حاجة للمزيد من الهجمات ولرؤية أحقادكم على الحجاب
مازلت أشعر بجرح كبير داخلى بسبب ما حدث لمروة الشربينى وأشعر بكل الطعنات التى وجهت اليها بداخلى الآن ولأننا مازلنا نعيش فى هذا الذل ومازلنا مضطهدين من الداخل والخارج
سامحينى إن لم أستطع فعل الكثير من أجلك فليس فى يدى شىء غير الدعاء لك أن يدخلك الله فسيح جناته وأن يلهم أهلك الصبر وأن يطرح البركة فى ولدك الصغير
سامحينا فنحن مازلنا جبناء أذلاء وسوف نرى أكثر من ذلك بكثير بسبب هذا الجبن
سامحينى وتقبلى أعتذارى عن تقصيرى فى حقك وسوف أفعل ما أستطيع فعله من أجلك ومن أجل الحجاب والأسلام وأتمنى أن يعيننى الله على ذلك
الى اللقاء يا مروة وأتمنى أن القاكى فى جنة الخلد يا شهيدة الحجاب
