بتحبنى لا أشك مين دول اللى على الفيس بوك

بتحبنى لا أشك مين دول اللى على الفيس بوك لو ما شلتيش العيال دى عليك هسك

مش أبن هانم ولا أبن لورد أتفضلى هاتى الباسبورد ده أنا أراجوز متربى فى سيرك

مع بساطة كلمات الأغنية دى ومع أعجابى الشديد بيها ولأنى كتير بتعجبنى الحاجات الغريبة اللى بالشكل ده بس لو ركزنا شوية مع فكرة الكلام ده هنلاقية صح مليون فى المية وبتعبر عن تفكير فئة كبيرة قوى من الرجالة وكلمة فئة دى مش بس خاصة بالناس اللى مش متعلمة ولا تفكيرها على قدها لا دى خاصة بكل الناس وكل الفئات و العمال والمستقلين ما يضرش برضة

ولكن الحقيقة المرة بتقول أن فيه رجالة فعلا بتفكر بالطريقة دى ( دة أن ماكانوش كلهم خلوها فى سركم بقى )

والأغنية خلتنى أسرح بخيالى لبعيد قوى قوى يعنى بما أنى على طول مقضياها خيال ما هى الحقيقة ماتتعاش أساسا ما علينا

تخيلت مثلا أن حواليا ناس بيفكروا التفكير ده وأذ فجأة وأنا قاعدة على جهاز الكمبيوتر الاقى أخويا داخل عليا وعلامات الشر ظاهرة عليه وأول ما يشوفنى فاتحة الفيس بوك يقوم قالبلى حواجبة ويشدنى من شعرى

ويقولى هاتى الباس ورد بتاعك يا بت أنتى

وأنا أقول له باس ورد إيه بالظبط

يقولى باس ورد الفيس بوك طبعا

لية يعنى

أهو مزاجى أنا الراجل هنا وأنا كنج كونج وماعندناش بنتة تقعد على الفيس توك توك دة تانى وحتى لو قعدتى لا يونكن أسيبك كده لازم يكون معايا الباس ورد أشوفك بتهببى إيه وأطمن أنتى بتكلمى مين ويومك أسود لو لاقيتك ضايفة ولاد ( وساعتها عليكى هسك )

أقوم أنا بكل براءة ولاد ولاد مين دول هما شكلهم إيه الولاد دول

يقوم باصص بصة تانية على الجهاز ويقولى إيه دة وكمان عندك ياهو وهوت ميل ليلتك سودا هاتى الباس ورد بتاعهم وأستنى وسعى كده ويقوم حادفنى لأخر الأوضة ويبص على الميل

إيه ده يا هانم أنتى كمان عندك ولاد على الميل نهارك زى وشك ووش اللى على الميل دول

ومين دة اللى بيقولك أزيك يا جميل ويعرفك منين دة وعرف منين أنك جميلة

وشوية والموبايل بتاعى يرن ويقوم حادفنى حدفة تانية لأخر الأوضة من الناحية التانية ويقولى مين فين لية مين أبو جلامبو اللى بيتصل بيكى دة ويقوم رادد عليه

ويقولة نعم عايز مين

يقول لة ممكن أكلم بسمه

يقوم أخويا يقول له بسمه مين ياض أنت والله لأجى أشدك من قفاك وأعلمك الأدب

وبعدين يقوم مغنى ويقولى بتحبنى لا أشك مين دول اللى على الفيس بوك لو ما شلتيش العيال دى عليك هسك

وفجأة الاقى ماما بتصحينى من الغيبوبة اللى كنت فيها وتقولى هو أنتى هتفضلى مقضياها نوم كده ما تقومى تشوفى النت بتاعك ولا تكلمى صحابك ولا تعملى حاجة أنتى هجرتى النت والكمبيوتر بقالك يجى شهرين لية حصل إيه

وأفوق من الخيال العلمى اللى كنت فيه ده

وأقول لها مين فين ليه هو أنا فين

وأذ فجأة أفتكرت أن أخويا عندى على الفيس بوك والميلات هو وولاد خالتى وأبن خالى وأقوم جرى أفتح الميل علشان أكلم أخويا وأرخم على ولاد خالتى على الفيس توك توك

بس على فكرة أحداث الفيلم اللى حكيته دة بيحصل فى أماكن كتيرة جداااااااااااااااااااااااااااااااااااااااا ولما حبيت أتخيل نفسى عايشة مع حد بالأسلوب ده والتفكير ده جاتلى صدمة عصبية أفقدتنى النطق لمدة ثانية ونص وقلت أقوم أنام أحسن وقعدت أغنى وأقول

بتحبنى لا لا أشك مين دول اللى على الفيس توك لو ماخدتنيش لفة معاك هبيع التوك توك