بكرة مسافرة وعندى حفلة وشفتى ورمت على غفلة

الواحد طول عمره بتحصل له مواقف غريبة عجيبة ولكن كله كوم وموقف الشفة ده كوم تانى

لا أبسلوتلى هخرج أنا أزاى كده

حاسة بأحساس اللمبى فى فيلم اللى بالى بالك لما عمل حادثة وصحى من النوم مش لاقى شفته

شفتوا كان مفزوع أزاى أنا تقريبا هيجيلى نقطة من الفزع

نمت فى أمان الله من كام يوم صحيت لاقيت شفتى فيها مجموعة حبوب ووارمة لوحدها كده

لا وكل يوم الورم بيزيد والحباية بتكبر وتنتشر

عااااااااااااااااا مش عارفة أكل ولا أشرب

وبغض النظر عن موضوع الأكل والشرب ده أنا بكرة مسافرة وعندى مناسبة وحاسة أنى هغنى أغنية

بكرة مسافرة وعندى حفلة وشفتى ورمت على غفلة

طيب والعيال اللى كانوا مستنين عمتو بسمه هيكون موقفهم إيه حاليا لما يشوفونى هيقولوا إيه يا ماما عفريت عفريت

ولا جيش التتار التانى اللى أنا مسافرة ليهم مخصوص علشان المناسبة ومستنين أبلة بسمه حاسة أنه هيغمن عليهم لما يشوفونى

والشفة واخدة موقف من كل حاجة بتتخانق مع الكوبايات والمعالق ولا كأن فيه بينهم تار طيب مش عارفة أشرب من الحنفية مباشرة الكوباية مالها تزقيها ليه يا شفة أنتى وتزعليها كده مضطهداها لية بس

والأكل بقى له طقوس مختلفة لازم أفتح بقى على الأخــــــــــــــــــــــــر وأرمى جواه الأكل وأجرى لأن الشفة هانم بتزق أى حاجة عايزة تدخل جوه بقى يعنى أصوم أنا ولا أعمل إيه شكلى بقى بشع وأنا باكل كأنى بفترس الأكل

لا وكله كوم وأنى المفروض أنتشر وأصور وأتصور لأنها مش أى مناسبة طيب والنبى هيبقى شكلى إيه فى الصور ولا لما أبعت الصور لأخواتى حاسة أنه هيحصل ليهم حاجة فعلا وبعدين ما ينفعش ما أتصورش فى المناسبة دى بالذات ولا ينفع أختفى وما أنتشرش

طيب أعمل إيه ينفع الاقى شفة تأجير مثلا لمدة يومين

وبعدين تحذير هاااااااااااام أياك حد يفكر يسلم عليا ويبوسنى البوس ممنوع أيوووووووووووووون مش ناقصة أنا بقى كفاية اللى أنا فيه السلام من بعيد لبعيد وبلاش حركات أمووووووووواه أموووووووووواه ووحشانى وخنقانى والكلام ده لأن عندى أحساس أن اللى جالى فى شفتى بسبب كمية الأموووووووووواه اللى أديتها مقابل الأموووووووووووهات الكتير اللى خدتها الأسبوع اللى فات

أنا هلغى الأموووووووووووووواه ده من قاموس حياتى ولقد أنذر من أعذر بقى فى أى بتنجان

لية يا شفتى كده ليييييييييييييييييييييييييية غدرتى بيا لية حرام عليكى عااااااااااااااااااااااااااااااااااااااااااا

كان بدرى عليكى عليكى بدرى وبقى شكلى عامل زى اللمبى

وبكرة مسافرة وعندى حفلة وشفتى ورمت على غفلة

وإيييييييييييييييييييييييييييييييييييييييييييييييييييه

كانت معكم ساسا أم خمسين شفة