بسم الله الرحمن الرحيم قل أعوذ برب الفلق من شر ما خلق ومن شر غاسق أذا وقب ومن شر النفاثات فى العقد ومن شر حاسدا أذا حسد صدق الله العظيم

Tuesday, June 30, 2009

أستفتاء هااااااااااااااااااااااااااااام

عندى شوية أسئلة للرجالة والستات للبنات والشباب وعايزة رأيكم بصراحة


بداية هسأل البنات والستات


أنتوا شايفين أننا لسة عايشين فى مجتمع ذكورى فى كل شىء وأى شىء ؟

أنتوا شايفين أنه لسة فيه رجالة كتيرة بتسيطر على البنات سواء كانوا أخواتهم أو بناتهم أو مراتهم أو أيا كانت العلاقة وبيعملوا ليهم أرهاب ؟

أنتوا شايفين أنه لسة فيه بنات مش عارفة تتعلم الحاجة اللى هيا عايزاها ومش عارفة تحقق آحلامها وطموحها وده مش علشان اللى هيا عايزة تدرسه أو اللى بتحلم بيه غلط أو عيب أو حرام ولكن لأنها بنت ومش لازم تدرس حاجات معينة أى حاجة وخلاص ومش لازم تحقق آحلامها ولا طموحها يعنى هتعمل إيه فى الآخر ؟

أنتوا شايفين أنه لسة فيه بنات بتتجوز غصب عنها ؟

أنتوا شايفين أنه لسة فيه بنات بتتهان وبتنضرب بسبب أنها بنت وزى ما بيتقال أكسر للبنت ضلع يطلع لها مش عارفة كام ؟

أنتوا شايفين أنه لسة فيه بنات ممنوعة من أنها تقول رأيها فى أى حاجة علشان هيا بنت ؟

أنتوا شايفين أنه لسة فيه بنات وستات خطيبها أو جوزها بيعاملها بقسوة وجفاء وما بيقولش كلمة حلوة ولا بيظهر مشاعره لأنه حاسس أن ده ضعف وأنها هيا المفروض تظهر مشاعرها وتعبر عنها وتقول كلام حلو كمان ؟

أنتوا شايفين الشباب والرجالة أزاى وإيه مفهوم الراجل عندكم ؟

نيجى بقى للشباب والرجالة


أنتوا شايفين أن البنات والستات خلاص خدوا حقهم ومش ناقصهم حاجة ؟

أنتوا شايفين أنكم بتعاملوا أى بنت تعرفوها سواء كانت أختك أو بنتك أو مراتك أو خطيبتك كويس وبما يرضى الله ومش بتتنطط عليها ولا تحاول تثبت نفسك عليها وتلغى شخصيتها وكرامتها علشان تحس أنك راجل ؟

أنتوا شايفين أنكم لما بتلاقوا أختكم أو مراتكم أو بنتكم عندها طموح أو آحلام فى حاجة معينة أنها صح أنها تحققها وتحاول فيها طالما هيا مش مقصره معاكم فى حاجة وبتقفوا جمبها وتشجعوها ولا لا ؟

أنتوا شايفين البنات والستات أزاى وإيه مفهوم البنت والست عندكم وأزاى تقول أن دى فعلا ست ولا كل الستات ؟

أنتوا شايفين أنه غلط أن الواحد يقول كلام حلو لخطيبتة أو مراته ويبين لها مشاعره ولية ؟

أنتوا شايفين أن الست أو البنت لازم تتعامل أزاى بالضرب والشتيمة ولا بالمعاملة الكويسة ؟
ودى كانت أول دفعة من الأستفتاء وأنتظروا الدفعة التانية
وفيه تصويت على اليمين فى المدونة ياريت تحطوا صوتكم كمان

Sunday, June 28, 2009

نسكافية وشيكولاتة وشيبسى

بعد كلامى عن فنجان القهوة وعن أحلامى معه ظهرت أحلام آخرى مع أشياء آخرى أحبها منها على سبيل المثال كوب النسكافية الذى أعشقة وأشربة عادة بلاك لأنى لا أحب اللبن ولكنى وجدت نوع جديد من النسكافية يكون بالمبيض وله مذاق حلو جداااااااااااااااااا فبدلت البلاك به وأصبحت أشربه كثيرا وكنت مشهورة بهذا المشروب عندما كنت أعمل فى مدرسة فالبديهى فى أى مكان عمل أن الناس تشرب شاى أو قهوة ولكنى كنت غيرهم كنت أحضر معى النسكافية وأشربه هناك وأصبح العديد من الزملاء يشربوه معى وكنت معروفة بهذا المشروب وكان من المضحك جدا بسبب هذا النسكافية أن بعض الزملاء أعتقدوا أنى اشرب شاى بلبن وظلوا لفترة يتخيلون هذا وكنت أضحك من كلامهم وتعليقاتهم الى أن عرفوا الحقيقة
أعشق النسكافية وأعشق رائحتة وعندما أمسك بالكوب وأشربه أسرح بخيالى فى أشياء كثيرة وأحلم كثيرا
ومن النسكافية الى الشيكولاتة التى أعشقها وعشقى لها ليس له حدود فعندما أمسك بقطعة الشيكولاتة وأضعها فى فمى وأتركها حتى تذوب أذهب الى عالم آخر من الأحلام وكثيرا ما أغمض عينى وأنا أكلها وأعيش مع أحلامى الكثيرة
ومن النسكافية والشيكولاتة أنتقل الى الشيبسى الذى أعشقة أيضا بطريقة لا يتخيلها أحد فكثيرا أنتظر أمى وهيا عائدة من عملها ومعها كيس الشيبسى الذى أمسكة لألتهمه وكأنى طفلة صغيرة تنتظر قدوم والدتها بشدة محملة بالحلوى الجميلة
قطع من البطاطس المحمرة سواء كانت مصنوعة فى المنزل أو أشتريها جاهزة وبعدها قطعة شيكولاتة وكوب نسكافية يجعلانى فى حالة غريبة من السعادة لا يتخيلها أحد وأترك نفسى لآحلامى مع كل هذه الأشياء
وهل يأتى اليوم ولا يسخر منى شريك حياتى بسبب حبى لهذه الأشياء وهل سيكون مشترك معى فى حبهم أم أكون فى نظرة طفلة صغيرة تحب أشياء يحبها الأطفال
وهل سوف يشاركنى أحلامى أم يحبطنى ويجعلنى أعود للخلف
هل سيعود هو الآخر من عمله ومعه قطع الشيكولاتة والشيبسى مثلما تفعل أمى معى أم أنه سيعود محمل بأكياس الخضار والفاكهة وينسى تماما ما أريده فأنا من الممكن أن أقضى يومى على الشيبسى والشيكولاتة والنسكافية ولا يهمنى أى طعام آخر
أعتقد أنه سوف يعود بدون أى شىء لا بأكياس الخضار والفاكهة ولا بالشيكولاتة والشيبسى وسوف يترك لى مهمة التجول فى الأسواق وشراء هذه الأشياء وبالفعل هذا الشىء ثقيل على قلبى جدا لأنى لا أجيد فنون الشراء ولا تنقية الخضار والفاكهة مثل باقى البشر ولم أتعود حقيقة على شراء شىء من هذه الأشياء ولا أتخيل نفسى مثلا وأنا أقف أمام بائع الطماطم لأشترى منه كيلو طماطم وأمد يداى لتنقيتها أو أتركه ليعطينى الطماطم الغير صالحة للأستعمال
ولكن الآن ليس هذا موضوعنا و على أيه حال سأظل أستمتع بكل ما أستمتع به ولم أشغل بالى كثيرا بهذه الأشياء وبهذا الفارس ولكنها أحلام يجب أن أحلمها مع أشياء كثيرة أحلم بها خاصة بعملى وطموحى وحياتى
ومثلما تقول أمى بأنى طفلة وأحب أشياء يحبها الأطفال وتمزح معى وتقول لى هل سوف تنتظرى زوجك فى المستقبل ليعود ومعه كيس الشيبسى والشيكولاتة مثلما تفعلين معى فلا أجد أجابة مناسبة لسؤالها وأصمت ونغير الحديث ونتكلم فى أى شىء آخر

Thursday, June 25, 2009

النظرات البلهاء




تعودت منذ فترة طويلة على الجلوس بمفردها وعدم الخروج الا للضرورة وخصوصا فى الزيارات أو الأحتفالات العائلية حتى تتخلص من تلك النظرات البلهاء من كل من هم حولها وسؤالهم عن تغير حالها وشكلها ودعائهم لها بأن يرزقها الله بالزوج سواء كان صالح أو طالح فهذا ليس مهم عندهم ولكن أهم شىء أن تتخلص من لقب عانس الذى أصبحوا يصفونها به منذ سنين وتكفى نظراتهم التى تدل على كل ما يدور فى عقلهم
ولكنها ملت من الوحدة وبدأت تخرج وتذهب هنا وهناك وتعمل وأصبحت على وشك لمخاصمة الوحدة نهائيا الى أن جاء لها ولأسرتها دعوة لحضور حفل زفاف قريب لها فرحت كثيرا لأنها تريد أن تسافر وتغير جو وأن ترى جميع أفراد عائلتها وتعود الى سابق عهدها فى الوجود وسط العائلة والحديث الطويل معهم وطوال الطريق وهى سعيدة جدا وعندما وصلت ورأت الناس شعرت بشىء غريب بداخلها وأحست أن هؤلاء ليسوا من كانت تجلس معهم وتتكلم وتسهر ليالى
وجدت نظرات شفقة وحسرة على حالها وبأنها تعدت الخامسة والعشرون من عمرها ولم تتزوج فهى فى عرفهم أصبحت عانس مليون مرة
حاولت أن تتجنب وتتجاهل هذه النظرات وأن تسد أذنها عن سماع كلمة ( عقبالك ) التى تقال لها مليون مرة من نفس الشخص فى خلال وجودها
رأت بنات عمها وبنات آخريات من العائلة يتحدثون ويمرحون ذهبت لتقف معهم وتمزح ولكنها شعرت بأنها غريبة جدا فالفرق بين عمرها وعمر أكبر واحدة منهم 6 سنوات والباقيين أصغر من هذا بكثير شعرت بأنهم مازالوا صغار جدا وبداخلهم مرح وسعادة وبأنهم مازالوا فى مرحلة الجامعة وبداخلهم حيوية ونشاط لم تعد توجد بداخلها ولكنها كانت تحاول أن تتغاضى عن كل هذا فهى تحبهم كثيرا وهم أيضا ويحبون حديثها ولكن الذى جعلها تغضب نظرات سيدات العائلة والتى رأتها وعلمت بما يدور بداخلهم فكلهم يتحسرون على حالها وبأنه يوجد فرق كبير فى السن بينها وبينهم وهم على وشك الأرتباط وهى مازالت كما هى وبسبب تلك النظرات تركت البنات وذهبت لتجلس مع والدتها وخالاتها وهى غاضبة من تلك النظرات البلهاء وعدم فهم الناس لأى شىء ولا أحساسهم بأن نظراتهم وهمساتهم وكلامهم يجرحها جدا ولكن لا حياه لمن تنادى فهى كانت سعيدة بسبب دعوة حفل الزفاف وبأنها سوف تلتقى بكل أفراد العائلة ولكن ما حدث جعلها غاضبة جدا
بالأضافة الى وجود عدد من السيدات لا يعرفونها وكل حين وآخر يقتربون منها لمعرفة ما أذا كانت مخطوبة أم لا حتى يرشحون لها عريس مناسب وأزداد غضبها بسبب هذه التصرفات لدرجة أنها قلبت الخاتم الموجود فى يدها اليمنى ليصبح شكل الدبلة حتى يتوقع الموجودين بأنها مخطوبة ولا يتطفلون أكثر من هذا
عادت الى منزلها ولسان حالها يقول يا ليتنى ما كنت خرجت ولا ذهبت الى هذا الحفل فلا يوجد أحد يفهمنى ولا يعرفنى جيدا وحتى الفتيات الصغيرات التى كنت أقف معهم عقلهم ليس مثل عقلى ولكننى كنت أريد أن أمزح معهم كى أستعيد مرح الفتاه ولكن بسبب نظرات سيدات العائلة تركتهم وعادت حزينة وقالت لوالدتها لماذا يحدث كل هذا ولماذا كل هذا التطفل المبالغ فيه ولماذا لم أمنع هؤلاء المتطفلين بأى طريقة
ولكنها الآن أصبحت أقوى من السابق فى مواجهة هذا التطفل وهذه النظرات البلهاء ولم تترك نفسها فريسة لكلام ونظرات هؤلاء البشر ولم ترتبط الا عندما تجد الشخص المناسب لها مرددة عبارة ( قعدة الخزانة ولا جوازة الندامة ) فهى لا تريد أن ترتبط بأى شخص لكى تتخلص من النظرات والهمسات والتطفل الغريب ولكنها مازالت تبحث عن نصفها الثانى ولم ترتبط بأى شخص لتندم بعد ذلك

---------------------------------------------------------------
وبعد هذه القصة أود أن أقول شىء مهم جدا أن كل ما حدث لهذه الفتاه يحدث مع ملايين الفتيات وللأسف المجتمع والناس والأقارب والأصدقاء لا يرحمون أبدا أى بنت من نظراتهم وهمساتهم وتطفلهم المبالغ فيه
أرحموا البنات والفتيات وكفى تدخل فى حياتهم
أرحموا من فى الأرض يرحمكم من فى السماء

Monday, June 22, 2009

السعادة والناس



لية دايما لما نحس أننا فرحانين ونشعر بشوية سعادة لازم نخاف ونقول خير اللهم أجعله خير ونفضل حاطين أيدينا على

قلبنا وخايفين لتحصل كارثة أو مصيبة كمان شوية وكأن السعادة شىء وحش ولا لازم يحصل بعدها كارثة

لية نضيع لحظات السعادة اللى فى عمرنا بسبب أننا فى الوقت ده بنفضل نفكر ياترى هيحصل لنا أيه وحش وياترى هو ده الهدوء اللى بيسبق العاصفة والعاصفة هتقلب المركب وأحنا راكبينه وكل حاجة هتتقلب

مش عارفة بجد فيه إيه ولية تفكيرنا كده ولية ما نعيش لحظات السعادة ونبطل بؤس وأكتئاب بقى دى اللحظة اللى بتعدى من عمرنا ما بترجعش تانى

ونرجع نعيط لما تحصل لنا مشكلة أو حاجة تضايقنا ونقول ياااااااه أنا لية ما فرحتش لما كان فيه حاجة مفرحانى وفضلت أفكر فى اللى جاى وقلقان وخايف أفرح

بصراحة الواحد أكتشف أننا شعب نكدى من الدرجة الأولى
بنخاف نفرح لا ما نعرفش نحزن

بنخاف نضحك لا ما نعرفش نعيط

بنخاف نبتسم لا مانعرفش نكشر تانى

ياعالم حرام عليكوا نفسكوا أفرحوا بقى شوية كفاية كل المشاكل والهموم اللى الناس فيها مش لازم كمان لما تيجى حاجة تفرحنا نزعل

ولا الظاهر دى ثقافة النكد بتاعتنا

أفرحوا بقى أبوس ايديكم

وبطلوا نكد شوية وعيشوا لحظات السعادة اللى فى حياتكم

وبطلوا تنكدوا على نفسكم بدون سبب وبطلوا تخافوا تضحكوا لا ما تعرفوش تعيطوا تانى ما تقلقوش والله هتعرفوا تعيطوا وتصرخوا وتشدوا فى شعركم كمان


Saturday, June 20, 2009

أول تحقيق ليا فى مجلة أنباء ميت غمر

القصر المهجور

بسمه عبدالباسط


منذ الزيارة الأولى لهذا المكان تظن أنه قصر مهجور أو بيت تركه أصحابه منذ زمن طويل أو أنه بقايا منزل محطم ولكن الحقيقة غير ذلك فبعد التدقيق فى هذا المكان فسوف تجد أنه قصر ثقافة نعمان عاشور فهو تابع لوزارة الثقافة وتحت أشراف الهيئة العامة لقصور الثقافة ولكن فى الحقيقة شكله لا يرقى لأن يكون قصر ثقافة ولا يدل على هذا فالمكان عبارة عن عنوان للقصر وبعد ذلك مكان صغير به بعض الخضرة ولكن ماذا بعد ذلك
بعد ذلك مبنى قديم جدا وبه عدد من الغرف بها أبواب وشبابيك محطمة وشكل المبنى ككل لا يرقى لأن يكون قصر ثقافة وسوف ترون ما أتحدث عنه من خلال الصور فى البداية قبل أن تعلم أن هذا قصر ثقافة لم يشغل بالك ما هذا المكان فمن الممكن أن يكون قصر مهجور تركه أصحابه وتسكنه الأشباح ولكن بعد ذلك سوف تعرف أنه قصر ثقافة ولكن تعالوا نعرف فى البداية من هو نعمان عاشور



فقد ولد يوم 27 يناير عام 1918 مدينة ميت غمر
حاصل على ليسانس الآداب قسم اللغة الأنجليزية وعمل محررا بدار أخبار اليوم وكان عضوا فى لجنتى القصة والمسرح بالمجلس الأعلى لرعاية الفنون والآداب والعلوم الاجتماعيةله العديد من المؤلفات من مسرحيات ومجموعات قصصية وسيرة ذاتية

فمن المسرحيات المغماطيس ، الناس اللى تحت، الناس اللى فـوق ، سيما أونطه ، صنف الحــريم ، عيلـة الدوغــرى ، عطوة أفندى قطاع عام ، وابـــور الطحـــين ، ثلاث ليـــالــــى ، بـــــلاد بــــــــرة ، الجـــيل الطالـــع ، ســــر الكــــــون ، يا حلم يا مصـــر ، بشـــير التقــــــدم ، بــرج المـــــــدابغ

ومن مجموعاته القصصية حواديت عم فــــرح ، فوانيــــــس ، سباق مع الصــاروخ ، بطولات مصــرية

وله سيرة ذاتية وهى المســـرح حـيـاتى

وقد حصل على جائزة الدولة التشجيعية فى الآداب من المجلس الأعلى لرعاية الفنون والآداب والعلوم الاجتماعية ، عام 1968

هل أنسان بهذا القدر لا يستحق أنه يكون له قصر ثقافة مثل باقى القصور فى كل مصر
وبغض النظر عن الشخص هل وزارة الثقافة تعلم بحال هذا القصر وبشكله وما هو الحال فيه هل مدينة ميت غمر لا تستحق أن يكون بها قصر ثقافة محترم ويليق بها كمدينة كبيرة



وعندى عدة أسئلة مهمة جدا هل هذا القصر يعمل مثل باقى القصور وله نشاط أم أنه صورة فقط ولو كان له نشاط أين هى هذه النشاطات وأين تقام فى هذا المكان المهجور الذى يشبه بقايا المبانى التى حطمها زلزال 1992
فنحن نناشد وزير الثقافة ووزارة الثقافة والهيئة العامة لقصور الثقافة بأن تقوم بزيارة سريعة لهذا القصر وتراه على حقيقتة وتقوم بعمل اللازم لجعل قصر ثقافة نعمان عاشور مثل باقى القصور فى كل الجمهورية فمن حق سكان مدينة ميت غمر وكل الموجودين بها وجود قصر ثقافة راقى ويقام به العديد من الأنشطة لا يكون مجرد صورة فقط

Friday, June 19, 2009

أقوال بوسبوس

فى حركة مجنونة منى وبما أنى مش لاقية حاجة أكتبها أو يمكن من كتر الأفكار اللى عندى مش عارفة أكتب إيه لاقيت نفسى عمال أقلب فى البروفايل بتاعى على الفيس بوك وأشوف الأستاتيوس اللى كتبتها من أمبارح لحد مده طويلة وفضلت أجمع فيهم وأكيد لسة ما خلصتش بس جاتلى فكرة أنى أجمعهم وأنزلهم هنا
والترتيب الزمنى بتاعهم من أخر أستاتيوس نزلته أمبارح واللى قبله واللى قبله وهكذا


أحيانا يكون الصمت أبلغ من الكلام ولكن فى الحب الصمت يضيع كل شىء وأى شىء أمامه لو ظل المحب محتفظ بحبه داخله وفضل الصمت على الكلام

عندما تجد نفسك أقتربت من تحقيق حلمك أياك والخضوع للكسل وعدم متابعة ما قمت به لأنك فى حاجة الى الوقت والمجهود حتى تستطيع أستكمال ما قمت ببناؤة

مشيت كتير وقليل وعديت على كورنيش النيل بدور على حلم وفرحة تايهين وطموح وحاجات جايين وحزن بيحاول يقهرنى من سنين ولكنه مش قادر على فرحه السنين

التقل صنعة صحيح ) ولكن لا يجب عليك أن تزيد فيه لأنك بهذا تجرح حواء جداااااااااااااااااا ويا عزيزى آدم عندما تأتى لك حواء وتعبر لك عن أسفها عن أى شىء فأقبلة ولا تتركها تحايل فيك كثيرا لأنك عندما تفعل نفس الشىء معها تسامحك مباشرة وحتى لو كانت لا تفعل هذا فمشاعر حواء أرق بكثير من الرجل ولا تتحمل هذا ( التقل ) لأن رقتها تغلبها دائما وتصرفك يجرح كبريائها وكرامتها
كن لين عزيزى آدم

التطور الطبيعى للتفكير المتواصل ولعمل العقل دائما عدم النوم والأرق دائما والنوم ساعات قليلة جدا / والتطور الطبيعى لعدم نومى من أمبارح للنهاردة غير ساعتين بالظبط صدااااااااع ودوخة وزغللة وعدم تركيز وبرضة عقلى مش عايز يبطل / حد عنده وصفه أوقف بيها عقلى عن التفكير لمدة كام ساعة أنام فيهم كل يوم

شعور بالدهشة ممزوج بالحيرة والرهبه والخوف والسعادة والأمل والحلم والصدمة والأنتظار والمفاجأة وفى النهاية ممزوج باللاشىء وأى شىء

ومازلت منتظرة وأصبح الأنتظار صديقى فهل سوف أصل لنهاية هذا الأنتظار أم أننى سأظل منتظرة طوال عمرى ؟؟

تمر اللحظات والثوانى والدقائق والساعات والأيام والليالى والشهور والسنين ويمر العمر وأنا مازلت أنتظر فهل سأظل منتظرة كثيرا ؟؟ مللت من الأنتظار وليس أمامى أختيار آخر

المرأة كالزهرة من السهل جدا الحفاظ عليها وعلى جمالها وروحها الجميلة ووفائها وغيرها من الصفات الرائعة أذا حرصت على أعطائها الحب والحنان والأهتمام والصراحة والصداقة والمشاركة والثقة ومن السهل جدا جعلها تذبل أذا أهملتها ،، فلا تنتظر من المرأة أن تعبر هى عن مشاعرها طالما أنت لما تبدأ بهذا فمن الطبيعى أن أى زهرة تنتظر من يرويها وليس هى من تروى الآخرين

أعشق دائما تمرد المرأة على الرجل الذى لا يستحقها وأعشق دائما كبريائها وحيائها وأخلاقها الذى يميزها دائما فحياء المرأة وأخلاقها وكبريائها ومرحها وروحها الحلوة وشخصيتها الطيبة الحنونة والقوية وكرامتها هم رأس مالها الحقيقى وجمالها الباقى دائما .... فالسيرة العطرة لها دائما هو ما يميزها ويجعلها ملكة متوجه والكثير والكثير من الاشياء التى لا يتسع الوقت لذكرها حاليا

ليتنى أعود مثل السابق أبكى وقتما أريد وأضحك وقتما أريد ولأن البكا كان أكثر شىء يريحنى والآن أصبح يعاندنى بكثرة وأظل أحايل فى عيناى لتبكى ولو دمعة واحدة لأستريح ولكن لا حياه لمن تنادى


كثيرا ما يكون المرض والآلم سببا فى الأبداع

Thursday, June 18, 2009

إغضب



إغضبْ كما تشاءُ
..واجرحْ أحاسيسي كما تشاءُ
حطّم أواني الزّهرِ والمرايا
هدّدْ بحبِّ امرأةٍ سوايا
..فكلُّ ما تفعلهُ سواءُ
..كلُّ ما تقولهُ سواءُ
..فأنتَ كالأطفالِ يا حبيبي
نحبّهمْ.. مهما لنا أساؤوا
..إغضبْ
فأنتَ رائعٌ حقاً متى تثور
ُإغضب
فلولا الموجُ ما تكوَّنت بحورُ
..كنْ عاصفاً.. كُنْ ممطراً
..فإنَّ قلبي دائماً غفور
ُإغضب
فلنْ أجيبَ بالتحدّي
فأنتَ طفلٌ عابثٌ
..يملؤهُ الغرورُ
..وكيفَ من صغارها
..تنتقمُ الطيورُ
إذهب
..إذا يوماً مللتَ منّي
..واتهمِ الأقدارَ واتّهمني
..أما أنا فإني
..سأكتفي بدمعي وحزني
..فالصمتُ كبرياءُوالحزنُ كبرياء
ُإذهبْ
..إذا أتعبك البقاءُ
..فالأرضُ فيها العطرُ والنساءُ
..وعندما تحتاجُ كالطفلِ إلى حناني
..فعُدْ إلى قلبي متى تشاءُ
..فأنتَ في حياتيَ الهواءُ
..وأنتَ
.. عندي الأرضُ والسماءُ
..إغضبْ كما تشاءُ
واذهبْ كما تشاءُ
واذهبْ.. متى تشاءُ
لا بدَّ أن تعودَ ذاتَ يومٍ
وقد عرفتَ ما هوَ الوفاءُ
نزار قبانى

Tuesday, June 16, 2009

أول عدد وأمل جديد



النهاردة نزل العدد الأول من مجلة أنباء ميت غمر الخاص بأخبار مدينة ميت غمر والقرى المجاورة

ده العدد التجريبى وهيكون موجود عند كل الباعة فى ميت غمر والقرى المجاورة

بصراحة أنا فوجئت بالمجلة وفرحت جدا بيها وبالمواضيع الجميلة اللى فيها ومع أنها أول عدد وفيه شوية غلطات أو أخطاء بسيطة ولكن المجهود والروح اللى فيها هايل جدا

وكمان المواضيع والأفكار تجنن

وبالنسبة لأول عدد فده نجاح يحسب لنا أكيد

فعلا مبسوطة جدااااااااااااااا جداااااااااااااااااااااا أن المجلة طلعت للنور وبقى لينا صوت وبتمنى قريب المجلة توصل لمحافظات تانية علشان كلكم تتابعوها ولحد ما ده يحصل هرفع ليكم مواضيع من المجلة هنا علشان تتابعوا شغلنا ويارب يعجبكم


بجد أنا سعيدة جدا جدا وده كان بداية أمل وحلم جديد ويارب يكمل على خير وتحقق النجاح المطلوب وهدفنا منها

Monday, June 15, 2009

حوار صريح جدااااااااااااااااااا

الكاتب الجميل محمد التهامى عمل معايا حوار وبصراحة الحوار كان صريح جدااااااااااااا لأبعد حد وطلعت اللى جوايا بطريقة مش طبيعية وفعلا بشكر محمد لأنه موهوب جدااااااااااااا وبيقدر بسهولة يطلع اللى جواك من خلال أسئلة بسيطة جداااااااااا


هيا بنا الى الحوار وكان بعنوان

هو صحيح أنا عايزة إيه
:)))
بتمنى الحوار يعجبكم

Thursday, June 11, 2009

مشيت كتير وقليل وعديت على كورنيش النيل

مشيت كتير وقليل وعديت على كورنيش النيل دول ناس قاعدة تحب كتير وياريتهم فاهمين لو كانوا عارفين أن الحب مش كده وبأنه مش شوية فسح على مسكه أيد من ورا الأهل ولو كانوا حبوا بجد ماكانوش عملوا كده
ولية مسكة الأيد فى الحرام وفى الضلمة هو ما ينفعش تبقى فى الحلال

ومشيت كتير وقليل وعديت على كورنيش النيل دول ناس قاعدة ومعاها ولادها بتفسحها ولكن من جواهم زعلانين ومفيش أتنين منهم ماسكين أيد بعض مع أنها حلال لو عملوها ولكن الهم أكبر منهم بكتير

ومشيت كتير وقليل وعديت على كورنيش النيل دول شوية بنات جايين يضحكوا ويتفسحوا ولكنهم مش فاهمين أنهم لو مشيوا بطريقة أحسن وصوتهم بقى أوطى وبطلوا مرقعة وضحك عمال على بطال هتكون الفسحة أحلى بكتير

ومشيت كتير وقليل وعديت على كورنيش النيل دول شوية ولاد جايين يتمشوا ويشربوا حاجات وحاجات ويعاكسوا فى دى ودى وفاكرين أنهم كده صح وعايشين مع أنهم لو بصوا جواهم شوية هيلاقوا جبال حزن وهم على حياتهم الضايعة

ومشيت كتير وقليل وعديت على كورنيش النيل دى واحدة قعدة لوحدها بتتأمل فى النيل والشمس وعمالة تصور فيهم هيا مش مستنية واحد يجى يقابلها ولا يعرفها من ورا أهلها هيا قاعدة بتشم هوا وبس وبتستمتع بالمنظر الطبيعى اللى قدامها بس ياريت الناس فاهمين

ومشيت كتير وقليل وعديت على كورنيش النيل ده واحد قاعد شايل الهم يا عينى لا لاقى شغل ولا عارف يصرف على نفسه والعمر عمال يجرى ونفسه يفتح بيت ويتجوز ولكن لا حياه لمن تنادى

ومشيت كتير وقليل وعديت على كورنيش النيل دول شوية أطفال جايين يجروا ويتنططوا وفرحانين وياريتهم يفضلوا أطفال أحسن لهم بكتير

ومشيت كتير وقليل وعديت على كورنيش النيل ولاقيت دموع وأفراح وأحزان وأبتسامات ودوشة كبيرة ومراكب رايحة وجاية وناس بتجرى على رزقها وناس واقفة تتفرج وناس واقفة تتسلى وناس عمالة تتكلم على دى وعلى ده وناس مش فاهمة حاجة ولا عارفة حاجة ومن الهم ساكتين

ومشيت كتير وقليل وعديت على كورنيش النيل ده واحد ومعاه بنته وبعد ماكلت شوية حاجات مسك منها الكيس ورماه فى النيل طيب دى هتتعلم إيه من المنظر ده وهتعرف يعنى إيه النظافة من الإيمان ولا خلاص الموضوع ده محدش بقى بيبص لية

ومشيت كتير وقليل وعديت على كورنيش النيل بدور على حلم وفرحة تايهين وطموح وحاجات جايين وحزن بيحاول يقهرنى من سنين ولكنه مش قادر على فرحه السنين

ومشيت كتير وقليل وعديت على كورنيش النيل وياريت الناس فاهمين

Wednesday, June 10, 2009

أغنية تامر حسنى القادمة هديكى بالجزمة

كلمات غريبة وعجيبة الواحد بقى بيسمعها من تامر حسنى وخصوصا فى فيلمه المبتكر عمر وسلمى اللى ممكن نوصل معاه لحد عمر وسلمى التاسع عشر
فى أعلان الجزء التانى من الفيلم بتيجى أجزاء من أغانى الفيلم وكلماتها بصراحة مش قادرة أقولكم بجد

حرام عليك يخربيتك على اللى أنت عامله فيا
شوفتوا الشعر والكلام الجميل يخربيتك يااااااااااااااه قمة الرومانسية والكلام الشاعرى الحساس ممكن بعد كده يقول لها يخرب بيت اللى جابوكى مثلا على أعتبار أنه خلاص بقى مابقاش فيه فرق بينهم عااااااااااااادى جدا

عنيكى بتندهلى من نظرة جابتنى وجابت أهلى
اااااااااااااااااااااااه يا دماغى مش بقولكم كلام رومانسى وشاعرى

مش عارفة هو ده كلام واحد يقوله لحبيبته ؟
يعنى هيا دى بقت الرومانسية الأيام دى ولا إيه بالظبط

يعنى هو ما سابش حاجة ماقالهاش فاضل إيه تانى يقوله وبعدين هما كده بيحبوا بعض ولا داخلين خناقة وهيضربوا بعض وهنشوف مين هيكسب

أنا حاسة أن الأغنية الجاية هتكون
أنا هديكى بالجزمة لو ما سمعتيش كلامى تانى ولو ما سكتيش بقى
وهديكى بالشبشب لو ما عملتيش الأكل
ولو أكلك طلع ناقص ملح هديكى بالجزمة على دماغك
ولو فى يوم صحيت على صوتك هرميكى من الشباك ما أنا مش ناقص قرف على الصبح ومش رايح الشغل وبلاش تقرفى فيا بقى
وبرضة هديكى بالجزمة

فعلا فعلا بتجيلى حالة أشمئزاز من سماع الكلمات اللذيذة دى

وياريت تعذورنى على الكلمات دى لأن فعلا الموضوع مستفز قووووووووووووووووووووووى

Sunday, June 7, 2009

البنات عايزة إيه فى المنصورة


الصورة تصوير دولسينا القمر
كتبت يوم الجمعة 5 يونيو بعد عودتى من حفل توقيع الكتاب

شعور كبير بالفرحة حسيت بيه النهاردة فى حفل التوقيع الثانى لكتابى أنا وصديقتى بدرية البنات عايزة إيه
5 يونيو 2009
يمكن فى البداية ومن قبل الحفل وبكام يوم وأنا كنت مضايقة لأنى كنت عارفة أن بدرية مش جاية لظروف قهرية جدا عندها وكنت فعلا خايفة ومضطربة جدا من مجرد وجودى لوحدى من غيرها فى الحفل لدرجة إنى فكرت أعتذر عن الحضور للحفل ولكن بصراحة لأنى قدرت كل الناس اللى بعتت وعلقت وقالت ليا أنهم جايين مقدرتش أعتذر ورحت فعلا ويمكن برضة مشاعر القلق والأضطراب كانت مسيطرة عليا جدا خصوصا قبل ما يبتدى الحفل وطول ما أنا فى الطريق للمنصورة
لدرجة إنى قبل الحفل بقول لياسمين وشيماء إنى نسيت أصلا الكتاب بيتكلم عن إيه وكنت فعلا خلاص شوية وهيغمن عليا عاااااااااااااااااااااااااااااااااااااااااااا
وطبعا أنا بتوعد صاحبتى وهيا عارفة نفسها أنها هتشوف منى أيام بس تصبر عليا شوية هههههههههههههههه
بس بصراحة فرحت جدا جدا من الناس اللى حضرت ومن اليوم كله
فى الأول فوجئت بمكالمة من صديقتى العزيزة جدا شيماء الجيزى بتشوفنى فين وبتعرفنى أنها أحتمال كبير تيجى وفعلا جت وفرحت جدااااااااااا بحضورها ده مع أنها جاية من مسافة بعيدة
فعلا شكرااااااااااااااااا ليكى جدا وصدقينى لما شفتك على الواقع حبيتك أكتر مليون مرة من قبل كده لأنك بنوتة جدعة وزى العسل ودمك خفيف جدااااااااااااااا
طبعا فى البداية مش قادرة أنسى فضل أمى عليا وتصميمها الحضور معايا فى أى حفل خاص بيا مع إنى عارفة أنها بتتعب من السفر جدا وأنها ما بتصدق يوم أجازة علشان تقعد فى البيت ولكنها صممت تيجى معايا وتحضر معايا اليوم
بجد مش عارفة أقولك إيه ولا أرد ليكى جمايلك دى أزاى ربنا يخليكى ليا يا ست الكل

فى البداية لاقينا ياسمين السبع وخطيبها الجدع جدا هيثم اللى قام معانا هو وياسمين بواجب جامد جدااااااااااااااااااااا فعلا انتوا ولاد بلد بجد
وشوية وبدأت الناس تيجى للمكتبة مع فاصل طبعا من التهييس الجامد منى أنا وياسمين وشيماء كنا تقريبا مش راكزين خالص وخصوصا أن الناس اتأخرت جدا وأحنا قلقنا لنعمل الحفل لنفسنا
ههههههههههههههههههههه بس الموضوع قلب معانا بهزار وضحك وتهييس عالى جدا
نيجى بقى للمفاجأة الثانية وهيا وجودى أصلا فى حفل مع الكاتب المعروف والجامد جدا أسامة الشاذلى ده لوحده كان مخلينى فى قمة القلق والرعب لكونى أقعد جمب واحد بقدرة ومكانتة ولكن الراجل بجد متواضع جدا وحد جدع وكويس جداااااااااااااااااااااا
وفعلا من دواعى سرورى أن حفل توقيع كتابى يكون مع حفل توقيع كتابه فى يوم واحد ده بجد شرف كبير جداااااااااا ليا

نوصل بقى لكل الناس اللى يمكن كلامنا ما أتعداش تعليقات على الفيس بوك أو يمكن ماكانش فيه كلام بينا خالص وفاجأونى وحضروا الحفل وسامحونى على فاصل الزهايمر اللى أنا كنت فيه لأنى فعلا فى المواقف دى بنسى موووووووت
مين بقى جه ومعلش لو نسيت حد الزهايمر بقى
أمجد مجاهد ، محمد متولى ، دولسينا ، إيمان سلطان ، مروة سالم ، ضحى وغيرهم كتير
بجد بشكركم جدا جدا على حضوركم وعلى كلامكم كله
وبشكر باقى الناس اللى حضرت الحفل وأتناقشت وأتكلمت كنت مبسوطة جدا جدا من كمية المناقشة اللى كانت موجودة المرة دى
ويمكن أنا حسيت أنى كنت زى وكالة الأنباء وأتكلمت كتير جدااااااااااااااااااااااااااا مع أنى فى أول حفل كنت متبعة نظرية الصمت الرهيب بس فعلا المرة دى حاسة أنى أتكلمت كتير جدا ويمكن كان لسة عندى كلام كتير قوى بس علشان الوقت خلصنا الحفل
بس فعلا كنت مستمتعة جدا ومبسوطة جدا النهاردة بوجود كل الناس اللى كانوا موجودين وشرفونى وأسعدونى كده
ويمكن كان ناقص اليوم وجود صديقتى وتؤأمى بدرية ولكنى مقدرة ظروفها كويس
وكمان كان نفسى أصحابى اللى كانوا موجودين معايا قبل كده يكونوا موجودين ولكنى مقدرة موضوع السفر والوقت والمسافة
والحمدلله اليوم كان ممتع جدااااااااااا ورائع أكتر مما تخيلت
برضة ولاد الدقهلية والأقاليم مفيش أجدع منهم وقاموا معايا بواجب جامد جداااااااااا فعلا شكرا ليكم جدا
وياريت لو فيه حد حضر وأنا نسيت أقول مين يبعتلى يفكرنى علشان حالة الزهايمر لسة مسيطرة بس عليا شوية
ومنتظرة رأيكم فى الكتاب بكل صراااااااااااااااااااااااااااحة
وانتظروا بقى الصور والفيديو قريبااااااااااااااااااااااااااااا جدااااااااااااااااااا
والحمدلله مش النهاردة برضة ذكرى النكسة وزى ما وعدتكم أننا هنعمل تاريخ جديد والحمدلله عملنا والنكسة ما أثرتش علينا
هههههههههههههههههه

Wednesday, June 3, 2009

ماذا تفعل لو

ماذا تفعل لو كنت مطالب بأشياء كثيرة وأنت لا تستطيع القيام بها بمفردك ليس لأنك غير قادر ولكن لأنك تمر بحالة لا تسمح لك بفعل أى شىء ولكن لا أحد يشعر بك ولا يعلم ما بداخلك والكل يتهمك بالكسل

ماذا تفعل لو كان عندك حدث مهم والمطلوب منك أن تنجزه على أكمل وجه وأن تجلس وتتحدث أمام الناس بلباقة وهدوء وأن تكون مبتسما دائما طوال الوقت وأن ترد وتجيب على كل أسئلة وأستفسار الحاضرين بمنتهى الهدوء والحكمة وبنفس الابتسامة ولكن دائما يصيبك الخجل فى مثل هذه المواقف وتريد أصدقاء معينين لكى يكونوا بجوارك ولكن نسبة لظروف معينة عندهم لا يستطيعون الوقوف بجوارك وسوف تكون بمفردك فى أصعب وقت تحتاج فيه لأقرب أصدقائك ولأن وجودهم يعطيك دفعة للأمام وثقة فى النفس لا مثيل لها

ماذا تفعل لو كان المطلوب منك الأستيقاظ كل يوم مبكرا وأنت فى الأساس لا تنام الا بعد آذان الفجر أو فى الصباح ولكنك تحاول وكل محاولتك تفشل ولكن يوجد عندك الكثير من الألتزامات التى تود القيام بها الفترة المقبلة من حياتك سواء كانت عائلية أو شخصية أو خاصة بالعمل ولكنك لا تستطيع الأستيقاظ على الرغم من كل المحاولات

ماذا تفعل لو وجدت بلادك تتجمل أحتفالا بقدوم الآخرين وطوال العام تكون مليئة بالقاذورات والأشياء المقززة التى يشمئز منها أى أنسان

ماذا تفعل لو كنت شاب أو فتاه وتعدى عمركم الخامسة والعشرون (وأنا أقول الخامسة والعشرون مجازا لأنه يوجد الكثيرين تخطوا الثلاثين ) وأنتم مازلتم تنتظروا الفرج وأن يأتى قطر الزواج ليأخذكم فى أحضانه ولكن للأسف القطر تأخر كثيرا أو جاء ولم تلحقوا لكم مكانا فيه وهذا لظروف كثيرة أهمها الظروف المادية والبطالة وحتى من منكم وجد عمل فيكون بملاليم

ماذا تفعل لو وجدت كل يوم أضافات كثيرة لك على الفيس بوك وعندما تقبل كأنك قلت لهم ( أتفضلوا أنا كل ما فيا تحت أمركم ) وتجد رسائل ممكن أتعرف ممكن التليفون ممكن الميل ولا يحترم أحد خصوصيتك ابدا وأنك هنا لتتابع عملك فقط وعلاقتك بهم يجب الا تتعدى التعليق على مواضيعك ومواضيعهم فقط ليس أكثر ولكن لا حياه لمن تنادى

ماذا تفعل عندما ترى مواقع ومدونات عادية جدا تحذف بحجة أنها أباحية مع العلم بوجود أشياء آخرى كثيرة يجب أن تحذف ولكن لا أحد ينظر لها

ماذا تفعل لو كنت تريد العودة للحياه مرة آخرى بعد أزمة نفسية مررت بها ولكنك لا تستطيع وتعودت على الوحدة وعدم رؤية أى شخص

ماذا تفعل لو كنت تريد أحد الأشخاص دائما بجوارك سواء كان قريب أو زميل أو صديق أو أيا كانت العلاقة ولكنك محرج من مجرد طلبه لوجوده بجوارك

ماذا تفعل لو أحببت فتاه جدا وكان بداخلك مشاعر جميلة لها ولكنك لا تعرف كيف تعبر لها عن حبك
وماذا تفعلى لو كنتى فى هذا الموقف

ماذا تفعل لو وجدت الآخرين يحاولن الإيقاع بينك وبين أصدقائك وزملائك فى العمل وأنت برىء من كل التهم والكلام الذى قيل عنك

ماذا تفعل لو كنت أنسان تملك مشاعر حساسة جدا ومرهفه وأقل شىء يضايقك ويتعبك ولكن لا أحد يقدر حساسيتك هذه

ماذا تفعل لو رأيت مدينتك تتشوه كل يوم وكل يوم تزداد تشوها وفقط أماكن معينة فيها هى الجميلة والنظيفة والمرتبة
ماذا تفعل لو فجأة وبدون سابق أنذار وجدت مكان من كورنيش النيل الواقع أمام منزلك الذى كان قديما ملكية عامة أصبح ملكية خاصة لكافتيريا موجودة على الناحية الآخرى من الكورنيش وكل يوم تجد الكراسى مرصوصة على جزء من هذا الكورنيش كأنه ملكا لهم

ماذا تفعل لو تجولت قليلا فى مدينتك وفجأة رأيت عنوان لمركز ثقافة لتتلفت حولك لتبحث عنه ولتتأكد من هذا الكلام وفجأة تتأكد أن هذا المكان الشبيه بالقهوة البلدى هو مقر مركز الثقافة والذى لا يمت بصلة لأى ثقافة وأى ثقافة هذه التى يتحدثون عنها

ماذا تفعل عندما تجد مدينتك فجأة تحولت لحفر ولمطبات صناعية وطبيعية ولا يوجد مكان صالح لسير الأنسان ولا السيارات

وأشياء آخرى كثيرة سوف أكملها مرة آخرى

Tuesday, June 2, 2009

أنفلوانزا بوسبوس

أيون ده نوع أنفلوانزا جديد أنا أخترعته أو هو اللى أخترعنى مش عارفة حاجة خااااااااااااالص
كل اللى أعرفه أنى بقيت كائن يعيش ويتعايش مع أدوار البرد المتكررة بسبب وبدون سبب وبين كل دور برد والتانى دور برد هههههههههههه
يعنى تقريبا أنا كل أدوية البرد عدت عليا لدرجة أنى بقيت خبرة يعنى والأنفلونزا بقت بتعزنى مووووووووووووووووووت تقولش مرات أبوها أنا
يادوب أخلص من دور وأستريح يوم ولا أتنين وهوب يجيلى دور تانى
طيب أعمل إيه أنا لا بشرب ولا باكل حاجة ساقعة
شوباك الأوضة قفلاه وأنا نايمة لأنه فوق دماغى علشان أى تيار هوا ولا حاجة وببقى هموت من الحر بس أعمل إيه مش بمزااااااااااااجى
محرومة من أكل الأيس الكريم عاااااااااااااااااا ولا أى حاجة ممكن تبقى يادوب قربت تسقع لأنى لو بس شربت حاجة أو كلت حاجة ساقعة يادوب زورى يوجعنى ويجيلى برد
ده حتى المية اللى نازلة من الحونفية لو كانت ساقعة شوية زورى بيوجعنى طيب أعمل إيه بلاش بقى أشرب كمان عاااااااااااااااااااااااااااااااا
ده لو خرجت شوية وعديت من جمب الكورنيش وبالصدفة شوية هواااااااااا خبطوا فيا يجيلى برد عااااااااااااااااا
طيب إيه الحل
كل شىء بيؤكد أن مناعتى كويسة ومفيش حاجة عندى خااااااااااااااااالص ولا أى تعب والحمدلله طبعا
طيب إيه موضوع الأنفلوزة دى اللى كل شوية تجيلى بسبب وبدون سبب يالهوووووووووووووووى طلع عليا سمعة وحشة قووووووووووى أنه فيه بينى وبين الأنفلوزة دى حاجة عاااااااااااا
وبعدين الكام دكتور اللى رحت ليهم قربوا يعتزلوا الطب بسببى ههههههههههههههههه
كل ما يشوفوا وشى يا بنتى انتى ما عندكيش حاجة
يالهووووووووووووووووووووووووووووووووووى أمال إيه ده
يعنى شوية برد فى معدتى شوية برد عادى شوية جسمى مولع ناااااااااار يعنى كل أنواع الأنفلوزة عندى وبجربه وتقريبا أنا بتجيلى حاجات عمرها ما جت لحد أصلا عاااااااااااااادى برضة مقدرش أقول غير الحمدلله على كل شىء
طيب نسيبنا من الأنفلوزة بقى لأنى هفضل وراها وراها لحد ما أعرف السر بقى مش معقوووووووووووووووول كده خالص
يعنى أنا عندى حفل توقيع يوم الجمعة أعمل إيه أنا بس أروح أعدى الناس برد وأروح هههههههههههههههه
ومن هنا بحذركم بقى أهو وماليش دعوة باللى هيحصل ليكم منى واللى هيجيله برد ويقولى أنتى السبب ولا أنا جالى أنفلوزة بوسبوس ولا أعرفه عااااااااااااااااااااا هو أنا عارفة أخلص من اللى عندى عما هشوف لكم حل
وبصراحة أنا قررت الآتى بس بعد ما حفل التوقيع يعدى
أولا هاكل وأشرب حاجات ساقعة ما أنا كده كده بتعب
ثانيا هروح أعدى وأقعد على الكورنيش
ثالثا هفتح الشوباك بقى بالليل لأن بصراحة الجو بقى حر جدااااااااااا وشوية وهبدأ أشغل المروحة
واللى يحصل يحصل بقى
عاااااااااااااااااااااااااااااا
لأن بجد أنفلوزة بوسبوس دى غريبة عجيبة مالهاش حل نوهائى وأنا قررت أختار لها الحل
كان معكم بوسبوس أم أنفلوزة أو أنفلوزة بوسبوس لأنى بقيت عبارة عن أنفلوزة طالع منها أنسانة

ملحوظة
بعض الكلمات والعوبارات الغريبة العجيبة دى ناتجة عن الأنفلوزة يعنى أنا ما أتجننتش ولا نسيت العربى ولا حاجة هههههههههههههههههههههههههه وأتعودوا بقى على كده

Monday, June 1, 2009

ميكانو أون لاين

مجلة ميكانو حاليا أون لاين وتقدروا تشوفوها
نصيحة منى بلاش تفتحوها بالفايرفوكس لأنها بتيجى مش مظبوطة لية مش عارفة ولا العيب من عندى مش فاهمة
ندخل بقى على الجد
العدد الأول وصل هيييييييييييييييييييييه
وهكتب ليكم أولا مواضيع القسم بتاعى أنا وبدرية طه باللينكات وأدخلوا بقى وقولوا رأيكم
فيه مواضيع جامدة منها
فيه مواضيع جامدة برضة منها
ومعانا أقسام وحاجات جامدة جدااااااااااااااااااااااااااااااا أدخلوا وشوفوها بقى