عن اليقين

كلمة اليقين أول ما بسمعها بفرح جداااااا يمكن لأنى بقالى سنين عايشة بيه وعمره ما قل عندى ولكنه بيزيد
مهما دعيت وأتمنيت حاجات لو ماكانش عندك ثقة ويقين بأنها هتتحقق مهما سعيت ليها مش هاتيجى
خليك شايف حلمك دايما قدامك حقيقة وأسعى ليه وأدعى كتيييييييير ومتزهقش ولا تمل وخلى يقينك بتحقيق اللى بتتمناه أكبر من أى حاجة وصدقنى هتوصل فى النهاية

نعود من جديد

نعود من جديد إلى المكان الذى بدأت فيه الآحلام والذى عندما هجرناه تركنا جزء من أرواحنا فيه جزء دائما يشعر بالحنين إلى كل شئ حدث لنا هنا وإلى كل الأشخاص الذين جمعتنا بهم كلماتنا هنا
سنعود ولكننا لن نعود كما كنا فقد ضاع منا الكثير ولكننا تعلمنا ونضجنا أكثر ونود أن نلملم ما تبقى منا ونعوض ما فاتنا

وحشتونى

المدونة والتدوين وكل حاجة هنا وحشتنى ومؤقتا هتلاقونى فى مدونتى التانية البنات عايزة إيه لحد ما أرجع هنا تانى
http://elbanatayzaea.blogspot.com/

2015

كل سنة وكلكم طيبين ويارب الجاى يكون أحلى فى كل حاجة ويارب كل حد نفسه فى حاجة تتحقق ويارب سنينكم الجاية تبقى كلها خير وفرحة وراحة بال

رجوع يوسف لفاتيما

رجوع يوسف لفاتيما
من سنين والمدونين ما اتلموش واتجمعوا وفرحوا لحاجة كده

رجوع يوسف لفاتيما أدى الأمل لناس كتيرة كانت فقدت الأمل فى كل حاجة وعرفوا إن الصبر أخرته حلوة إن شاء الله

ربنا يخليه ليها وما يحرمهاش منه ولا يحرم أى أم من ولادها ومبروك لفاتيما

____________

بوست فاتيما

رائحة الشتاء

إنها الرائحة التى تبعث على نفسي الأمل والراحة والطمأنينة ، رائحة الشتاء والمطر
لعلها موجودة طوال العام فالشتاء أكثر فصول السنة قربا الى قلبي وعقلى

رائحة الخذلان

تنظر إلى مرآتها كل صباح تتحسس وجهها بكفيها الصغيرين وتنظر نظرة سريعة على أعينها وما أصابهما من إجهاد واضح بظهور هالة سوداء كبيرة

تذهب سريعا إلى باقى وجهها الذى مازال به من الطفولة ما يجعل الكثيرين لا يعرفون عمرها الحقيقى ويعطونها سنا أصغر من عمرها بعشرة سنين على الأقل !!

 تنظر إلى شعرها الذى حافظت على طوله مدة لا تقل عن عشرون عاما فكان يصل إلى نصف جسدها حتى ثارت مرة عليه وقامت بقص نصفه تقريبا فى محاولة لتغيير أشياء كثيرة فى حياتها

 مازالت كما هى تقف حائرة تنظر إلى نفسها فى المرآة لتلاحظ أنها فقدت الكثير من وزنها كأنها تعاقب نفسها على شئ لا تعرفه

 تفتح دولابها لتلتقط ملابسها وتنهى كل شئ سريعا ثم تنظر إلى نفسها فى المرآة وتعود من جديد رغبتها فى التخلص من كل ملابسها التى عاصرت أسوأ فترة فى حياتها ولكن ما دخل الملابس فى ما حدث ؟

سؤال تسأله لنفسها دائما ولا تجد له أجابة

فهى تشعر أن كل ملابسها ملوثة حتى لو كان التلوث عبارة عن تعلق رائحة من كانوا سبب فى خذلانها يوما ما فيها

 تنهى حديثها مع نفسها سريعا وتخرج مسرعة إلى عملها وفى طريقها يتعلق نظرها بمحلات الملابس والأثاث والتحف وكل شئ يحتاجه أى منزل وتظل تحلم ببيت خاص بها ترتبه كما تشاء وتختار كل قطعة فيه على هواها

 تنتهى من أفكارها عندما تصل إلى عملها ومازالت أحلامها تطير هنا وهناك أمامها

 ثم تفيق لحظة وتقول لنفسها أنها لم تعد كما كانت ولم يحق لها حتى الحلم فمن سلبوا منها كل حقوقها وأعطوها خيبات يحلمون ويعيشون وهى يعاقبها الجميع إن علموا بأحلامها وأمنياتها البسيطة والمشروعة

 تمسك بفنجان القهوة بعنف وتحتسيه على مهل وتشعر بمرارته التى تشبه مرارة أيامها وتعود لتكمل أحلامها فمن حقها على الأقل أن تحلم حتى لو لم يتحقق الحلم

إنسانة حرة

أنا إنسانة حرة واكتملت حريتى عندما تخلصت من قيدك

بعد الطلاق

نقطة ومن أول السطر

رمضان كريم

كل سنة وأنتوا طيبين ورمضان كريم عليكم

الحب مش كده

الحب مش بس شوية كلام حلو بيتقال

 الحب اهتمام واحترام ومشاركة بين أتنين فى كل حاجة فى حياتهم لان من غيرهم الحب هيموت مفيش كلام

ما يهمنيش تقولى بحبك وبموت فيكى وأنت مش عارف عملت إيه فى شغلى ولا وصلت لإيه

ما يهمنيش تقولى وحشتينى ونفسى أشوفك وأنت عارف أنك تقدر تشوفنى بكل سهولة ولكن أنت اللى مش عايز

ما يهمنيش تسمعنى كل يوم كلام حلو وأنت مش عارف أنا النهاردة مبسوطة ولا زعلانة ولا مخنوقة ولا مالى وفيا إيه عشان الكلام الحلو مش هينسينى زعلى أو خنقتى من أى حاجة وممكن ما تكونش أنت سبب الحاجة ولكن مش معنى كده أنك تتجاهل حالتى فى أى وقت وتقضيها كلام حلو وخلاص

الحب أنك تعرف أكتر حاجات بحبها وتفاجئنى بيها وبأنى أعرف أكتر حاجات أنت بتكرهها وأبطل أعملها  

الحب حاجة كبيرة قوى ولكن بدون ما نتشارك فى كل حاجة فى حياتنا ونحس ببعض أكتر مش هيبقى فى لزوم للحب ده ولا لأى كلمة حلوة بتتقال عشان كلها شوية وقت وهتموت المشاعر لو ماكناش فعلا مهتمين ومتشاركين فى كل حاجة فى حياتنا

مواعيد البرامج الدينية فى رمضان

كل سنة وأنتم طيبين ورمضان كريم عليكم جميعا

تاسع خاطرة ( الحب الأخير )

دائما ما يقولون أن أروع حب هو الحب الأول ولكنهم لا يعلمون أن أخر حب هو أعظم حب وما قبله لا يعتبر أى شىء مقارنة به
فالقلوب الطيبة تتلاقى بعد المرور على القلوب الخبيثة حتى تعلم قيمة ما وجدته

ثامن خاطرة ( سؤال )

حاولت أنام معرفتش

سألت عينى مالك ؟
قالتلى محرومة من النوم عشان حبيبى واحشنى ونفسى أشوفه

سألت قلبى مالك ؟
قالى الحب والشوق والحنين واخدينى فى دنيا تانية ومش عارف أنام

سألت عقلى مالك ؟
قالى ما ينام إلا مرتاح البال وأنا بالى مشغول على حبيبى هنام أزاى

سألت إيدى مالك ؟

قالتلى محتارة أعمل إيه معاكى طول اليوم ماسكة التليفون تدورى على رسايل حبيبك تقرى فيها وتبتسمى ومش عارفة تكتبيله إيه ولا إيه

سألت شفايفى مالك ؟
قالتلى محتارة ومن كتر حبى ما بقتش عايزة أكلم حد غير حبيبى وعشان أهرب من سؤالهم مالك متغيرة كده ليه

سألت ساعتى مالك ؟
قالتلى تعبتينى معاكى من كتر لعبك فيا وبصك ليا وعمالة تحسبى فاضل قد إيه عشان تشوفى نور عيونك

سألت مرايتى مالك ؟
قالتلى انتى اللى مالك راحة جاية عليا تبصى فيا تكونيش لسه بتتعرفى عليا

سألت دولابى مالك ؟
قالى تعبتينى وجننتينى وكل شوية تقلبينى وفى الأخر تقفلينى

سألت نفسى مالك ؟
قالتلى تعبت ونفسى أنام وعماله أحسب الأيام بس خايفة أجى يوم ما أقابله أكون تعبت ومن الفرحة أنام وأنسى الميعاد

سابع خاطرة ( الحنين )

قمة الحب إنك تحس إن حبيبك واحشك وهو معاك وتحس إن الحنين بيقتلك مع إنك قاعد جنبه وتلاقى نفسك بتقول له وحشتنى مع إنه لسه سايبك من لحظات

سادس خاطرة ( الخوف )

مازال لا يعلم أن خوفها من القادم ما هو إلا نتيجة لحبها الكبير له الذى يفوق أى كلام

فالخوف من الفراق والجرح والوجع يؤرقها دائما فكلما زاد حبها زاد خوفها

خامس خاطرة ( دقات الساعة )

يمر الوقت سريعا ونحن سويا ويقطعنا سيفه ولا تعلم دقات الساعة أن حياتنا تبدأ عند لقائنا وتقف لحظة فراقنا

رابع خاطرة ( الحب والخوف )

ليس الحب وحده السبب الذى يحرمنا من النوم ولكن الخوف من الحب والسعادة ومن القادم كفيل بسرقة النوم منك
فكيف لقلوب تعودت على الجرح والوجع والافتقاد والحنين أن تصدق وتؤمن بسهولة بوجود حب حقيقى خالى من أى أحزان وأوجاع

ثالث خاطرة ( شرقية ساذجة )

تبا لذلك الخجل الذى يمنعنى من مجرد النظر فى عيناك ويحرمنى من البوح بما يحمله قلبى من حب وشوق

أعذرنى فأنا مازلت فتاة شرقية ساذجة تخجل من أشياء كثيرة

فقط حاول أن تساعدها لتنسى خجلها وسذاجتها هذه

ثانى خاطرة ( الصباح والمساء )

يعنى إيه صباحك ومسائك يبقى بشكل ولون وطعم تانى

يعنى أول ما تصحى تسمع صوت حبيبك وقبل ما تنام تختم يومك بصوته

وتحس أنك عايش ملك زمانك وأيامك أتلونت بطعم الفرحة وتبقى صباح الخير وتصبح على خير أحسن من مليون مقطوعة موسيقية ممكن تسمعها