وجع

ساعات بتيجى علينا أوقات ما بنعرفش نتكلم فيها ومن كتر أوجاعنا بنبقى عايزين نصرخ وبس يمكن الوجع اللى جوانا يخف شوية

وتقريبا الناس زى ما تكون ما صدقت والكل بدأ يطلع غضبه ووجعه بالطريقة اللى تناسبه زى ما يكونوا كانوا مستنين حد يقول لهم أنطلقوا فانطلقوا

ولأن الوجع مش فردى ولا مشكلة عند واحد ولا واحدة مننا ده وجع الملايين

الملايين اللى ما بقوش حاسين بأى أمان أيا كان ديانتهم ولا معتقداتهم

الملايين اللى بقوا ماشيين خايفين ومش عارفين بكرة فيه إيه

الملايين اللى كان عندهم أمل ولحد قبل دقايق من انتهاء 2010 عمالين يقولوا يارب تبقى 2011 مختلفة مع أن معظمهم ماكانش متفائل ولا شايف أى دليل على كدة والكل كان متوقع أن الجاى اسوأ وكانت الناس بتهنى بعضها زى ما يكون بيقولوا لبعض لا تعايرنى ولا أعايرك الهم طايلنى وطايلك

ودلوقتى الكل بقى بيبكى ويصرخ على كل حاجة وأى حاجة على الضياع اللى بقينا فيه ولسة هنبقى فيه

الكل شايف الصورة سودة ومفيش فيها أى نقطة بيضا

الكل بيقول كفاية هنفضل ساكتين لأمتى

الكل عنده مليون مشكلة ومشكلة خاصة ولكن المشاكل العامة بقت أكتر والكل واخد نايبه منها

الكل شايف أنه مفيش أمل والكل موجوع

والكل عايز يصرخ ويقول آآآآآآآآآآآآآآآه ولكن هل فيه حد هيسمعه

كلنا قلوبنا وجعانا من مليون حاجة وحاجة بس لازم نفهم بقى ونشغل دماغنا وما نبقاش زى الحافظ ومش فاهم وعمال يردد أى كلام

كلنا فى الهم سوا كلنا فى البطالة سوا كلنا فى الفقر سوا كلنا فى عدم أحساسنا بالأمان سوا كلنا بنتظلم سوا وبنحس بالقهر سوا كلنا بنتسرق سوا كلنا بنموت سوا من الهوا الملوث ومن الفساد والأكل الملوث كلنا مش عارفين نتعلم ولا نشتغل ولا نتعالج ولا نتجوز ولا نعيش أصلا

وملايين الحاجات اللى كلنا فيها سوا مفيش فرق بينا فى أى حاجة عشان أحنا كلنا مصريين ووجعنا واحد

ياريت نفوق بقى