مشيت كتير وقليل وعديت على كورنيش النيل

مشيت كتير وقليل وعديت على كورنيش النيل دول ناس قاعدة تحب كتير وياريتهم فاهمين لو كانوا عارفين أن الحب مش كده وبأنه مش شوية فسح على مسكه أيد من ورا الأهل ولو كانوا حبوا بجد ماكانوش عملوا كده
ولية مسكة الأيد فى الحرام وفى الضلمة هو ما ينفعش تبقى فى الحلال

ومشيت كتير وقليل وعديت على كورنيش النيل دول ناس قاعدة ومعاها ولادها بتفسحها ولكن من جواهم زعلانين ومفيش أتنين منهم ماسكين أيد بعض مع أنها حلال لو عملوها ولكن الهم أكبر منهم بكتير

ومشيت كتير وقليل وعديت على كورنيش النيل دول شوية بنات جايين يضحكوا ويتفسحوا ولكنهم مش فاهمين أنهم لو مشيوا بطريقة أحسن وصوتهم بقى أوطى وبطلوا مرقعة وضحك عمال على بطال هتكون الفسحة أحلى بكتير

ومشيت كتير وقليل وعديت على كورنيش النيل دول شوية ولاد جايين يتمشوا ويشربوا حاجات وحاجات ويعاكسوا فى دى ودى وفاكرين أنهم كده صح وعايشين مع أنهم لو بصوا جواهم شوية هيلاقوا جبال حزن وهم على حياتهم الضايعة

ومشيت كتير وقليل وعديت على كورنيش النيل دى واحدة قعدة لوحدها بتتأمل فى النيل والشمس وعمالة تصور فيهم هيا مش مستنية واحد يجى يقابلها ولا يعرفها من ورا أهلها هيا قاعدة بتشم هوا وبس وبتستمتع بالمنظر الطبيعى اللى قدامها بس ياريت الناس فاهمين

ومشيت كتير وقليل وعديت على كورنيش النيل ده واحد قاعد شايل الهم يا عينى لا لاقى شغل ولا عارف يصرف على نفسه والعمر عمال يجرى ونفسه يفتح بيت ويتجوز ولكن لا حياه لمن تنادى

ومشيت كتير وقليل وعديت على كورنيش النيل دول شوية أطفال جايين يجروا ويتنططوا وفرحانين وياريتهم يفضلوا أطفال أحسن لهم بكتير

ومشيت كتير وقليل وعديت على كورنيش النيل ولاقيت دموع وأفراح وأحزان وأبتسامات ودوشة كبيرة ومراكب رايحة وجاية وناس بتجرى على رزقها وناس واقفة تتفرج وناس واقفة تتسلى وناس عمالة تتكلم على دى وعلى ده وناس مش فاهمة حاجة ولا عارفة حاجة ومن الهم ساكتين

ومشيت كتير وقليل وعديت على كورنيش النيل ده واحد ومعاه بنته وبعد ماكلت شوية حاجات مسك منها الكيس ورماه فى النيل طيب دى هتتعلم إيه من المنظر ده وهتعرف يعنى إيه النظافة من الإيمان ولا خلاص الموضوع ده محدش بقى بيبص لية

ومشيت كتير وقليل وعديت على كورنيش النيل بدور على حلم وفرحة تايهين وطموح وحاجات جايين وحزن بيحاول يقهرنى من سنين ولكنه مش قادر على فرحه السنين

ومشيت كتير وقليل وعديت على كورنيش النيل وياريت الناس فاهمين