هوس الشراء والرغى وأشياء آخرى

اللوك لوك والرغى

الشراء وأقتناء أى حاجة وكل حاجة من صميم صميم كل الناس وخاصة الستات والبنات أيون أيون مش علشان أنا بنت هنكر يعنى أن فيه بنات وستات عندهم هوس مش طبيعى بالشراء وما يشوفوش أى حاجة الا لما يجيبوها سواء محتاجين ليها ولا لا أهو مش هتخسر

وكله كوم والرغى بقى فى أى محل تدخله ودى بكام طيب دى بكام طيب ما تنفعش بكده وممكن بعد ما يسألوا عن مليون حاجة ما يكونوش هيشتروها أصلا ولكن الفضول ممكن يقتلهم لو ما عرفوش كل حاجة أمااااااااااال إيه الناس تقول عليهم مثلا ميعرفوش أسعار أى حاجة فى الدنيا لا يمكن أبداااااااا دى تبقى عيبة فى حقهم

وبعدين أزاى يدخلوا محل مثلا من غير شوية رغى ولوك لوك لوك ويجيبوا صداع لكل الموجودين

ويمكن لأن طبع اللوك لوك والرغى ده مش موجود عندى ومفيش حد يشوفنى الا لما يستغرب أزاى يعنى ده كل البنات والستات كده

يا شيخ قول كلام غير ده لية يعنى كل البنات والستات كده شىء غريب فعلا هو علشان فيه فئة كده يبقى كلهم كده شىء يغيظ فعلا

وبما أنى النهاردة خرجت أنا وماما نشترى شوية طلبات وتقريبا هيا هيا نفس الأماكن اللى بنجيب منها والناس وأصحاب المحلات دى حفظونا وبقينا زباين عندهم فبقوا حافظين طباعنا وخاصة أنا

ماليش فى اللوك لوك أنا ولا الرغى ولا التقليب فى المحل كله

ودخلت محل الطرح اللى بجيب منه على هدف معين والحاجة اللى عايزاها وبنفس نظرية الصمت الرهيب وأدور على الحاجة اللى عايزاها وماما تدور معايا وبنفس الصمت الرهيب ده أمسكها وأشوفها وبعدين أديها لصاحب المحل يعرفنا بقى ثمنها علشان نحاسب ونمشى وطبعا فى الوقت ده لازم يكون فيه مليون واحدة واقفين ينقوا ويشتروا وشغالين لوك لوك لوك لوك على الفاضى والمليان بطريقة فعلا تنرفز وتغيظ ومعرفش هما ما بيصدعوش ده أنا صدعت بجد منهم والراجل بتاع المحل كان هيشد شعره وبعد ما مشيوا لاقيتة بيبص ليا أنا وماما ومستغرب قوى ويقولى أنتى بتدخلى المحل من سكات وتدورى من سكات وتشوفى الحاجة من سكات وتخلصى وتمشى من سكات برضة وبنفس نظرة الأستغراب بصيت وقلت له وأنا هرغى لية وهعمل دوشة وصداع لية أنا ببقى جاية لهدف بخلصه وأمشى هفضل أتكلم وأصدع نفسى والناس وأقلب المحل كله لية

ومرة قبل كده بيقول لماما هيا ما بتتكلمش خالص

كنت هقوله أيوة اصلى خرسة نيييييييييييياها

بس تقريبا الراجل مازال متوجس خيفة منى مش مصدق أن فيه واحدة ما بتتكلمش كده

جاتكوا نيلة طلعتوا علينا سمعة زفت قال أبقى رغاية قااااااااال لية يعنى

هوس الأكسسوارات والساعات

بما أنى تقريبا زى ما بيقولوا بنت وزى ما أنتوا عارفين يعنى

بس ما بحبش البهرجة والأكسسوارات الكتيرة عمال على بطال بحب الحاجات البسيطة قوى وأذ فجأة طلع فى دماغى أشترى حاجات بسيطة من دى كده وعادى جدا توجهت للمكان المخصص والحمدلله وصلت لهدفى بسرعة ولكن وبغض النظر عن أن الخاتم اللى أشتريتة واللى طلع ثمنه أكتر من الساعة وشوية الحاجات التانية بس فعلا أنا بستغرب من كمية الأكسسوارات والهوس بتاع الناس وخاصة البنات فيه

يعنى معلش ممكن حد يفهمنى لية كل طقم يكون له ساعة مخصوصة ونفس لون الطقم بصراحة أنا بعتبر ده أسراف أيوة أسراف وبغض النظر البنت دى معاها فلوس ولا لا حرام ولا حلال كل طقم يبقى معاه ساعة نفس لونه يعنى لو واحدة عندها 10 أطقم يبقى عندها 10 ساعات ولازم الجزمة والشنطة نفس اللون وكمان الخمسين طرحة اللى على دماغها واللى معرفش لحد دلوقتى بتستحملهم أزاى فيهم نفس الألوان والوان قوس قزح كلها فى الطرح وتبقى عاملة زى الطاووس

ولازم كمان الدبوس اللى فى الأسكارف اللى تحت الطرحة اللى مش هيبان أصلا يكون نفس اللون والشراب اللى مش هيبان من البوت ولا الجزمة نفس اللون

هو مش ده أسراف برضة ولا أنا بيتهيألى

هو مفيش مشكلة من أن أى واحدة عايزة تبقى شيك وجميلة ولكن هو الشياكة لازم تبقى بالأسراف ؟؟

هيا الشياكة مش هتكمل لو عندك بس ساعة ولا ساعتين وشكلهم فعلا كويس وشيك وبتلبسيهم دايما

هيا الشياكة بالمليون سلسلة والخمستلاف خاتم والستين أسورة اللى منطورين فى كل حته فيكى ده ناقص تجيبوا حدوة حصان تلبسوها كمان علشان تبقى كملت

وفى النهاية تشتكوا لما الرجالة يقولوا أن الستات والبنات مسرفين أيوة فيه فئة فيهم مسرفة ومسرفة جدا كمااااااااااان

وسبحان الله البلد كلها بقت محلات أكسسوارات وملابس وبرفانات وأيشاربات وجزم وشنط ودباديب لأن دى أكتر حاجات الناس بتشتريها وبتصرف فيها أكتر ما بتصرفه فى أكلها وشربها

عروستى

لحد دلوقتى بحب قوى العرايس اللعبة والدباديب وبموت فيهم بشكل غير طبيعى عاملة زى العيال الصغيرة بالظبط وبفرح زيهم لما حد يجيبلى دبدوب ولا عروسة لعبة وممكن بفرح أكتر منهم كمان مش عااااااااااارفة يمكن لأن جوايا طفلة صغيرة مش عايزة تكبر ونفسها تفضل صغيرة

وأذ أن أخواتى اللى كانوا بيهادونى بالحاجات دى ويعاملونى معاملة الأطفال أوقات كتيرة ويدلعونى مش موجودين وبقى الدلع من بعيد لبعيد فصعبت على ماما ولاقيتها جابتلى عروسة المولد نيييييييييييييياها

وخالتى اللى هيا أمى الثانية ومربيانى جابتلى فى عيد الحب دبدوب

والله العيلة دى زى العسل

وبما أن البيت ما فيهوش مكان أحط فيه حاجة وأخويا الصغير من سنة ونص جابلى دبدوب قدى تقريبا ومصيرة مع مصير الدبدوب بتاع خالتى جوه الدولاب

بس نفسى فى حاجة تانية سيبكم من الدباديب دى عايزة عروسة ويكون شعرها طويل وأفضل أنيم وأصحى فيها وأسرح لها شعرها والعب بيها مع سما بنت خالى

وللعلم سما دى عندها سنتين وبنفضل نلعب باللعب مع بعض ولما تحب تغيظنى أو تضايقنى ما تنطقش أسمى وأفضل أنطق قدامها أسماء كل الناس وتقولهم ورايا وأول ما أقول لها أسمى تقولى لا أقول لها بسمه ودى تقولى لا وتضحك يابنتى قولى بسمه ودى تقولى لا

والمهم أنها عارفة أنها بتغيظنى نييييييييييياها عسولة وأروبة تقريبا طالعة ليا

بس برضة هشترى العروسة اللى نفسى فيها لما الاقيها بس

ويالا كفاية رغى كده أحسن يطلع عليا سمعة أنى رغاية ولا حاجة