وظيفة ما تمت وأحبنى لتعرف من أنا فى معرض الكتاب

تم أصدار كتاب وظيفة ما تمت لـ مايكل محسن

يحكي الكتاب بشكل ساخر عن سلسلة من المواقف الطريفة وقعت أثناء أداء إنترفيوهات العديد من الوظائف المختلفة

للمشاركة فى جروب الكتاب

وأيضا صدر كتاب أحبنى لتعرف من أنا لـ إيناس حليم ولنبى غانم

وهو مجموعة قصصية مشتركة

للمشاركة فى جروب الكتاب

تجدون أصدارات دار المصرى للنشر والتوزيع فى معرض الكتاب مع

دار أكتب صالة 3 علوى

ودار العين صالة المانيا ب بسرايا 6

والعالمية للنشر والتوزيع المانيا ب بسرايا 6

وانتظروا قريبا الأصدارات الجديدة

للمشاركة فى جروب الدار

توهة ومولد وأشياء آخرى

توهة ومولد وصاحبه غاااااااااااااااااااااااااااااااايب

الدنيا كلها بقت عاملة زى المولد هيصة وزيطة وناس مش عارفة بعضها وعمالة تخبط فى بعض ومش فاهمين أى حاجة فى أى حاجة وكله بيخطف من كله واللى بيقدر على حاجة بيعملها علشان يعيش ومش مهم الباقى يموت وواخدين مقولة أنا ومن بعدى الطوفان

وبالمناسبة دى سمعونى أغنية مولد يا دنيا مولد




زمااااااااااااااان كانوا بيقولوا أنا وأخويا على أبن عمى وأنا وأبن عمى على الغريب

دلوقتى بقى أنا والغريب على أبن عمى ومن قبله على أخويا

وهو ده شعار المرحلة الجديدة وهدية لكل واحد سنجة ومطوة علشان كل واحد يقطع أخوه براحته



كان زمان الناس الغريبة ما بتجيبش سيرة بعضها وشوية بقت الحاجات دى مقتصرة على أبناء العائلة الواحدة يعنى كل عيلة بيحافظوا قوى على سيرة بعضهم ولا يونكن بتاااااااااااااتاااااااااااا يجيبوا سيرة بعضهم

ولكن بالنسبة للتطور الطبيعى للعادات والتقاليد بقى الطبيعى أن كل عيلة تقطع فى فروة بعضها

كل شوية كده قاعدين ماسكين فروة

لا لا مش فروة خروف ده فروة فلان ولا فلانة اللى من نفس العيلة وشغالين كلااااااااااام ولوك لوك لوك سواء الكلام صح ولا غلط والأكتر بقى الكلام الغلط

وياريت كل واحد بقى يخلى باله من فروته أصل الفرو غلى قوى الأيام دى

وسمعنى أغنية كلام الناس لا بيقدم ولا يأخر



جواز عتريس من فؤادة باااااااااااااااااااااااااطل

ياترى عملتوا إيه لملايين الشباب اللى مش عارفين يتجوزوا يعنى فكرتوا فى مرة قبل ما تناموا كده فى ملايين البنات والولاد اللى لا لايقين ياكلوا ولا يشربوا وطبيعى مش عارفين يتجوزوا وأنتوا بتتجوزوا مرة وأتنين وثلاثة وطبعا براحتكم عيشووووووووووووووا أنا مش ضد الجوازة دى ولا هعمل زى عتريس وفؤادة وأقول الجوازة دى باطلة ولكن كفاية بقى سايبين الناس تتحرق أعملوا اللى يريحكم فى سركم بلاش تخنقوهم أكتر
وسمعنى أغنية النهاردة فرحى يا جدعااااااااااان هتجوز هتجوز

دعوة عااااااااااااااااااااااااااامة

دعوووووووووووووووووووووووة عامة لحضور أفتتاح مدونتى الجديدة
أيوووووووووووون يالا الكل يروح يقص الشريط ويقعد شوية فيه شوية كراسى وترابيزات هناك تحفش وهاتلاقوا عليهم الحاجة الساقعة والجاتون كمااااااااااااااااااااااااااااااااااااااااااااان

وطبعا هتسألونى لية ما تنزليش المواضيع اللى هناك هنا هقول لأن مدونتى دى ومدونة البنات عايزة إيه ليها خط تاااااااااانى تقريبا هما وجه قبلى والتانية وجه بحرى
نيييييييييييييييييياها

لا فعلا لأن التانية ليها خط مختلف وكمان لأنى عايزة المواضيع اللى فيها تاخد حقها فى المشاهدة

يالا شرفونى هناك بقى

هنااااااااااااااااااااااااااااا

أيحب أحدكم أن يأكل لحم أخيه ميتا

قال الله تعالى
يا أيها الذين آمنوا أجتنبوا كثيرا من الظن ان بعض الظن أثم ولا تجسسوا ولا يغتب بعضكم بعضا أيحب أحدكم أن يأكل لحم أخيه ميتا فكرهتموه

عن ابن عباس رضي الله عنهما قال مرّ رسول الله صلّى الله عليه وسلّم على قبرين فقال: ”إنهما ليعذبان وما يعذبان في كبير: أما هذا فكان لا يستتر من بوله، وأما هذا فكان يمشي بالنميمة“ ثم دعا بعسيب رطب فشقه باثنين فغرس على هذا واحدًا وعلى هذا واحدًا، ثم قال: ”لعله يخفف عنهما ما لم ييبسا

وقد عرَّف رسول الله ـ صلى الله عليه وسلم ـ الغيبة حين قال: «أتدرون ما الغيبة؟» قالوا: الله ورسوله أعلم. قال: «ذكرك أخاك بما يكره». قال: أفرأيت إن كان في أخي ما أقول؟ قال: «إن كان فيه ما تقول فقد اغتبته، وإن لم يكن فيه ما تقول فقد بهته

وعن أنس ـ رضي الله عنه ـ قال: قال رسول الله صلى الله عليه وسلم: «لما عُرج بي مررتُ بقوم لهم أظفارٌ من نُحاس يخمشون وجوهَهُم وصدُورَهم، فقلت: من هؤلاء يا جبريل؟ قال: هؤلاء الذين يأكلون لحوم الناسِ ويقعون في أعراضهم

سبحان الله بجد لو كل واحد يعرف لسانه ممكن يوديه لفين وقد إيه عقوبة الكلام على الناس صعبة وخاصة لو كان الكلام مش فيهم كمان وكله كدب

يااااااااااااااااااااااااااااااااااااااااااه

وبجد حسبى الله ونعم الوكيل دى أحسن حاجة ممكن كلنا نقولها

حسبى الله ونعم الوكيل

حسبى الله ونعم الوكيل
حسبى الله ونعم الوكيل
حسبى الله ونعم الوكيل

عريس يا ماااااااااااى 2 : شفتوا الجوازة الشيك وشفتوا ريش الديك وإييييييييه

ده الجزء الأول للى ما شافوش
عريس يا ماااااااااااى 1 : جواز المساطب

ندخل على الجزء التانى

شفتوا الجوازة الشيك وشفتوا ريش الديك وإييييييييه

شوف الجوازة الشيك بين وزة وأحلى ديك الديك كان شركسى ولونه حمصى وإييييييييييييييييييييييييييييييييه

كان يا ما كان من شوية سنين كده كان الواحد من دول قيما وسيما ووظيفة ميرى وأخلاق وذوق ذوق يعنى وكانوا اللى حواليه يتعاملوا معاه على أنه ديك البرابر وكان هو كمان شايف نفسه كده ما هو من حقة برضك محدش يقدر يلومه كان راجل راجل بجد
وتروح أيام وتيجى أيام ونوصل لديك البرابر المضروب لا لا مش الصينى ده الصينى أحسن بكتير
ده ديك البرابر بتاع بلدنا صنع إيدينا ويا عينى يا بلدى أول مرة تصنعى حاجة بإيدكى وأدى النتيجة طلعت مضروبة وفيها العبر

وتلاقى الواحد من دول ماشى نافش ريشة وناقص له ريشتين ويبقى شبه الطاووس بجد واللى حواليه يا عينى عمالين ينفخوا فيه أكتر وأكتر ومعيشينة فى الوهم وبأنه ديك البرابر فعلا ولكن كله كوم ولما الديك ده يفكر يخطب واحدة يا ويلها ويا سواد ليلها اللى تقع فى الديك المضروب ده ولأنهم بقوا كتير فبقى كتير بيقعوا فيهم

وتبدأ حكاية ديك البرابر اللى هيطلع فى الآخر عرسة بس على كبير شوية ومتخفية فى زى ديك وعمالة تمص فى دم كل اللى حواليها

بعد كام زيارة لبيت العروسة وبعد التعارف والقبول واللذى منه يتعنتظ قوى الباشا ويقول لأبو العروسة
أنا يا عمى جاهز إن شاء الله وكل حاجة تمام والشبكة زى ما تقولوا والمهر وكل شىء
يابنى أحنا اللى يهمنا أنك أنسان كويس وشوف أنت مقدرتك إيه ومش هنختلف
لا لا يا عمى أنتوا من حقكم تقولوا طلباتكم ( وفى عقل باله كسر حقكم )
خلاص يا بنى هنعمل زى باقى الناس ولا إيه رأيك
خلاص موافق يعنى عشر آلاف شبكة وهنجيبها على طول إن شاء الله وفرش أربع أوض وأنتوا عارفين اللى عليكم
أيوة يا أبنى المطبخ والأجهزة الكهربائية الخ
خلاص يا عمى أتفقنا ( ربنا ياخدك يا شيخ أنت فاكرنى قاعد على بنك أصبر بس كله هيطلع على بنتك )
طيب نحدد ميعاد الفاتحة والخطوبة ولا إيه رأيك

ويحددوا ميعاد كل حاجة وكل شىء تومااااااااااام ومفيش أى مشكلة

فجأة بعد كام يوم ديك البرابر بيكلم فوزية وشكله مضايق
مالك فيه إيه
لا أبدا شوية مشاكل فى الشغل
لا بجد فيه إيه
أنا مش عارف أقولك إيه ووشى منك ومن أهلك فى الأرض ( وهديكوا بالجزمة قريب ) أنا بس حاليا دخلت كذا مشروع وما بقاش معايا سيولة كبيرة علشان الشبكة ومش عارف بجد أعمل إيه
إيه المشكلة خلاص نجيب دبلتين وخلاص ولما ظروفك تتحسن نبقى نجيب الشبكة
لا لا ( والريشتين وقفوا وطاروا ) أنا أتفقت مع أهلك ومعاكى على أتفاق ولازم أكمله

يعنى هتعمل إيه
مش عارف
طيب خلاص مفيش غير اللى قلته ليك
طيب وأهلك هيوافقوا
ما تقلقش أنا هقول لهم ولما تيجى أبقى أتكلم معاهم

ويوافقوا أنهم يستحملوا ظروفه ما هما كانوا فاكرينة ديك برابر بجد مش عرسة

وبعد ما جابوا الدبل والمحبس وجهزوا كل حاجة وكله تمام وعملوا الخطوبة اللى أتكلفها أهل العروسة ودفعوا كل مليم فيها

ترررن ترررن
الو أزيك يا حبيبتى
أزيك يا ديكى يا حبيبى مالك صوتك متغير لية كده
لا أبدا شوية مشاكل فى الشغل
خير فيه إيه أحكيلى
أصل أصل ( أصبرى بس ده أنا هطلع عينك )
أصل إيه خير
أصل فيه مشاكل كتيرة فى الشغل وكل ما أوفر مبلغ علشان الشقة والجهاز يدخل فى شغل تانى ومش عارف أعمل إيه

وواحدة واحدة الديك عمال ريشة يقع واحدة ورا التانية ويبان على حقيقتة وأنه عرسة صغيرة

وحبة حبة مش هنجيب شقة
مش هنجيب عفش ولا شبكة
مش هنجيب مش عارف إيه
مش هنجيب أى حاجة ( وأذا كان عاجبك يا فوزية أنتى وأهلك )

وقال إيه الديك كان راسم ياخد البت من بيت أهلها بدون ما يغرم مليم واحد وكان هيرميها فى بيت أهله تعيش معاهم وكمان راسم أنها ما تجهزش ولا تعمل حاجة وتخلى أهلها تديها فلوس جهازها وهو يقلبهم منها بعد كده

وفجأة فضل ريش الديك يقع ويقع ويقع وما بقاش ولا ريشة وأذ فجأة العروسة وأهلها بصوا لاقوا الديك ده أصلا عرسة أيووووووووووووووووووووون عرسة بتحب تمص دم الناس مش أكتر ولكنها بتتلون بمليون وش شوية وش ديك شوية وش بطة شوية وش تعلب ولكنه فى الأصل إييييييييييييييييييييييييييييه
لا ديك ولا غيره
وطلع ديك البرابر مغشوش
شفتوا الجوازة الشيك وشفتوا ريش الديك وإييييييييييييييييييييييييييييييه

عريس يا ماااااااااااى 1 : جواز المساطب

زى ما وعدتكم من خماشر موضوع كده أنى هعمل سلسلة مواضيع عريس يا ماااااااااااى وقد كان يالا بينا

عريس يا ماااااااااااى 1 : جواز المساطب

من ساعة ما وعيت على الدنيا وأنا أسمع الناس تقول جواز صالونات ومش عارفة الكلمة دى أصلها إيه وأشمعنى يعنى الصالون يعنى هو ما ينفعش جواز الكنب ولا المساطب

وفجأة لاقتنى بفكر كده من زماااااااااااااااان قبل ما تطلع الصالونات من أيام حواء وأدم كانوا بيسموا الجواز إيه ؟؟ ولاقيت أنه حصل تدرج فظيع للكلمة ومش بعيد بعد كام سنة نلاقى أسمه بقى جواز صواريخ وقعدت أتخيل مسميات الجواز وخيالى ودااااااااااااااااااااااااااااااانى الى

جواز الغابة

وده كان زمان قوووووووووى من أيام حواء وأدم لما كانوا عايشين فى الأرض وحواليهم الشجر والحيوانات وبيلبسوا ورق الشجر وطبعا كانت القعدة المفضلة للناس وقتها تحت الشجرة وعلشان كده الجواز أيامها كان أسمه جواز الغابة تلاقى الواحد قاعد تحت الشجرة وفيه واحد جاره تحت الشجرة اللى جمبه وزليخة بنت الراجل الأول بتعمل ليهم عصير توت لسة واخداه من على الشجرة طازة ويادوب بتقدمه لأبوها وللراجل الضيف اللى كان معاه أبنه أذ فجأة الواد تنح لزليخة وأبوة خد باله قام قايل لأبوها

مين دى يا نخلة

دى بنتى زليخة يا عنبة

طيب إيه رأيك نجوزها لأبنى وردة

بت يا زليخة إيه رأيك فى وردة يا بت

يوووووووووووة يا بابا كده تكسفنى وتخلى ورق الشجر يقع من عليا

خلاص طالما الورق وقع يبقى دى علامة القبول

زغرطى يا غصن بنتك أتخطبت لوردة

لووووووووووووولى ويا نخلتين فى العلالى يا بلحهم دوا وردة خضب زليخة وهيعيشوا سوا

جواز الخيمة

تلاقى الراجل رابط الجمل بتاعه وقاعد قدام الخيمة بتاعته هو ومراتة وبنته صحراء والبنت عمالة تحلب المعيز وقدام الخيمة التانية أبو تعلب قاعد ومعاه أبنه فهد والواد بيقول لأبوه

أبتاه يا أبو تعلب أنا أرغب فى الزواج من البنت صحراء

يا أبا صحراء نود زيارتكم فى خيمتكم اليوم لخطبة أبنتك صحراء لولدى فهد

بنيتى صحراء ما هو رأيك فى هذا الفهد

أبتااااااااااااااه عليك اللعنة أخجلتنى وتسببت فى وقوع لبن الماعز من هذه الشالية

مبارك عليكى بنيتى وقوع اللبن دليل على قبولك للزواج

أقيموا الأفراح والليالى الملاح أحتفالا بخطبة بنيتى صحراء لفهد ولد أبو تعلب

لووووووووووووولى مالى صبر يا ناس يا ناس دلونى صحراء بنت الناس خطفت عيونى

جواز المساطب

وبعد سنين وسنين والدنيا أتطورت أكتر وبقى الناس بيوتها بالطين وقدام كل بيت مسطبة وأتنين وأبو سريع قاعد قدام بيته على المسطبة ومعاه أبن جارهم محمدين وشوية وأبو سريع ينادى على بنته

بيت يا خاضرة هاتى أتنين شاى يا بييييييييييه وجهزلنا الغدا يالا محمدين هيطفح معانا

حاضر يا باااااااااااااااا

وتخرج خاضرة تودى الشاى لأبوها ولمحمدين وأول ما يشوفها محمدين تجيله حالة صرع وبعد ما تدخل خاضرة محمدين يقول للراجل

قالا قولى يا عم الحاج هيا خاضرة بنتك حد متكلم عليها

متكلم عليها ده أنا لو حد جاب سيرتها بكلمة أطلع بنطجيتى وأطخطخة طخيخ

لا يا عمى أبو سريع جصدى فيه حد قارى فاتحتها خاطبها

عااااااااااااا فهمت جصدك يا واد لا مفيش

طيب أنا عايزة أخطب خاضرة يا حااااااااااااااااااج

بييييييييييت يا خاضرة

نعم يا باااااااااااااااااااا

تعالى هنا يا بييييييييييييييييييييييييه

الواد اللى أتصرع من شوية ده عايز يخطبك قولتى إيييييييه يا منيلة

يووووووووووووووووووووه يا بااااااااااااااا لو مؤاخذة خضتنى وخليت عجين الفطير يجع عليك وعلى محمدين الهى ما يوعى ياكله

طيب على خيرة الله يا بت وجوع العجين دليل على الرضا والجبول

زغرطى يا ولية منك ليها خاضرة أتخطبت لمحمدين

لووووووووووووووووولى وأدحرج وأجرى يا رمان

جواز الكنب

وده لما الناس أتطورت شوية وبقت بيوتها بالطوب وأحلى حاجة بقى تبقى عندهم الكنب كام كنبة بلدى والعيشة زى الفل

أستاذ عبدالغفور موظف فى الأرشيف مربوط على الدرجة الخمسين وعنده كام بنت وولد حلوين وفى يوم زارهم أبن صاحبه فتح الباب مفتاح أفندى أصله معاه أبتدائية قديمة

يا بنت يا بثينة

نعم يا بابا

أعملى أتنين شاى ليا ولمفتاح أفندى ولا تحب تشرب قهوة

لا يا عمى متشكر جدا شاى كويس قوى وياريت يا مزمازيل بثينة سكر خفيف شاى خفيف مية خفيفة نار خفيفة

بعد شوية تدخل بثينة بالشاى اللى كل حاجة فيه خفيفة وساعتها تليفون البيت يرن وقام عبدالغفور يرد عليه من الأوضة التانية قام مفتاح أتكلم وقال

أنتى مخطوبة يا مزمازيل بثينة

أنا أنت بتكلمنى أنا

أيوة يا مزمازيل بثينة

لا لا أبدا

ولا حد متكلم عليكى

وفجأة يدخل عبدالغفور وتخرج بثينة جرى ويقوم قايل لمفتاح هيا مالها فيها إيه

بصراحة يا عمى أنا عايز أخطب بنتك بثينة

طيب يا بنى لحظة هروح لها أخد رأيها

بثينة يا حبيبتى أنتى عارفة أنك أغلى حاجة عندى فى الدنيا وأنى عمرى ما غصبتك على حاجة ودايما معودكم على الصراحة مفتاح أفندى طلب إيدك من شوية وأنا مقدرش أديلة كلمة الا لما أعرف رأيك جايز يكون مش عاجبك ولا حاجة

ولسة بثينة هترد

قام قايل لها وحياة أبوكى لو قولتى لا لهحبسك فى البيت ومش هتروحى تانى دروس التريكو اللى قرفتينى بيها تانى

لا يا بابا مش كده

أمال إيه يا بثينة قلقتينى يا بنتى خير

مفيش بس أنا

بس إيه

ويقع من فوق راسها الوردة الدبلانة اللى كانت حطاها فيها

هاهاها وقوع الوردة دليل على الرضا والقبول مبروك يا بنتى

زغرطى يا حاجة أم بثينة بنتك أتخطبت لمفتاح أفندى

لووووووووووووووووووولى ما تزوقينى يا ماما قوام ياماما ده مفتاحى هياخدنا على بيتنا قوام يا ماما

جواز الصالونات

وتروح أيام وتيجى أيام وكل شىء يتطور والناس كلها يبقى عندهم صالونات والصالون من دول ما يتفتحش الا للضيوف وبس وممنوع منعا بااااااااااتا أى حد يفتحه ولا يقعد فيه الا لما يبقى فيه ضيوف وخاصة لو كان عريس

ومن شوية سنين كان جواز الصالونات بسيط قووووووووى وناجح جداااااااااااااااااا وكنا كل شوية نسمع

لووووووووووووووولى بدنا نتجوز على العيد بدنا نعمر بيت جديد

ويا دبلة الخطوبة عقبالنا كلنا ونبنى طوبة طوبة فى عش حبنا

وتروح أيام تانية وتيجى أيام تانية ونوصل لأيام هيحصل فيها العجب

هنا شاهيناز قاعدة فى صالون بيتهم وفيه كام واحدة شكل ريا وسكينة عمالين يقلبوا فيها زى البضاعة يا عينى ويجيبوها من فوق لتحت ولا كأنهم رايحين يشتروا عروسة من محل لعب

وهنا فوفا قاعدة فى صالون بيتهم ومعاها واحد قيمة وسيما وحاطط رجل على رجل وفى وشها ومش هامه وعمال يتنفج ويتعنتظ قووووووووى وناقص تطلع له ريشتين من كتر الغرور

وهنا أسماء قاعدة فى أوضتها ومامتها بتقول لها يالا يا بنتى العريس قاعد هو ومامته بلاش تتأخرى وأول ما تدخل هوووووووووووووب أم العريس إيه يا غندورة مالك بتدلعى علينا كده لية هو أبنى فيه واحدة برضة تعمل معاه كده ده مفيش زيه ده وده وده

وهنا فوزية وفتحية رايحين يشوفوا ميادة وقال إيه لما أهلها سألوهم عن العريس ولية ماجاش قالوا أصله مشغوووووووووووووول

مشغووووووووووول يروح يشوف العروسة !!!؟؟؟؟

وهنا عباس قاعد فى صالون عدلات بيحاول يقنعها بمهاراتة الجبارة فى شرب الحشيش وعدم الصلاه أيووووووووووووون هو كويس وأخلاق بس زى كل الشباب بيشرب حشيش عااااااااادى فيه مانع وكمان ما بيصليش كل الفروض أصله لسة صغنون عنده 35 سنة بس لما يكبر شوية هيواظب على الصلاة

وملاااااااااااااااااااااااايين الحكايات والروايات اللى بتحصل فى جواز الصالونات

وهو ده التطور الطبيعى للجواز وهنشوف بعد كده هيتطور ويروح لفييييييييييييييييين

هنشوف بعد كده أخبار وحاجات تانية أنتظرونااااااااااااااااااااااااااا

خيالى مع عدم الجاذبية النيوتينية

أذ فجأة وأنا قاعدة أمبارح على الجهاز وكل ما أروح لعمو جوجل الاقى تفاح عمال يقع هنا وهناك لحد ما الجهاز أتملى تفاح وبقيت حاسة أنى فى محل فكهانى وشوية وهنادى وأقول الكيلو بخمس ونص يالا تعالى بص طبعا خمسة ونص دة للصورة بس اللى على الجهاز ولكن الحقيقى أغلى من كده بكتير
وفجأة راح خياااااااااالى لبعيد وأفتكرت موضوع الجاذبية ونيوتن وسرحت قوووووووووى وتخيلت كده لو ماكانش فيه جاذبية والواحد يبقى طاير كده فى الجو ومش عارف يبثت على الأرض وتقريبا عشت جوه الحلم ده شوية ولاقيت نفسى طايرة فعلا ورجلى مش لامسة الأرض ولاقيت توابع كتيرة لموضوع عدم الجاذبية والطيران دة

هنلاقى الناس كلها عمالة تخبط فى بعضها بسبب وبدون سبب ومش هنلاقى أزمة مرورية بقى لأننا مش هنحتاج العربيات فى حاجة لأننا هنكون طايرين وساعتها هنستخدم الطبق الطائر
وبصيت بعيد شوية لاقيت عريس قاعد جمب عروستة فى حفل خطوبتهم وبدل ما يلبسها الدبلة لبس أختها الدبلة
وشوية ولاقيت واحد فى يوم فرحه وأذ فجأة وهو قايم يرقص مع عروستة الرقصة السلو لاقى نفسه بيرقص مع حماتة وجاتلة أزمة قلبية
وبعيد شوية واحد مع أبنه فى محل لعب بيشترى له لعبة وهما طالعين من المحل وبيمد أيده علشان يمسك أبنه لاقى نفسه طالع بعيل تانى وأم الواد التانى طلعت جرى وراه علشان تاخد أبنها وفجأة بعد ما وصلت لاقت نفسها كانت بتجرى ورا واحد تانى
وده واحد قاعد فى الأمتحان وبعد ما خلص وكله تمام بيسلم الورقة لاقى نفسه كان بيجاوب فى ورقة زميله وورقتة لسة فاضية
ودى واحدة بتنشر الغسيل فى البلكونة وبدل ما تحط المشابك على الحبل بتحطها فى دماغها
ودة واحد واقف مع صحابة على ناصية الشارع بيعاكسوا البنات وبيستعدوا لموسم التحرش بتاع كل سنة وفجأة لاقوا نفسهم بيعاكسوا أخواتهم البنات وساعتها تابوا عن المعاكسة والتحرش
واحد رايح يدى لحبيبتة وردة قام مديها لأمها وخدله الطريحة التمام
واحدة بتطبخ لجوزها جوزين حمام وبعد ما خلصت وبينادى عليها بيقول لها فين يا فوزية الحمام قالت ثوانى يا سى حنفى هحمره وأجيبه وبعد شوية الراجل بيبص من بلكونة بيتهم لاقى مراتة بتحط الحمام على سفرة جارهم
واحدة داخلة أوضتها تعمل تسريحة حلوة وتظبط شعرها بالسيشوار فجأة بتبص فى المراية لاقت نفسها ماسكة الخلاط وعملها أحلى تسريحة عفاريتى وجوزها مرمى جمبها على الأرض من الخضة
واحد كتب موضوع حلو قوى ولسة بينشره فى مدونتة قام نشره على حبل الغسيل
واحدة عملت كتاب وبعد ما نزلتة لاقت أسم صاحبتها هو اللى عليه

وبعد عشرة خماشر ساعة فوقت من الحلم ولاقيت نفسى بدل ما أكتب الموضوع فى الورقة كتبته على حيطة البيت ومنتظرة العلقة التمام

وبعد كل ده لاقيت نفسى صحيت من النوم بعد مفاجأة التفاح بتاعت أمبارح اللى خلت ساعتى البيولوجية جاتلها صدمة ونيمتنى تقريبا خماشر ساعة بحالهم وفوقت لاقيت التفاح فى مكانه والسرير فى مكانه وكل حاجة فى مكانها فقلت أكتب بسرعة قلت ما أدخل فى الغيبوبة من تااااااااانى

نييييييييييييييييييييييييييييييييياها

وكل سنة وأنت طيب يا عم نيوتن

اه صحيح الموضوع اللى فات ده أنا مستنية فيه رأيكم وأنا حذرتكم أهو مش لازم أروح لكل واحد مدونتة أقوله تعالى ياااااالا جاووووووب

عااااااااااااااااااااا