عايزة أشتغل بواب

أيوة عايزة أشتغل بواب فيه حد عنده مااااااااااانع ؟؟

ما هو خلاص الكلية اللى طلع فيها عنينا ما بقاش ليها لازمة والشغلانة المتوفرة ليها حاليا أنك تبقى فرد أمن وده طبعا بالنسبة للولاد وماجابوش سيرتنا فى حاجة خالص طيب خلاص أنا بقى هطالب بالمساواة وأطالب بحقى فى أنى عايزة أبقى زيهم وأشتغل بواب على الأقل وواحدة واحدة أترقى وأبقى فرد أمن على أى مول

ما هو بعد أربع سنين درسناها فى الكلية أكتشفنا خير اللهم أجعله خير أننا مالناش لازمة أيوووووووون خريجين كليات الآداب والحقوق يروحوا يرموا نفسهم فى البحر بقى وده بناء على كلام وزيرة القوى العاملة بتقول لكم يا ولاد مالكوش مكان فى الوظائف الحكومية وروحوا أحسن لكم أشتغلوا أفرد أمن فاهمين الكلام ولا لا

ومش بعيد قريب يقفلوا الكليات دى ولا عزاء لينا ولا لأى حد يتشدد لنا كمان

طيب ممكن سؤال حضرتك معلش طيب هما المدرسين والمحامين المفروض يكونوا متخرجين من كليات إيه ؟

طيب يعنى هتعملوا ليهم كليات تانية ولا هتفتحوا قسم مدرسين مثلا فى كلية الطب وقسم محامين فى كلية الهندسة عشان تبقى كليات عملية أهى وفل الفل

وبالمرة يتخرج الواحد من كلية الطب يبقى دكتور ومدرس ومن كلية الهندسة يبقى مهندس ومحامى ولا أى أى ولا زى زى وبكرة نلاقى يافطة دكتور مكتوب عليها دكتور باطنة وقلب ومدرس مادة الحب لجميع المراحل الدراسية ولا سحر ولا شعوذة

ولا تكونوا ناويين تقفلوا المدارس كمان ما هى مالهاش لازمة وبالمرة مش عايزين محامين هيعملوا إيه يعنى ما هى خربانة خربانة

وكفاية علينا الولاد يشتغلوا أفراد أمن وعمال فى المصانع والبنات يبيعوا فل فى الأشارات ويمسحوا العربيات ويشتغلوا خدامات وفى الآخر لو حبوا يتجوزوا يشوفوا ليهم عشة فى أى خرابة وأهى هتبقى عيشة فل الفل أهى ولا محتاجة مهر ولا عفش ولا شبكة ولا أى حاجة وأهو هنبقى ساهمنا فى القضاء على ظاهرة العنوسة بالمرة وأهو كله موصل لكله

وطبعا بما أن العيشة هتبقى على القد هنقدر نحقق طلب السيدة مشيرة خطاب فى أن محدش يخلف أكتر من طفلين ولو حد خلف الثالث هو الجانى على نفسه بقى ومش هيبقى له أى دعم لأن الدعم هيبقى لأول طفلين

وبكدة واحدة واحدة هنخلص على الشعب كله ما هو الشباب والبنات من الشغل والنوم فى الشوارع هيموتوا من الجوع وكده كده لو أتجوزوا مش هيخلفوا ولو خلفوا عيالهم هيتشردوا وهيبقوا أطفال شوارع فالأحسن ما يخلفوش وشوية والأب والأم هيموتوا ومش هيبقى فيه أطفال وهنصفى الشعب واحدة واحدة وبراوقة كده

ويبقى ربنا كرمه اللى عرف يطفش من البلد ويشوف له بلد تانية يعيش فيها

مع أنى عايزة أعرف هو فين الدعم ده هو فيه حد لاقى ياكل

أخرجوا الشوارع وشوفوا عدد الناس اللى قاعدة تشحت بقى كام ولا شوفوا الناس اللى بتنام كل يوم من غير عشا ولا حتى غدا

وهتبقى آخرتها هنشتغل بوابين وخدامين ولا عزاء لأى حاجة بقى

وعشان كده أنا بطالب بدكة كويسة لزوم شغل البوابين وكمان شوية فل أسرح بيهم على الأشارات وفوطة نضيفة أمسح بيها العربيات

وهيبقى شعارنا الجديد بلا تعليم بلا كلام فارغ ومعاك كلية يبقى أنت الجانى على نفسك يا عنيا