حوار مع نفسى

نفسى :- صباح الخير يا بوسبوس

أنا :- صباح الخير ياختى نعم

نفسى :- الله الله إيه الدخلة دى بس يعنى أنا جاية أطمن عليكى تعاملينى كده

أنا :- ما أنتى السبب لو ماكنتيش مغلبانى ماكنتش عاملتك كده

نفسى :- لية بس هو أنا عملت لك حاجة

أنا :- لا أبدااااااااااا بسيطة دايما عايزانى أعمل حاجات مش قادرة عليها وبتخلينى أضغط عليكى عشان ترحمينى وتبطلى تطلبى منى الحاجات دى

نفسى :- أنتى اللى عنيدة ومثالية زيادة عن اللزوم وعاملة كبت على مشاعرك وآحلامك وكل حاجة بتحبيها عشان اللى حواليكى

أنا :- لأنى مش أنانية حضرتك وما ينفعش عشان أرضى نفسى أزعل اللى حواليا أو على الاقل ما ينفعش أعمل حاجة هما مش راضيين عنها مية فى المية

نفسى :- ما هو مش لازم يبقوا راضيين عنها ميه فى المية ممكن النسبة تقل أو تزيد على حسب بس أنتى اللى عنيدة وبتيجى على نفسك دايما وده غلط

أنا :- ما أنا ما أتعودتش أعمل غير كده مش مهم عندى حاجة الأهم الناس اللى حواليا

نفسى :- بس كده غلط على فكرة وزى ما بتدى لازم تاخدى وأنتى ما بتاخديش وبتدى دايما ودايما جاية على نفسك

أنا :- لا مش قوى كده انتى بتبالغى

نفسى :- بس ما تقاطعنيش بقى وخلينى أتكلم لا قوى كده وأكتر من كده ده أنتى غلبتينى معاكى بسبب الكبت اللى عملاه عليا وضغطانى دايما وعمرك ما عملتى حاجة أنا بقولك عليها

أنا :- ما هو

نفسى :- بس أخرسى بقى وأسمعينى كفياكى مثالية وفكرى فى نفسك شوية عمالة تسيبى الدنيا تمشى بيكى وتجرى وأنتى واقفة مكانك أيوة صح أنك تخافى على اللى حواليكى ترضيهم وتساعديهم ولكن مش على حساب نفسك حاولى تعملى توازن أرضى نفسك واللى حواليكى

أنا :- بس ساعات ما بينفعش أرضى نفسى وأرضى اللى حواليا لازم أرضى حد منهم

نفسى :- أيوووووووووووون جينا بقى للكلام المهم تقومى أنتى بقى تعملى إيه ترضى اللى حواليكى حتى لو كان على حسابك وتموتى نفسك ومشاعرك وآحلامك وحياتك عشانهم

أنا :- يووووووووه بقى عايزانى أعمل إيه بس أنا مش أنانية

نفسى :- وأنا مش عايزاكى تبقى أنانية وفرحانة بيكى عشان أنتى بتحبى كل الناس وجدعة معاهم بس ما ينفعش تنسى نفسك وتهمليها وتبقى قاسية كده

أنا :- أنا قاسية

نفسى :- أيوة قاسية وللأسف قسوتك بتبقى على نفسك مش على حد ياريتها بتبقى على أى حد يضايقك ولا يزعلك ولكنك بتعاقبنى نفسك وتقسى عليها إيه مفيش فى قلبك رحمة أرحمى نفسك شوية

أنا :- بس أتسدى شوية أنتى ما صدقتى ولا إيه

نفسى :- أيوة ما صدقت يا شيخة ده أنتى خنقتينى وقربت أتبرى منك وأسيبك وأشوف واحدة تانية غيرك

أنا :- وأهون عليكى تسبينى حتى أنتى هتسبينى

نفسى :- لا أنتى ما تهونيش عليا بس أنتى اللى بتهونى على نفسك وده غلط

أنا :- ما أنتى شايفة اللى بيحصل حواليا هعمل أنا إيه بقى

نفسى :- إيه اللى بيحصل يعنى عاااااااادى جدااااااااااا هيا دى الحياة وأنا عارفاكى قوية وزى الجبل ما يتهدش أبدا ولا يتهز لية بتعملى فى نفسك كده شكلك عايزانى أعاقبك بجد

أنا :- تعاقبينى لية بس ده أنا غلبانة عااااااااااا طيب قوليلى عايزانى أعمل إيه أنا بجد تعبانة

نفسى :- أنتى عارفة أنتى عايزة إيه أعمليه وطلعيه برة نفسك خلية يخرج للدنيا عيشى حياتك وأخرجى وأشتغلى وشوفى الدنيا ، حققى طموحك وآحلامك ، حبى وأتحبى وعيشى بقى شوية

أنا :- شكلك مش عايشة فى الدنيا ولا إيه هو أنتى عايشة معايا فعلا ولا فى مكان تانى

نفسى :- لية يا ست الفيلسوفة

أنا :- عشان بتستهبلى وبتطلبى منى حاجات كتيرة وكلها تقريبا صعب تحقيقها بسبب حاجات كتيرة

نفسى :- بقولك إيه بلاش أستهبال بقى أنا عارفة أنك قوية جدااااااااااا وأنك ليكى شخصية مفيش زيها وكل اللى حواليكى بيحترموكى ويقدروكى وبيتمنوا ليكى الرضا فبطلى أستهبال بقى لأنك لو طلبتى منهم حاجة مش هيتأخروا عنك

أنا :- لااااااااااااا أهدى كده شوية إيه الدخلة دى

نفسى :- دخلة إيه وبتاع إيه بس بقى أنتى غلبيتنى وأخر مرة أخدك بالسياسة تانى ويالا حضرتك قومى بقى وأعملى اللى نفسك فيه وبطلى بقى تقسى على نفسك وأرحمينى معاكى شوية وبطلى تكبتينى كده وبطل تبقى عنيدة على نفسك

أنا :- بس

نفسى :- لا بس ولا مش بس أسمعى الكلام يااااااااااااااالا

أنا :- هحاول

نفسى :- نعميييييييييييييييين هتحاولى إيه ده هو كلام عيال يعنى مقعدانى كله ده نتكلم ونرغى وفى الآخر تقولى هحاول

أنا :- طيب خلاص خلاص براحة عليا ربنا يسهل وأعمل اللى يريحك بقى

نفسى :- تعملى اللى يريحنى ويريحك ويبسطك وتبطلى كبت بقى على آحلامك ومشاعرك

أنا :- طيب يا ستى فيه حاجة تانى

نفسى :- لا كفاية عليكى كده أما نشوف أخرتها معاكى وقريب هجيلك تانى ولو ما لاقتش تغيير أنتى حرة بقى

أنا :- طيب طيب ما تزقيش بقى يالا سلاااااااااام

نفسى :- سلاموز يا شابة

ذلك الصباح

الم يحن الوقت لظهور ذلك الصباح الصباح الذى أنتظره منذ سنوات عديدة ويأبى أن يأتى

فهو غير أى صباح نراه كل يوم فالصباح الذى أنتظره مختلف تماما

صباح به الكثير من الأمان والحب والسلام

صباح نعيش فيه مع من نحبهم ويحبونا

صباح يختفى فيه الكره والظلم والغربة والجرح والخيانة والكذب

صباح أرى فيه آحلامى حقيقة تسير على أرض الواقع

صباح أرى فيه أحبابى ويختفى من أمامى من يكرهونى وأكرههم ولا أريدهم فى حياتى

صباح جميل تحيطه العصافير من كل جهه وتغرد فيه وتشدو بأرق الأغانى

صباح أستيقظ فيه على وجوه من أحبهم فالبطبع سوف يكون أجمل صباح

ومازلت أنتظر ولكن هل سوف يطول أنتظارى ؟

كل سنة وأنتم طيبين

رسائل

شعور مرير عندما تحمل هموم كل من حولك ولا تجد من يحمل معك همومك وقتها يجب عليك حملها بمفردك لأنك الوحيد القادر على فهم نفسك

أجمل وأصعب أحساس فى الدنيا أنك تكون سبب فى سعادة اللى حواليك وفى نفس الوقت تكون من جواك مش مبسوط ومحدش حاسس بيك ولا عارف أزاى يسعدك

الذكريات المؤلمة غالبا ما تظل عالقة فى ذاكرتنا إن لم تحل مكانها ذكريات أفضل

خوف وقلق مدفون
والدمع مالى العيون
لا الخوف فى يوم أنتهى
ولا الدمع نزل من العيون

قسوة الآخرين تجعلنا أحيانا نقسو على أنفسنا وعلى غيرنا وتبدلنا من حال لحال وأسوأ حال هو قسوتنا على أنفسنا وعلى أحبابنا

لماذا نستسهل جرح بعضنا البعض وبعدها نبكى على اللبن المسكوب ؟

أعظم قوة هى التى تولد من قلب المحن وتجعلنا نتخطاها بسلام ولكن أذا أصابنا اليأس وتملك منا فسوف تقتلنا المحن فكن دائما قوى وتسلح بالصبر فهو سلاحنا لتخطى كل شىء

لا لست أنا من تهزمهما آلامها فكلما تقسو على دنيتى وتزداد آلامى أزداد أنا قوة وصلابة ومع كل لحظة ضعف ودمعة آلم تزداد قوتى وتجعلنى أهزم ضعفى ومع كل لحظة صبر يزداد يقينى بأن الفرج قريب وأن قدرة الله فوق كل شىء

أحيانا يشعر الأنسان بأشياء لا يستطيع ترجمتها لكلمات وتبقى وقتها لغة الصمت مع لغة العيون المعبر الحقيقى عن كل شىء وأى شىء

أحيانا يكون الوقت عائقا أمام بعض آحلامنا ووقتها نتمنى أن نوقف الزمن وأن نعود قليلا للوراء ولكن الذى يذهب لا يعود أبداااااااااااااااااااااااااااااا

الفرحة كالهواء نتقاسمها مع الجميع ويتسابق الكل لأخذ نصيبه منها ولكن الحزن لا يتسابق أحد لأقتسامه معك لذلك أحفظه بداخلك ولا داعى لظهوره أمام الآخرين

قف وأنظر حولك وراجع سجلات حياتك وتذكر كم شخص اسأت اليه ( جرحت ، أهنت ، أغتبت ، قسوتك الخ ) بقصد أو بدون وحاول أن تصلح أخطائك قبل فوات الآوان فكما تدين تدان

شعور مؤلم عندما تداس مشاعرك وأحاسيسك تحت أقدام الآخرين ولا يشعروا بما فعلوا ولكنهم نسيوا أن قسوة قلوبهم سوف ترد لهم حينما يأذن الله فلا تكن غليظ القلب ولا تبالي بما تفعل لأنه سوف يرد لك يوما ما

كثيرا لا نشعر بقيمة الأشياء التى نمتلكها الا عند أقتراب فقدانها !!! حقا عجبا لنا

شعور بالوحدة يغلفه صمت شديد مع رغبة فى البكاء ولكن دائما تعاندنى دموعى مع حالة لا مبالاة وفقدان للأحساس بكل شىء وأى شىء

أبحث عن وطن آخر به الناس تمتلك قلوب بشر لا حجر يحترمون بعضهم ويقدرون مشاعر الآخرين ويحافظون على كرامتهم ولا يقللوا منهم ويجرحوهم مهما حدث ولكن بعد بحث طويل لم أجد هذا العالم الا فى خيالى فقط

ليلة النمل

4 نوفمبر عيد الحب المحلى بتاع بلدنا من الآخر ولكن ليلة عيد الحب بتختلف من شخص للتانى ومع أن مفيش حد بقى له نفس يحب ولا يحتفل بحاجة ومعظم الناس مش ضايقة نفسها وحتى مش عارفين يمثلوا أنهم بيحبوا كانت ليلة عيد الحب عندى مختلفة تمااااااااما وبغض النظر عن أنه عيد حب سنجلاوى ولكن كان عندى أحتفال تانى مختلف ومميز عن أى حد

وكعادتى كل ليلة بسهر مع نفسى ولاب توبى وأتجول هنا وهناك طقت فى دماغى أعمل الفسكافية بتاعى عشان نظبط الجمجمة ونشوف هنعمل إيه وأذ فجأة وأنا المطبخ الاقى شوية نمل

طااااااااااخ طووووووووووووووخ تــــــــــــــــــــــــش

طبعا ده صوت دماغى اللى أنفجر لمجرد أنى شفت شوية نمل لأنى بقرف من الحشرات جدااااااااااا وأستحالة أقعد فى مكان فيه حشرة واحدة ولاقتنى عمالة أتنطط هنا وهناك عشان أعرف مصدر النمل وجاى منين ورايح فين وهل وصل للأكل طيب كل ولا لسة جعان ما أنا لازم أطمن عليه برضة قبل ما أقتله مش ضيوف دول فى بيتنا ولازم ياخدوا واجب الضيافة

وبعد التدقيق والتمحيص والتدوير والتنطيط وصلت الى أنى لازم أشيل كل حاجة وأنضف المطبخ وأمسحه وأرش مبيد الحشرات

وقد كان شلت كل حاجة وحضرت عدة الشغل المكونة من جردل المسح والمساحة أم شراشيب دى طبعا كل البنات عارفينها والولاد أكيد عارفينها ولو مش عارفينها مش مهم هما إيه اللى دخلهم هنا أصلا ده موضوع بناتى

ما علينا وجبت الفنيك اللى ما بطيقش ريحته وبيخنقنى جدااااااااااا ولكن ما باليد حيلة وتقريبا كده والله أعلم أنا ماكنتش بمسح بمية وعليها فنييييييييك نووووووووووووووووووو أنا كنت بمسح بفنيك عليه مية وده نسبة لكمية الفنيك اللى حطيتها عشان أطمن أن كل حاجة هتبقى تمام

وخلصت مسح وتنشيف واللذى منه وفضلت ألف فى المطبخ تانى وأحاول أشوف هاااااااااااا لسة فيه ضيوف ولا روحوا وشغلت الحاسة السادسة اللى هيا عند الستات والرجالة ما يعرفوش عنها حاجة دى وبعد ما أستوكدت أنه مفيش حاجة وكله تمام جبت المبيد الحشرى وغرقت المطبخ وبعدها رجعت كل حاجة لمكانها

وفى خلال هذه الرحلة المكوكية كنت عمالة أدندن وأخبط وأرزع فى كل حاجة لدرجة أن مش بس اللى معايا فى الشقة صحيوا لا ده تقريبا كل العمارة صحيت

ولكن بعد ما حسيت أن الناس صحيت لاحظت حاجة أن فيه هدوء غريب ساد الجو وتوقعت بذكائى كده أن ريحة علبة الفنيك والمبيد الحشرى دخلتهم فى غيبوبة لمدة سنتين ونص كده

وأكتشفت أن الشقة كلها بقت ريحتها فل الفل واللى نفسى أعرفه واسأله لكل الناس هل لية الناس لازم تمسح بفنيك هااااااااا لية وريحته بتبقى بشعة طيب هو مفيش فنيك ريحته حلوة أنا كان عندى أستعداد أحط على المية بخور وبرفان

لذلك قررت قرار هااااااااام لسة واخده من خمس دقايق ونص وللأسف نسيته

نرجع لمرجوعنا ولليلة الحب الجميلة اللى أنا قضيتها مع النمل والفنيك وجه فى عقل بالى برنامج أسامة منير وبفكر أعمل واحد زيه وأسميه أنا والنمل وهوااااااااااك وهيكون فكرته عن عيد الحب المنمل

وما نجيلكوش فى نمل أبدااااااااااااااا

فوتكوا بعافية بقى عشان ألحق أحتفل شوية بعيد الحب

أحتاج اليه

كثيرا ما نشعر بأشياء لا نستطيع ترجمتها بكلمات وخاصة لو كانت أشياء متعلقة بمشاعرنا وأحاسيسنا وقتها سوف تجد لسانك توقف عن الكلام وتود وقتها أن تصرخ كل ضلوعك بما يحتويه صدرك وقلبك ولكن تبا للصمت الذى يأخذنا لعالم آخر لا يستطيع فهمه الا القليلين

بداخلى بركان يود أن ينفجر ويصرخ بأعلى صوت ويعلنها أمام الجميع نعم أحتاج اليه ، نعم أود أن يفهمنى ويشعر بما داخلى بدون كلمة واحدة منى لأنه توجد أشياء أذا لم يشعر بها من حولنا فلا يوجد فائدة للكلام وقتها

أود أن أذهب معه الى آخر العالم عالم خالى من كل شىء قبيح نعيش فى سعادة وهنا وراحة بال

أود أن أخبره بما رأيته وجعلنى قاسية هكذا

أود أن يفهمنى ويعلم أن قسوتى ما هى الا تراكمات من قسوة الغير وأننى أحتاج الى عملية ترميم داخلى حتى تزال كل التراكمات القبيحة ويحل محلها كل شىء جميل

أود أن أخبره أنى مازلت أخاف منه وعليه

أود أن أخبره بملايين الأشياء التى تدور بداخلى ولكن تبا لذلك الصمت اللعين والأشياء التى لا تود أن تخرج من داخلى وتنتظره حتى يشعر بها بمفرده

فأنا خليط من التناقضات التى تؤرقنى وتفزع الكثيرون ممن حولى فعلى الرغم من جرأتى التى يشعر بها من حولى فبداخلى خجل يملأ الكون بأكمله يمنعنى من البوح بأشياء كثيرة

وكل ما بداخلى لا أستطيع أن أبوح به الآن ولكن كل أملى أن يصل ما بداخلى بدون كلمة واحدة منى فالكلمات أحيانا تكون ثقيلة على القلب

أحتاج لكل من يفهمونى من نظرة عينى بدون كلمة واحدة منى أحتاج لأحضانهم التى تحمينى من كل شىء

أحتاج لأخوتى فهم عونى فى هذه الدنيا ونظرة واحدة منى كفيلة حتى يعرفوا ما بى وحضن واحد منهم أرتمى به ينسينى كل شىء يؤلمنى

أحتاج لمن يقوينى فأنا الآن أضعف مما يتخيل أى بشر أحتاج لمن يقف معى فى وجه كل شىء وأى شىء فى الحياة

فلماذا لا تشعر بى أنت الآخر ؟ هل مازلت محتاج للكثير من الكلمات فأنا الآن وحيدة فى عالم أشعر أنه ليس بعالمى وكل من أحبهم تبعدنى عنهم المسافات لأظل وحدى أعيش فى غربتى التى أصبحت صديقتى

كم كرهتها هذه الغربة والوحدة المميتة ولكن هل يوجد أمل فى أن تفهمنى مثلهم وتشعر بى وبما داخلى بدون كلمة واحدة منى

حنين

حنين كلمة بسيطة ولكنها تلازمنا طوال حياتنا فمن منا لا يوجد بداخله حنين لأى شىء أيا كان

ولكن حنين عن حنين يفرق والغريب أننى طوال عمرى أشعر بالحنين لكل شىء وأى شىء

بداية من حنينى لرؤية أخى التوأم الذى لم أراه ولا أعرف شكله ولكنى أسمع الكثير عنه ويزداد حنينى له يوما بعد الآخر

بداخلى حنين للعالم الذى أحلم به فأنا أشعر دائما بأن هذا ليس عالمى وبأننى من زمن أخر

حنين لأيام الطفولة والبراءة وعدم التفكير فى أى شىء

حنين لجلسات الأصدقاء والخروج معهم والمرح كثيرا

حنين لمدرستى وللمدرسين

حنين لأصدقائى الذين تاهوا فى دوامة الحياة

حنين لأخوتى الذى ذاب قلبى شوقا اليهم

حنين لآحلامى وطموحى فدائما يوجد ما يبعدنى عنهم ويجعلنى أشعر بالحنين الدائم لهم مع أنهم معى وبداخلى

حنين للضحكة والفرحة من القلب فكثيرا ما نضحك وبداخلنا أحزان كثيرة

حنين للأمان الذى أفتقده كثيرا

حنين لنفسى نعم أحن لنفسى كثيرا وأبحث عن بسمه كثيرا وأود أن أصل اليها قريبا

حنين لأشياء كثيرة وعديدة لذلك فحياتى كلها عبارة عن مجموعة من الحنين الذى يزداد يوما بعد يوم وبسبب ذلك أتمنى أمنية غالية جدا على قلبى وهى أنه لو أراد لى الله وتزوجت وأنجبت أن أسمى أبنتى حنين لتذكرنى بحنينى الدائم لكل شىء

فحنين التى أحلم بها سوف تكون أحلى وأجمل حنين فى حياتى والتى سوف تذكرنى بحنينى الدائم لذلك الشخص الذى كان السبب فى وجودها وفرحتى به وبها

وأن لم يكتب لى الله فى تحقيق أمنيتى فى الحياة فى الزواج والأنجاب فسوف أسمى كل شىء عندى حنين

بداية من عروستى وكل العابى الى موبايلى الى لاب توبى الى كل شىء فأنا أصبحت أسيرة لحنين