دى وصفة سهلة

كثيرا منا يعلم أننا نعيش بالكثير والكثير من الوصفات والخلطات الذكية والغبية أحيانا ونظل نتوارثها جيلا بعد جيل

وبما أن لكل شىء وصفة ما وبما أننا شعب مبتكر دائما فهذه وصفات غالية عليكم جميعا تجربيها أو لا فالأمر يعود اليكم

وأتركوا جانبا وصفات غلى رجل الفار وأم الخلول وأبو سحلول ووضعها على مكان الآلم وركزوا معى قليلا

أذا داهمتك صدمات كثيرة ومشاكل أكثر ورجع عقلك للذكريات الآليمة ومررت بتجارب مريرة فعليك النظر لها بعين الرضا والأبتسام وتطليع اللسان لها وأخذ الدش التمام ولبس الهدوم اللى على الحبل والخروج فى مكان واسع به خضرة وأذا لم تجد مكان واسع فتخيل أنك فى مكان واسع ومش عايزة أسمع حد يقولى مكان واسع إيه فى الزحمة دى تخيلوا تخيلوااااااااااا وعيشوا الحلم وبعدها قم بالتمشية فى هذا المكان وأذهب الى أقرب محل للأيس كريم وأطلب واحد شيكولاتة عشان أنا بحبه وبعدها كمل تمشية وأنت عمال تضحك ومحدش يقولى هضحك على إيه أضحك وخلاص ما هو المجانين فى نعيم أشمعنى أحنا يعنى

وبعدين عدى على أقرب واحد بتاع كشرى وأضربلك طبق أو خماشر حسب قدرتك وطبعا هسمع حد بيقولى مش المفروض الكشرى يبقى قبل الأيس الكريم

لا طبعا يا فالحين لازم نعمل كل حاجة غريبة وعجيبة علشان الوصفة تجيب نتيجة

وبعد الكشرى كمل تمشية عشان تهضم الكشرى وعدى على أقرب واحد بتاع تين شوكى وخدلك حبة حلوين كده وبعدها على أقرب محل سميات يووووووووه قصدى شندوشتات وخدلك شندوشتين كبدة مسممين والمهم يكونوا مسممين فاااااااااهمين الكلام

وبعدها كمل تمشية وأنت برضة بتضحك وأديها واحد أيس كريم تانى برضة بالشيكولاتة وبعده غزل البنات وياسلام لو لاقيت حد فى طريقك عنده حرنكش ودوم خدهم وكمل تمشية وكل وما تنساش تاخد معاك شوية حرنكش ودوم تتسلى بيهم لما تروح

وبعدين أقعد على النيل أو البحر المتاح ليك ساعتها وبص لنفسك فى المية بس أوعى ترمى نفسك وأفضل أحكى أحكى أحكى كل اللى مضايقك لحد ما تطلع كل اللى جواك ومفيش مانع تاخدلك صورتين مع البحر ولا النيل للذكرى برضه ما يضرش

وبعدها بص للسما وأفرد إيديك وكأنك هتطير وخليك على نفس الضحكة

وبعدها بص فى موبايلك وشوف بقالك قد إيه مشاغل الحياة خليتك تنسى صحابك وقرايبك وكلمهم

أرجع بيتك وأنت مازلت متفائل وهمومك خرجت برة معاك وعيش حياتك صح وأنسى أى حاجة تزعلك أو تضايقك وحاول من وقت للتانى تعمل تجديد وتخرج وتتفسح

ولا تنسى عزيزى القارىء لو أصابتك ضربة شمس بسبب كثرة التمشية أو تسمم بسبب الأكل فأنا غير مسئولة عنك لا من قريب ولا من بعيد

فهذه الوصفات من خزعبلاتى الشخصية والى اللقاء فى الوصفات القادمة