عايزة أبقى شريرة ممكن

اه فعلا عايزة أبقى شريرة وأبطل طيبة وهبل بقى لأنهم ما بقوش ينفعوا فى الزمن ده

عايزة أبطل أفكر فى أى حد أيا كان الحد ده وما أفكرش غير فى نفسى وبس

مش عايزة أشيل هم حد ولا أفكر فى مشكلة فلانة ولا فلان وأركز فى نفسى وبس

عايزة أبطل أخبى همومى وأحزانى وأبان قدام الناس كويسة وبضحك ومفيش حد فعلا بيعرف اللى جوايا لو ماكنتش عايزة أقوله

بس هل ده ممكن يحصل والا اللى فيه طبع ما بيروحش

هو لية الناس بقت كده لا قرايب ولا صحاب ولا حد بقى همه عليك كله بيضرب فيك ومن قدامك ومن وراك

هو إيه أحساس الناس لما تتكلم عليك وتعمل ليك مليون مشكلة وتوقع بينك وبين الناس نفسى أعرف الأحساس ده لأنى عمرى ما جربتة للأسف

بس خلاص بقى أنا نفسى أبقى شريرة وما أفكرش فى حد ولا يهمنى أى حد ولا أبكى على حد

ومع أنى عارفة أن كل ده كلام وأنى مش هتغير وأنى هفضل طيبة وهبلة وأنى هاخد على دماغى طول ما أنا عايشة وأنى هلاقى طول الطريق ناس بتحاول توقع فيا وتوقع بينى وبين كل الناس

بس كل ده مفيش منه مشكلة المشكلة بقى فى اللى يصدق الكلام

يالا ما بقتش فارقة بقى ما أنا هبقى شريرة ولا هيهمنى