مصلحتك أولا

قانون الحياة الجديد مصلحتك أولا وأنا ومن بعدى الطوفان واللى هيقف فى طريقى هدوسه ولا هيهمنى أى شىء

طبعا ده بقى قانون ناس كتيرة جدا دلوقتى اللى بيقول نفسى نفسى نفسى وبس ومش مهم أى حاجة بعد كده

وسبحان الله طلعت بعد 27 سنه فاهمة الدنيا غلط وكنت خير اللهم أجعله خير فاهمة أنى مش عشان مصلحتى أدوس على مصالح الناس ومش عشان نفسى أضايق الناس أو أجرح مشاعرهم وكان فعلا ممكن أجى على نفسى عشان الناس

بس تقريبا أكتشفت أنى بقالى 27 سنه مش فاهمة حاجة وكل يوم بصحى على الحقيقة اللى بتقول مصلحتك أولا وثانيا وثالثا وأنه لازم ما يكونش عندك لا عزيز ولا غالى دوس على الكل ولا يهمك هو حد واخد منها حاجة

وأكتشفت الحقيقة المرة أنى مثالية قوووووووووووى وأن للأسف ماليش مكان فى العالم ده لية بقى لأن اللى زيى الناس بتاخد منها وبعد كده تديها على دماغها

الناس بتستغلها وبعد كده ولا كأنهم يعرفوها

وبالتالى أنا ماليش مكان وسط العالم الشريرة دى اللى ما يهمهاش غير نفسها وبس

ولكن معرفش لية طول عمرى بحب نفسى زى ما هيا وبحب اللى الناس بتحبه فيا حتى لو كان فيه منهم حبوا فيا الشىء اللى فى صالحهم وبس وبأنهم يستغلونى مش أكتر

مش مشكلة برضة المهم أن برضة الناس حبت فيا حاجات ما بقتش موجودة كتيرة

ولكنى قررت قرار هااااااااااام

هااااااااام يعنى مش أى كلام

أنى برضة هفضل زى ما أنا ومش هتغير مع مراعاة أنى هختار الناس اللى تستاهل فعلا أن الواحد يتعامل معاها لأنى فعلا جبت آخرى من الأشياء الآخرى اللى ما يهمهاش غير مصلحتها

وأنى بصراحة بحب نفسى زى ما هيا كده بحبنى بطفوليتى بسذاجتى بطيبتى بعنفى بتمردى بعصبيتى بصراحتى برقتى وقسوتى بخجلى وجرأتى بكل حاجة وأى حاجة بحبها فيا والناس حبتها فيا ولأن مفيش حد ملاك طول الخط ولا حد شيطان طول الخط كلنا فينا الحلو والوحش بس المهم نعرف أزاى نتعامل مع الحلو ومع الوحش

وفعلا مصلحتك مش أولا