Sunday, May 31, 2009

حوارى مع آحلامى 2

واللى ما شافش الجزء الأول يدخل هنا يشوفه قبل ما يكمل

الآحلام :- طيب يا ستى نيجى بقى لحاجة شخصية قوى وهيا
أنا :- هاااااااااااااااااااا شكلك بتجرجرينى فى الكلام عايزة إيه
الآحلام :- لا خلاص نسيب السؤال ده للآخر دلوقتى بقى قوليلى إيه الحاجات اللى بتحبيها فى الناس اللى قدامك وبتحبى كمان تكون فيكى
أنا :- الصراااااااااااااااااااحة أيوه الصراحة بحبها جدااااااا وما بحبش الناس اللى مش صريحة ومهما كانت نتيجة الصراحة دى أعتقد أنها أحلى كتير من عدمها
يعنى مثلا ممكن أنا أكون صريحة بشكل بشع ولكن مقدرش ما أكونش صريحة
وكمان أنا بحب قوى لما حد يكون زعلان منى يجى يقول ليا أنا زعلان من كذا وكذا ونتعاتب ونتكلم وأنا فعلا بعمل كده مع الناس القريبة منى جدا بروح ليهم لما يعملوا تصرف يزعلنى وبقول لهم ونفسى الناس كلها تعمل معايا كده مش يزعلوا وياخدوا جمب زى الأطفال ما بحبش كده
الكدب ما بحبوش خاااااااااااااالص
الخيانة ، الخداع ، الجرح ، الأهانة الحاجات دى كلها بكرهها وفعلا بعتبرها نهاية لعلاقتى بأى حد يعمل معايا حاجة منهم
الكلام على الناس من وراهم بكرهه جداااااااااا جداااااااااااااااا
بحب قوى لما أعمل تصرف غلط سواء بقصد أو من غير صحابى والناس القريبين منى يوجهونى ويلفتوا نظرى ولأنى بحاول على قد الأمكان أعمل معاهم كده وما بزعلش من أى حد يوجهنى لشىء أو يقولى بلاش تعملى كده أو كده طالما كلامه صح
مبحبش الغرور والتكبر بكرههم جدا وما بحبش الناس تعيش الدور وتعمل فاصل بينها وبين باقى الناس لمجرد أنه بقى ليهم وجود فى المجتمع أو بقوا معروفين بكره التصرف ده جدا
أنا بحب البساطة قوووووووووووووووووى
هو أكيد لازم يكون فى حدود فى التعامل مع الناس بس ما توصلش لدرجة التكبر والغرور ووضع حواجز وحيطان وأبواب وشبابيك بين الواحد والناس
كفاية بقى كده أنا تعبت منك بجد ههههههههههههههههههههههههههه نكمل الكلام ده بعدين عايزة تعرفى إيه تانى
الآحلام :- أممممممممممممممممم مع إنى حاسة أنه لسة جواكى كتير بس
أنا :- أيوة لسة جوايا كتير قوى عايزة أقوله بس نسيب ده شوية ونبقى نرجع له تانى ممكن
الآحلام :- ممكن قوى هو أنا عندى أعز منك برضة ولا حد مطلع عينى غيرك هنيجى بقى للسؤال اللى هموت وأعرف أجابتة
أنا :- هاااااااااااااااااااااااااااااااااااااااااا
الآحلام :- فارس الآحلام لية حضرتك مقفلة الدنيا ومش ضايقة حد يجيب ليكى سيرة الموضوع ده

أنا :- لا مش كده هو إنتى كمان هتفهمينى غلط أنا مش معترضة على فكرة الجواز ولا الأرتباط أطلاقا ولأن دى سنه الحياه ومفيش ولا شاب ولا فتاه ما بيحلمش بشريك حياته وباليوم اللى هيشوفه وهيكمل معاه فيه حياته
ولكن لازم يكون حد صح مش أى جوازة والسلام يعنى أنا مش هتجوز لمجرد أنى أشيل من البطاقة لقب آنسه وأحط لقب متزوجة
الآحلام :- يا خبر فيه إيه يا بنتى طيب قوليلى حضرتك معترضة على إيه بقى
أنا :- أنا معترضة على المهازل اللى بتحصل فى جواز الصالونات ومع أحترامى لكل الناس اللى بتأيد الجواز ده ولكل الناس اللى متجوزين بالطريقة دى ولكن أنا تجاربى مع الموضوع دة مؤلمة جدا وفى نفس الوقت أنا مش قصدى أنى أعرف واحد ونمشى مع بعض من ورا أهلنا شوية لحد ما يجى يتقدم لا طبعا أنا عمرى ما هعمل كده ولكن اللى أقصدة أن جوازات الصالونات بيبقى فيها العريس ما يعرفش أى حاجة عن العروسة لدرجة أنه ما بيبقاش عارف حتى هيا درست إيه ولا بتشتغل إيه وهو بيبقى جاى لفكرة محددة أنه يتفرج عليها ولو عجبته يبدأ بقى يفتح محضر معاها ويعرف هيا درست إيه وبتشتغل إيه وبتعمل إيه وغالبا وبدون أى مقدمات يقوم قايل لها لا لا أنا مش عاجبنى كده إنتى هتسيبى شغلك ده أو هتعملى كذا وكذا مع أنهم لسة بيتعرفوا على بعض يعنى ما ينفعش يقول لها تعمل إيه وما تعملش إيه حاليا
الآحلام :- إنتى غلبتينى هو مش بيقول رأيه من الأول أمال إنتى عايزاه يغشها
أنا :- لا برضة مش قصدى يغشها ولكن قصدى أنه بيكون جاى عايز جارية وبس واحدة أيوة من عيله ومحترمة وكويسة ومعاها شهادة وياسلام لو شكلها حلو وكفاية قوى كده هو عايزاها كده وخلاص مش عايز أى كلام ولا أى حاجة تانية فى موضوع شغل ولا طموح ولا آحلام عندها
وبالنسبة لموضوع الغش طيب تقولى إيه فى اللى بيجى ويغش الواحدة ويعمل نفسه موافق على شغلها وكل حاجة وفجأة كل ده يتغير بعد ما يكون خطبها وبيبقى فاكر أنه ملكها

الآحلام :- طيب قبل ما أشد شعرى منك قوليلى إنتى عايزة إيه بالظبط فى شريك حياتك
أنا :- بصى هو لو فيه حد فهمنى كويس وعرفنى قوووووووووووووى صدقينى هيقدر يتعامل معايا جدا وحياتنا هتمشى تماااااااااام
الآحلام :- نعم نعم إيه الألغاز دى أنا عايزة كلااااااااااام تفصيل وضحى
أنا :- يا ستى عادى والله أنا عايزة حد يكون عايزنى أنا عارفنى وعارف شخصيتى وفكرى وشكلى وكل حاجة فيا وجاى علشان بسمه عايز بسمه مش جاى يخطبنى علشان فلان ولا فلانة قالوا له أحنا نعرف مواصفاتها كذا وكذا وهو يجى يعاين البضاعة يا تعجبه يا لا
أنا عايزة راجل عارفة يعنى إيه راجل
عايزة واحد يعرف يتقى ربنا فيا
واحد يحترمنى ويقدرنى ويقدر فكرى وشخصيتى وطموحى
واحد يقف جمبى ويشجعنى
واحد يعاملنى كبنى آدمة وأنسانة مش مجرد جارية
واحد يحترم أهلى ويعاملهم كويس
واحد بمجرد ما أسمع أسمه أحس بالأمان
واحد يكون فيه صفات كتيرة قووووووووووووووووووووووووى ومش هقدر أقولها هنا لأنها هتاخد مليون موضوع
الآحلام :- هاااااااااااااااااااااااا هتموتينى ناقصة عمر إنتى طيب دلوقتى شغلك وطموحك وآحلامك بتاخد وقت طويل وعايزة لسة وقت ومجهود مش شايفة أنه ده ممكن يجى على حساب اللى هترتبطى بيه مستقبلا يعنى لما تتجوزوا وممكن تقصرى فى حقه وحق أولادكم بعد كده
أنا :- لا كده كتير هو إنتى كمان مش عارفانى
بصى يا ستى أنا عندى أولويات فى حياتى يمكن دلوقتى أولوياتى منحصرة فى شغلى وطموحى وحياتى ولكن ساعة ما هيكون فيه أرتباط هيبقى الأولوية لبيتى ولجوزى ولولادى ومن بعد كده شغلى ولو جه شغلى على حسابهم مش هستنى جوزى يقولى سيبيه أنا هسيبه لوحدى ولأنى أصلا مش هستنى لما يجى على حسابه أو على حساب بيتى أنا أول ما هحس أنى مش قادرة أوفق بين الأتنين هسيبهم
الآحلام :- أمممممممممممممم كبستينى إنتى كده طيب كفاية أسئلة بقى المرة دى ونكمل مرة تانية
أنا :- هييييييييييييييييييييييييييه خدت أفراج

ونلقاكم فى الجزء الثالث من الحوار قريبااااااااااااا

Thursday, May 28, 2009

حوار مع آحلامى

الآحلام :- يااااااااااااه أيه ده هو إنتى كل يوم هتقلقينى كده وتفضلى تحلمى وتدوشينى معاكى مفيش يوم ترحمينى شوية
أنا :- أعمل إيه بس أنا بتمنى وبحلم بحاجات كتيرة قوووووووووووووووى ونفسى أحققها وغصب عنى بحلم
الآحلام :- يا بنتى أنتى مش رحمانى فى نوم بتحلمى وحتى وأنتى صاحية بتحلمى ريحينى شوية وخدى نفسك كده
أنا :- أنا لوخدت نفسى وبطلت أحلم شوية حماسى هيقل وهبطل حاجات كتيرة وعلشان كده لازم أفضل أحلم وأحلم وأحلم
الآحلام :- طيب قوليلى هو إنتى ما حققتيش حاجة خالص من اللى حلمتى بيها
أنا :- لا طبعا حققت
الآحلام :- طيب ما ترحمينى شوية وعيشى مع الحاجات اللى حققتيها وحاولى تكبريها وخدى هدنة كده معايا وبعدين كملى حلم تانى
أنا :- اللى حققتة واللى لسة بحلمه كل مرتبط ببعضه وما ينفعش أفصل بينهم ما ينفعش
الآحلام :- طيب قوليلى إنتى حققتى إيه
أنا :- ياااااااااااااه حاجات كتيرة قوى عايزة تعرفى إيه الحاجات الشخصية ولا العملية ؟
الآحلام :- نبدأ بالعملية وبعدين ندخل على الشخصية لأنى حاسة أنك هتنكدى عليا فى موضوع الشخصية دى
أنا :- بصى يا ستى أنا طوووووووووووووول عمرى بحب الكتابة قووووووووى أكتر من أى شىء بس دخلت كلية ودرست حاجة بعيدة عن المجال ده ويمكن نسيت آحلامى دى مؤقتا ولكن مش على طول لأنى كنت كل فترة بطلع الورق وأفضل أكتب وخلصت الكلية وأشتغلت برضة فى حاجة مالهاش علاقة بدراستى ولا حلمى فى الكتابة ولكنى فرحت بيها جدا ورجعت بقى لحلمى بعد ما بقيت بدخل على النت وبدأت بالمدونة بتاعتى اللى رجعتنى لحلمى من تانى وبقيت بكتب كل حاجة وأى حاجة حاسة بيها وهيا اللى وصلتنى للمجلات اللى بكتب فيها وهيا برضة كانت سبب فى موضوع كتابى وإنى عملته
الآحلام :- طيب طيب براحة بس شوية عليا يعنى إنتى كده بتعترفى أنك وصلتى لحلمك فى الكتابة وأنك بقيتى بتكتبى فى كذا مكان وكمان عملتى الكتاب اللى عمر أصلا ماكان فى بالك أنك ممكن تعملى كتاب إنتى مش شايفة أنك حققتى حاجات كتيرة قوى يعنى أهدى بقى شوية
أنا :- اه فعلا شايفة أنى حققت حاجات كتيرة ولكن ما ينفعش أقف لأنى لو وقفت ههد كل اللى عملته وتعب الثلاث سنين اللى فاتوا هيروح هدر وعلشان كده لازم أكمل وأحلم بالأحسن دايما
الآحلام :- طيب يا ستى نكمل كلام فى الموضوع ده بعدين قوليلى بقى حققتى إيه على المستوى الشخصى
أنا :- بصى بقى أنا طول عمرى بحب تكون علاقتى بكل الناس حلوة ويمكن ده راجع لتربية أمى ليا أنا وأخواتى اللى خلتنا كبرنا وأحنا حابين نكون على صلة وعلاقة كويسة بكل الناس سواء قرايب جيران زملاء أصحاب وأهم حاجة أن صلة الرحم ما تنقطعش ابدا مهما حصل وده كنا بنشوفه بعينا وأحنا صغيرين من تصرفات وافعال أهلى
المهم يا ستى أنا بقى الحمدلله علاقتى بقرايبى تعتبر ممتازة جدا نيجى بقى للأصدقاء والزملاء أنا بحب أكون علاقات كتيرة ويبقى ليا أصدقاء وأصحاب وزملاء وبحب تكون علاقتى بيهم كويسة جدا والحمدلله قدرت أعمل كده
يعنى هتستغربى لما أقولك أنى لسة ليا أصدقاء من أيام أبتدائى وأعدادى وثانوى وكلية وكمان الحمدلله الثلاث سنين اللى أشتغلت فيهم عملت صداقات كويسة
الآحلام :- هاااااااااااااااااااااااا كملى يا مغلبانى طيب دول الناس اللى كانوا معاكى زمان أنا عايزة أعرف الناس بقى بتوع التدوين والصحافة والجو ده
أنا :- يااااااااااااااااااااااه مش قادرة أقولك أن الحمد لله ربنا كرمنى بناس حلوة قوى وبقيت على علاقة بناس كتيرة وفيه منها علاقات بقت أسرية بمعنى فيه منهم جه عندى البيت وفيه منهم أنا رحت عندهم وفيه منهم شاف أمى فى حفل توقيع كتابى وفرحت جدا بيهم وبأنى عرفت ناس كويسة كده يعنى الحمدلله أقدر أقول أنى قدرت أكون مجموعة صداقات كويسة بدأت من النت وعلاقة على المدونات والميل وأمتدت للواقع وبقت علاقات رائعة جدا
الآحلام :- أمال إيه بقى ما إنتى كويسة أهو أستنى بس لسة فيه سؤال جوايا
أنا :- قولى هتغلبينى لية معاكى
الآحلام :- طيب يا ستى نيجى بقى لحاجة شخصية قوى وهيا
ودى بقى هنكملها فى الجزء الثانى من آحلامى
:))

Wednesday, May 27, 2009

صاحب صاحبه

الصديق الصالح هو الذي إذا ذكرت الله تعالى أعانك على ذكره, وإذا نسيت الله تعالى ذكرك به
أما سقراط فيقول: ليس من الصعب أن تضحي من أجل صديق, لكن أن تجد الصديق الذي يستحق هذه التضحية
ومن الأمثال الشعبية المثل المصري : اختر الصديق قبل الطريق
والمثل الروسي : إذا سافرت في طريق ؛لا تختر لرفقتك ماكرا بل صديقا
والمثل التشيكي : انصح صديقك سرا وامدحه علنا
والمثل الفرنسي : صديق واحد خير من مئة قريب
أصدقائك ثلاثة : صديقك وصديق صديقك وعدو عدوك
لا يكون الصديق صديقا حتى يحفظ أخاه في ثلاثة : في غيبته ونكبته ووفاته
الصداقة الحقيقية هي التي يشترك فيها العقل والقلب والضمير
متى اصبح صديقك بمنزلة نفسك فقل عرفت الصداقة
الصداقة روح في جسدين
الصداقة هي الوردة الوحيدة التي لا أشواك فيها
أنت تملك أصدقاء إذن أنت غني
الصداقة أرض نزرعها بأيدينا
تمهل عند إختيار الصديق ، وزد تمهلا عند تغييره
من أراد أن يعرف قيمته أحصى عدد أصدقائه
الصديق روح ثانية
أتعس الناس من لم يكن له صديق وأتعس منه من كان له صديق وخسره
أنت تملك أصدقاء أذن أنت غني
الأصدقاء الحقيقيون يعرفون وقت الشدة
لا تستطيع أن تكسب صديقا أن لم تكن صديقا صدوقا
صديقك من يعرف عنك كل شيء ومع هذا يظل محبا لك
كل دى أقوال فى الصداقة نقلتها من كذا مكان وبتمنى تعجبكم
وشكرا لكل أصدقائى اللى كل يوم بعرف قيمتهم واللى بينطبق عليهم كلمه صاحب صاحبه بجد

Saturday, May 23, 2009

هيا البنت المحترمة بعبع ؟

هو أكيد العنوان صدمة بس أنا قصدتة بصراحة وقصدت المعنى يوصل كده وفعلا هيا البنت المحترمة بعبع وبتخوف
تيجوا نتكلم بصراحة شوية هو لية الناس بتخاف من البنات المحترمة قوى كده ولية بيعملوا حواجز وأسوار بينها وبينهم
أنا طبعا مع أنه لازم يكون فيه حدود فى التعامل بين البنت ومع أى حد أيا كان ولكن أنا كلامى على خوف الناس من البنات المحترمة بمعنى ساعات مثلا فى أماكن أى عمل تحصل أى حاجة خاصة بأى واحدة وتكون من وراها ومحدش يقدر ينطق ولا يقول لها حاجة ويفضلوا الناس وزملائها يتكلموا ويتهامسوا من وراها على الموضوع ده وطبعا هيا لما بتحس بشىء غريب بتحاول تعرف منهم بكل الطرق ولما بيقولوا لها بتسألهم لية ما قولتوش ليا الموضوع ده من بدرى وفى ساعتها يكون الرد أصلنا بنخاف منك ومن رد فعلك ولما تحاول تفهم منهم ليه بيخافوا منها يكون الرد لأنها محترمة ومحافظة قوى وحاطة حدود فى الكلام بينها وبين أى حد وطبعا ده مش غلط ولكن الغلط أن الناس بتخلط بين كل شىء يعنى المفروض أنه حصلت حاجة خاصة بيها فى الشغل وتكون هيا أول واحدة تعرفها علشان تلحقها من أولها بتكون هيا أخر واحدة تعرفها وساعات كمان ما بتعرفهاش
ياترى لية التفكير ده وهل البنت المحترمة بعبع ؟ وهل الحدود والخطوط اللى مش لازم حد يتعداها دى حاجة غلط ؟ ولية الناس بتخلط كل حاجة ببعضها فيه فرق بين الشغل ومواضيع الشغل وأى حاجة تانية
وبصراحة الموضوع ده حصل قدام عينى مليون مرة وكنت فعلا بلاقى زميلات ليا بتحصل أى مشكلة أو حاجة من وراهم ومحدش عايز يقول لهم ولما اسأل ليه يقولوا أصلهم محترمين قوى ومحافظين وحاطين حاجز فى التعامل بينهم وبين الناس
يا سبحان الله وده علاقتة إيه بالشغل وعلاقة الحدود فى التعامل بموضوع خاص بالشغل إيه مش فاهمة الصراحة
ولأن نفس الموضوع كان بيحصل معايا أنا كمان وكنت بتخنق منه جدااااااااااااا وكنت بعمل مليون مشكلة مع أى حد يخبى عليا حاجة خاصة بشغلى وبيا لأن ده مش شىء شخصى ده شغل والمفروض أى شىء يخصنى فى شغلى أعرفه ولكن لا حياه لمن تنادى التفكير الغريب مش هينتهى
طيب تيجوا نتكلم فى نقطة تانية وهيا موضوع الأعجاب بأى بنت وخاصة لما تكون محترمة ممكن ووارد جدا أن البنت يكون عارفاها شباب كتيرة عن طريق شغلها أو الأقارب الجيران أو عن أى طريق ولو حصل بقى وأى واحد منهم أعجب بالبنت دى وساعات بتكون هيا كمان بتبادله نفس الشعور وطبعا هيا لو بتموت فيه عمرها ما هتنطق بكلمة ولا هتعمل أى تصرف يدل على ده وممكن كمان تلاقيها بتتصرف معاه تصرفات رخمة علشان ما يحسش بحاجة
يا ويلها ويا سواد ليلها على اللى هتشوفه لأن الشباب تقريبا عندهم حساسية من البنات المحترمة وبيخافوا منهم مش عارفة لية وممكن يفضلوا مطلعين عينها سنه ولا أتنين لحد ما ينطق ويقول لها أنه معجب بيها وعايز يرتبط بيها
يا حلاوة يا ولاد يعنى البنت ذنبها أنها محترمة يبقى لازم تدفع ثمن أحترامها والولد يطلع عينها لحد ما ينطق
وطبعا بتكون عند الولد شوية مبررات أولها أنه خايف لو كلمها وقال لها أنه معجب بيها هيا تفهمه غلط وتفتكره عايز يمشى معاها ويتسلى وتقوم قاطعة علاقتها بيه وبكده هو يخسرها للأبد وبدل ما كانت زميلة ولا قريبة وبيفكر يرتبط بيها كده العلاقة أنقطعت
ومبرر تانى أن ممكن تكون ظروفة مش سامحة ليه بالأرتباط فى الوقت الحالى وهو من جواه عارف أنها مش هتوافق تكلمه ولا تمشى معاها سنه ولا أتنين من ورا أهلها لحد ما يكون جاهز فبيكون عنده أحسن أنه يفضل ساكت ويراقبها من بعيد لبعيد لحد ما يكون جاهز ويقدر يتقدم بدل ما يكلمها ويخسرها للأبد
ولكن فيه حاجة مهمة جدا أن أنت ممكن كده تكون بتضيعها من أيدك وأنا عارفة طبعا أن كل شىء نصيب ولكن برضة فيه أسباب يعنى لو ظروفك على قدك مثلا وخايف تدخل فى أرتباط وشبكة والحاجات دى كلها كلمها قول لها على نيتك ما هيا ممكن توافق ترتبط ليك بدبلة وخلاص وممكن تفضلوا مخطوبين سنه ولا أتنين ولا أكتر لحد ما تجهز نفسك وتكونوا مشيتوا طريق صح وقدام الناس والنور
ليه تحكم أنها ولا أهلها هيرفضوك
ولأن أصلا كل الشباب ظروفهم بقت زى بعضها وحاليا بقى المعروف والأغلب أن الأتنين بيتخطبوا بدبلتين وبس ويفضلوا مخطوبين سنه أتنين أو مده لحد ما يقدر يجهز اللى يقدر عليه ويتجوزوا
ولكن لية تتعب نفسك وتتعبها ويكون ردك لما حد يسألك أصلى خايف منها
يعنى إيه خايف منها ؟
طيب خايف وسط حد بينكم حد تكون واثق فيه وقريب جدا منكم ولكن برضة نسبة لأن الناس ما بقوش بيحبوا الخير لبعض الأحسن أنك تكلمها بأى طريقة وتوضح لها أنك معجب بيها وبأن ظروفك كذا وكذا وهيا بدورها هتبلغ أهلها وهترد عليك بعد فترة تفكر هيا وأهلها فيها ويكون أهلها سألوا عليك
ولكن لية حكاية أصلى بخاف منها أصلى بخاف أكلمها أصلها محترمة ومحافظة قوى
كأن الأحترام بقى حاجة وحشة وكأن المحترمة بقت بعبع
وطبعا فيه أمثلة كتيرة على الموضوع ده ولكن كفاية الأمثلة دى دلوقتى ومرة تانية هكمل الباقى

Wednesday, May 20, 2009

هى والآلم

تستيقظ الآن مع آذان العصر أو المغرب كل يوم وتظل طوال الليل مستيقظة ولا تنام الا صباحا عندما تعلم بأن البيت أصبح خالى تغلق باب غرفتها وتضع الستائر على الشبابيك حتى لا ترى أى نور وتنام
بالطبع هى لا تنام كل هذا الوقت فكل ساعة أو أثنان تستيقظ مثلهم وتظل تدور يمينا وشمالا على السرير وتحايل فى النوم ولكنه يعاندها دائما فهى عندما تحسب عدد ساعات نومها تجدهم لا يتعدون الخمس ست ساعات ولكن الباقى تكون على السرير تعاند فى النوم وهو يعاند فيها فهى لا تريد أن تقوم بالنهار بأى حال من الأحوال ولأنها غالبا خلال النهار تشعر بالآم عديدة فى جسمها ومعدتها خاصة لذلك تحاول أن تنام حتى تنسى الآمها
أصبحت تخاف من الناس ومن الخروج من المنزل منذ عام أو أكثر وهى مبتعدة عن كل الناس أصدقائها زملائها أقاربها ولا تراهم الا نادرا وغالبا تتعب كثيرا عندما تخرج وتذهب الى أى مكان لذلك أصبحت تفضل الجلوس فى المنزل بدلا من سؤال كل من يراها عن ماذا حدث لها وما يتعبها ويجعلها هكذا
أصبح وجهها شاحب جدا فهى من الممكن أن تظل عدة أيام بدون وضع أى طعام أو شراب داخل فمها وغالبا معدتها ترفض أى طعام ويخرج مرة آخرى بعد بضعة دقائق أو ساعات وهذا جعلها تخاف أيضا من تناول أى طعام أو شراب
وكل من يراها يتسأل ماذا بها ولماذا وجهها شاحب هكذا ووزنها أقل بكثيرا من السابق
فقدت الثقة فى كل من حولها لذلك أصبحت تفضل الجلوس بمفردها وعدم الخروج والأختلاط ولكن بسبب عملها أحيانا تضطر للخروج ولكنها كثيرا تعتذر عن أى لقاء عمل أو غير عمل بسبب مرضها وخوفها وأشياء آخرى كثيرة
كل شىء جميل مات بداخلها الأمل والحلم والطموح والحب وهى الآن لا يهمها شىء سوى أمها التى تموت فى اليوم مليون مرة عندما تراها هكذا حطام أنسانة شبه ميتة وشبه حيه
فهى فى السابق كانت ترى نظرات وكلمات الأعجاب بأبنتها فى كل مكان والكل كان يشيد بجمالها وآخلاقها وسلوكها وطريقة تعاملها مع الناس وطموحها الذى ليس له مثيل ولكن الآن تبدل الوضع فلم يعد يراها أحد الا نادرا وعندما توجد فى أى مكان توجه الكلمات الى أمها لماذا وجه أبنتك شاحب هكذا لماذا كل نظرات الحزن هذه ولماذا ولماذا وكل هذه الأسئلة تعلم الأم أجابتها ولكنها تعلم أنه لا يوجد أحد يفهم أبنتها أكثر منها وللأسف حتى هى لا تستطيع أن تخرج أبنتها مما هى فيه فقد حاولت كثيرا معها وبكل الطرق ولكن نادرا ما تنجح طريقة معها ويفشل الباقى
تتمنى هذه الفتاه أن يعود بها العمر لعام الى الوراء أو لعام وعده أشهر ولأنها قبل هذه الفترة كانت أنسانة آخرى تماما كانت كلها نشاط وحيوية وكانت تستيقظ من نومها فى السادسة صباحا وتخرج لعملها وكانت شعلة نشاط وكان الكل يحسدها على نشاطها هذا فكانت دائما تنهى عملها مبكرا وتساعد زملائها وزميلاتها فى عملهم وكانت على علاقة طيبة بكل الناس وكانت لا تجلس فى مكان واحد فتجدها فى الطابق العلوى تجلس مع هذه المجموعة تتكلم وتضحك وتتناقش ثم تنزل الى الطابق السفلى لفعل نفس الشىء وهكذا فكانت محط إعجاب كل من حولها وكانت فتاه طيبة جدا وبسبب جدعنتها وحبها للآخرين أستطاعت أن تكون علاقات أنسانية ناجحه جدااا مع كل الموجودين وكانت دائما تتصدر لحل مشاكل أى من الزملاء وتذهب سريعا الى رؤساء العمل وتكلمهم فى المشكلة وكانت فى كل مرة تنهيها وهذا بسبب علاقتها الطيبة بالكل التى كانت تسمح لها بالحديث مع أى شخص حتى رؤسائها فى أمور ومشاكل العمل ومع أنها كانت أصغر الموجودين سنا الا أن الكثيرين كانوا دائما يأخذون رأيها فى أشياء كثيرة جدا تخص حياتهم وعملهم وكان رأيها دائما صواب ويعملون به وكانت تعود من عملها لتطهو الطعام وتساعد والدتها فى عمل المنزل وفى الليل تمسك الجرائد والمجلات وتقلب فى قنوات الأخبار والقنوات الدينية وتستمع لأى مسلسل يشدها
فكانت حياتها طبيعية جدا جدا وكان الكل يعتبرها فتاه مثالية لأنها كانت ناجحة فى أقامة علاقات أنسانية راقية جدا بعيدا عن المصالح والأغراض الآخرى وكانت دائما مميزة عند الأقارب والأصدقاء وكل من يعرفها
كانت بشوشة دائما وأبتسامتها على وجهها طيبة جدا وبها كمية حنان تملأ الكون كله حساسة ومشاعرها مرهفه جدا كانت بها الكثير من صفات الجدعنة التى كان يحسدها عليها الآخرين رمانسية جدا ومشاعرها لا مثيل لها طموحة ونشيطة وغيرها من الصفات الجميلة التى نادرا ما توجد فى شخص واحد
ولكن ماذا حدث لها فقد تعرضت لعدد من الصدمات واحدة تلو الآخرى حتى أنهارت تماما وتركت عملها وأصبح الحال بها مثلها مثل أى شخص لا هو ميت ولا حى فقدت كل شىء جميل وله طعم فى حياتها فقدت قدرتها على التواصل مع الآخرين مع أنها كانت بارعة فى هذا الشىء أكثر من أى شخص وفقدت برائتها وطيبتها وهدوئها وأشياء آخرى كثيرة كانت تميزها
أصبحت الآن حطام فتاه وحتى باقى طموحها وآحلامها تكاد تفقده بسبب الحالة النفسية التى تمر بها
ولا أحد يشعر بها ولا يفهمها مطلقا ومهما حاولت شرح ما بها لا يوجد من يفهمها أيضا فهى دائما تخفى ما يؤلمها بداخلها دائما وتحاول أن تظهر بأنها أنسانة طبيعية وليس بها أى شىء حتى لا تقلق أقرب الناس لها على ما هى فيه ودائما تعيش فى صمت حتى لا تفضحها كلماتها وصوتها وياليت يوجد شخص واحد يفهمها جيدا
ولكن هل يوجد أمل فى عودتها للحياه مرة آخرى هل يوجد من يستطيع أخراجها من حالها هذا هل الحب ووجود شخص ما هو السبب والدافع لها لخروجها من حالتها
ولو كان الحب ووجود شخص ما هو السبب هل يوجد من يستطيع تحمل مشاعرها المرهقة وحساسيتها الزائدة حتى تتخطى محنتها ويكملوا حياتهم معا
ياالله فقد تعبت من كثرة التفكير فى حالها ولا تجد حل ولكن فرج الله قريب ومن المحتمل ظهور من هو قادر على أخراجها من حالتها وليس معنى وجود شخص أن يكون شخص تربطهم علاقة عاطفية من الممكن أن تكون صديقة قريبة منها تحاول بشتى الطرق أخراجها من حالتها من الممكن أن تكون مجموعة أصدقاء وزملاء العمل يتفقون على أخراجها من حالتها ومن الممكن وجود هذا الشخص ولو كان موجود فهو أكثر شخص قادر على أخراجها من حالها

Friday, May 15, 2009

تساؤلات طفل صغير

دى سلسة أسئلة عن تساؤلات الأطفال وتعالوا معايا نشوف أيه هيا التساؤلات
أول تساؤل

هما طفلتين أخوات فرق صغير بين عمرهم تقريبا سنه بس أفكارهم واحدة
خالتو خالتو
نعم يا حبايبى
إنتى خلصتى كلية خلاص
أيوة
وبتشتغلى أيه
مدرسة
طيب إنتى متجوزة
لا
أزاى هههههههه
عادى يا حبايبى مفيش مشكلة مش شرط أتخطب فى وقت معين
لا أزاى ههههههههههههه أحنا أول ما نخلص كلية هنتخطب ونتجوز على طول
حاضر يا حبايبى ربنا يوفقكم
وتضحك الأختان مع خالتو حبيبتهم كثيرا ولأن خالتو بتحبهم جدا فدايما بتلعب معاهم وبترد على كل أسئلتهم بحب وبأبتسامة كلها حنية ورقة
خالتو
نعم يا حبايبى
إنتى قلتى بتشتغلى ايه
مدرسة
يعنى زى المدرسة اللى عندنا فى المدرسة
ايوة بس أنا بدرس مادة تانية
خالتو أنا لما هكبر هشتغل صحفية لا لا دكتورة لا لا مهندسة لا لا خياطة
وتقريبا هما قالوا كل المهن الموجودة

-----------------------------------------

ثانى تساؤل

يرن جرس الباب وتفتح الأختين الحلوين
مين خالتو هييييييييييييييييييييييييييييييييييه
أزيكم يا حبايبى وحشتونى
يالا تعالى معانا نلعب
طيب ثانية بس أرتاح
لا تعالى يالا هنلعب على الكمبيوتر ولا باللعب
زى ما تحبوا
طيب يالا على الكمبيوتر ويجروا وهما ماسكين أيد خالتو وأول ما يوصلوا يفتحوا الجهاز يالا يا خالتو أقعدى جمبنا
أصلى يا بنات ما جبتش النضارة وكده عينى هتوجعنى
معلش يا خالتو شوية صغيرين أو بصى أقعدى بعيد شوية علشان عينيكى
ماشى يا حبايبى
هاه يا خالتو نلعب أيه دى ولا دى ولا دى ولا
أى حاجة اللى تحبوه وعايزين تلعبوه
لا لا أختارى إنتى
يا بنات هاتوا اللعبة اللى أنتوا بتحبوها
طيب إنتى بتحبى أيه
ههههههههههههههههههههه
طيب أيه رأيك فى دى
كويسة
يالا مين هيبدأ خالتو ولا أنا ولا إنتى
ابدأوا أنتوا وأنا فى الأخر
لا لا ابدأى إنتى يا خالتو وكل واحد فينا دور
ماشى يا حلوين
يالا يا خالتو شاطرة أيه ده ده أحنا ماكناش بنعرف نعدى كل المستويات دى يالا يا خالتو أكسبى لينا
هههههههههههههههههه
كفاية يا بنات بقى كمبيوتر أنا هقوم علشا عنيا وجعتنى وأنتوا كمان قوموا العبوا باللعب أحسن وأنا هروح أقعد مع ماما
لا يا خالتو العبى معانا باللعب يالا بقى
طيب يالا
هييييييييييييييييه يالا هاتى العرايس وكمان المكعبات والقطر اللى بابا جابوا لنا وكمان الدباديب اللى هناك دى
أيه ده يا بنات هو أحنا هنلعب بكل ده كفاية حاجة واحدة
لا لا هنلعب بيهم كلهم هنعمل بيت بالمعكبات وده يكون بيت للعرايس ونزينه بالدباديب وهنعمل طريق جمبه نحط فيه العربيات وطريق تانى للقطر
طيب يالا
يالا يا خالتو أحنا هنوزع المعكبات علينا ونعمل البيت مع بعض ماشى
ماشى يالا
الله خالتو عملت بيت حلو يالا نكمل
عجبكم البيت
اه قوى قوى يالا نكمل باقى البيت ونعمل الطريق
يالا
خلاص عملنا البيت حطوا بقى العرايس هنا والدباديب فى الجمب
هاه
وده طريق العربيات أنا عملته يا خالتو
شاطرة برافو
وده طريق القطر أنا اللى عملته
شاطرة إنتى كمان برافو عليكم
وتلعب الطفلتان مع خالتو بالبيت ويفرحان جدا بيه وبأن خالتو تلعب معاهم وتتركهم يلعبون لتذهب الى بيتها مع وعد بأنها ستعود لهم قريبا
------------------------------------------

ثالث تساؤل

ترى الطفلتان أمهم فى أنتظار طفلها القادم ويعلمون أنها حامل وفى نفس الوقت يوجد سيدات كثيرة فى العائلة فى نفس الحالة وتشاهد الطفلتان كل مده واحدة منهم تلد ويكون عندها طفل ويتبقى أخيهم القادم بعد عده أشهر ولنرى أسئلتهم لخالتو مع أن خالتو غير متزوجة ولا مخطوبة
خالتو خالتو
نعم يا حبايبى
إنتى هتولدى أمتى
نعم هولد أيه لا لسة بدرى
لية يا خالتو ما فلانة وفلانة وفلانة ولدوا وجابوا نونو وماما كمان شوية هتولد يبقى إنتى كمان المفروض تولدى
لا يا حبايبى فلانة وفلانة وفلانة وماما متجوزين لكن أنا مش متجوزة
لا يا خالتو إنتى هتجيبى نونو
ربنا يسهل إن شاء الله بس مش دلوقتى لسة بدرى زى ما قلت لكم
لا لا مش بدرى إنتى شوية وبطنك هتكبر وبعدين تولدى
يا بنات يا حبايبى أنا مش متجوزة لما هتجوز إن شاء الله هولد
لا يا خالتو مالناش دعوة إنتى خلاص شوية وهتولدى وكمان أحنا هناخد النونو بتاعك نلعب بيه
ههههههههههههههههه بس برضة يا بنات ما ينفعش أولد من غير ما أتجوز
طيب ما تتجوزى يالا
ربنا يسهل يا حبايبى
-----------------------------------------
انتظروا باقى التساؤلات قريبااااااااااااااااااااااااا

Tuesday, May 12, 2009

جربت تبص فى المراية

جربت تبص فى المراية وتقول هو مين ده اللى فى المراية ؟
جربت تحس أنك عايش حياه غريبة عجيبة وأسلوبها غريب قوى ومش عارف تطلع منها وبتحاول بكل طاقتك تخرج وما تعرفش ؟
الناس كلها بتتهمك بأنك بتتدلع وبأن مفيش فيك حاجة ولكنهم مش فاهمين حاجة ولا حاسين بيك أصلا ولا عارفين إيه اللى خلاك كده لأنهم لو فهموا هيقدروا وحتى لو فهموا مش هيقدروا لأن محدش هيحسك الا لو كان جرب وشاف اللى أنت شفته
لما فجأة تلاقى الكل ضدك وبيطلبوا منك حاجة وأنت مش قادر عليها ومش بمزاجك وهما برضة مش فاهمين
لما فجأة تلاقى الكل ما بقاش معاك وبعد عنك وللأسف لو فهموك مش هيعملوا كده وأنت تعبت من كتر الشرح وتوضيح اللى جواك واللى تاعبك واللى خلاك كده وبرضة مش قادرين يفهموا وفيه منهم بيقفل ودانه أصلا وما يسمعش وفيه بيسمع وكأنه ما سمعش وفيه بيسمع وبيفهم وبرضة بيتهمك بأنك السبب فى اللى أنت فيه
لما فجأة تلاقى الكل أتخلى عنك هتعمل إيه ؟
لما تلاقى نفسك بتثق فى حد وعمال تحكيلة وبترتاح لكلامك معاه وفجأة تلاقية أتقلب عليك بدون سبب يبقى ده أسمه إيه ولية من الأول سمع ليك وخلاك تتكلم ما كان يقول من أولها أنه مش عايزة وش وخلاص ولكن ليه كده فعلا حاجة بشعة جداااااااااااااا بعد ما تثق فى حد وتتكلم معاه وترتاح فى الكلام وفجأة تلاقية بيعاملك وحش وبدون أى سبب أو توضيح هو كده وخلاص
لما تكون طول عمرك بتقف جمب الناس وتساعدهم وبدون ما تستنى كلمة شكر ولا مقابل لده وأول ما تتحط فى موقف وتكون محتاج حد جمبك ما تلاقيش والكل يتبخر ولا كأنهم عايشين هتعمل إيه ساعتها ؟
أسئلة كتيرة قووووووووووووى ممكن نعمل منها حكايات ولكن كفاية دول ومستنية ردكم
والكلام ده فكرنى بأغنية شيرين المراية
هتعمل إيه لو نمت يوم وصحيت بصيت وشفت نفسك فى المراية بكيت جواك سؤال تصرخ تقول أنا مين أنا مين أنا زى ما أنا ولا أتقسمت أتنين
وبعدين قول ياللى فى المراية فهمنى إيه الحكاية فرحان تعبان مرتاح ندمان حاجات كتير فى حياتنا أتسببت فى حيرتنا وأدينا عايشين راضين جايين ورايحين
هتعمل إيه لو نمت يوم وصحيت ولاقيت أقرب ما ليك فى الدنيا مش حواليك هو أنت مين اللى عمل كده فيك مش أنت ولا فيه حد غمى عنيك

Friday, May 8, 2009

رسالة من فتاه مجروحة بالأغانى

جاءتنى والدموع تسبقها وقد بللت ملابسها وأحمرت عيناها من كثرة الدموع حاولت تهدئتها لمعرفة ماذا حدث وما الذى يبكيها فقد تخيلت بأن أحد عزيز عليها قد مات ولكن بعد ما هدأت وبدأت فى الكلام عرفت ما حدث وبأنها أنفصلت عن خطيبها وأصابتنى صدمة كبيرة ولا أعرف ماذا حدث وكيف يحدث هذا
الفتاه الرقيقة البريئة التى لا يوجد لها مثيل فى كل شىء وبها كل الصفات التى يتمناها أى شاب والتى كانت ترفض أى شخص يتقدم لها لأنها لا تريد الزاوج لكى تتخلص من كلمة أنسة ويصبح لقبها مدام ولكنها كانت تبحث عن مواصفات معينة وفجأة وجدتها فى هذا الشخص الذى كان أرتباطهم تقليديا ولكنه كان أسطورى وخرافى ودق قلبهم من أول زيارة وكل طرف منهم شعر بأنه وجد نصفه الآخر وكان يحسدهم الجميع على التوافق الرهيب بينهم فى كل شىء وعلى حبهم الذى ولد لحظة رؤيتهم لبعض ولكن ماذا حدث مرت أيام وأيام وهى تحكى من السعادة والحب وبأنها قد أرتبطت بملاك وليس بشر وهو الآخر كان يعتبرها ملاك وعاشوا فى سعادة وهناء فترة ولكن حدث شىء قلب حياتها رأسا على عقب فجأة تبدل خطيبها للعكس فى كل شىء كل صفاته وتصرفاته وكلامه وكل شىء تغير تماما حتى أتفاقاتة مع أهلها تراجع عنها وأراد أن يغيرها رغما عنها وعن أهلها وليس بالتراضى وعاشت أياما وشهورا تحاول معرفة ماذا حدث له ولماذا هذا التغير الفظيع وتخلق له الكثير من الأعذار وتحاول تهدئة أهلها وحل أى مشكلة بينهم وبينه وكانت بالفعل تنهى أى مشاكل ولا تعرضه لأى شىء مع أهلها وتحاول بكل الطرق معرفه ما حدث له ولكنه تغير تماما كأنه أنسان أخر
وتجرأ عليها مرة وأثنان وثلاثة وأخطأ فى حقها بالكلام وكانت تسامحه بعد ما يعود ليصالحها وكانت تفرح جدا من مجرد سماع صوته وتنسى أى شىء فعله فى حقها
ولكنه لم يتغير وأصبح الحال يسوء يوما بعد الآخر الى أن فاض بها وحاولت أن تعرف ماحدث هى وأهلها ولكن كانت النتيجة غلطه فيها كثيرا وفى أهلها فلم تتحمل هذا الغلط وخصوصا فى أهلها وخلعت دبلته من يدها ولم تلبسها مرة آخرى وأنتهى الحلم الوردى وأستيقظت على كابوس أسمه الجرح والظلم والخيانة والغدر فقد رأت معه كل أنواع الكذب والخداع والظلم وقد جرح قلبها منه كثيرا وعاشت شهورا طويلة تدفع ثمن جرحه وظلمه وتدهورت حالتها النفسية
وكانت قصتهم كالآتى
فى بداية معرفتهم
هى
أنا قلبى لية حاسس قوى بالشكل ده هو الهوى بيعلى أحساسنا كده صدقنى خلاص صدقت أن أنا حبيت دلوقت وماكنتش أعرف قلبى هيحبك كده وكنت فين أنت وكل الحب ده ولية سايبنى لوحدى طول الوقت العمر ده
هو
عارفة أحلى حاجة فيكى إيه بتحلى أى شىء عنيكى تيجى فيه قمر ده إيه اللى تتساوى بيه وتعالى أقولك أحلى فيكى إيه ولا أنتى فاهمة قصدى واللى بالى فيه فيكى اللى ياما أنا حلمت بيه ليالى يالا ان شاء الله أموت فى هواكى ان شاء الله ده كتير عليا الحب ده والله أتمنى أكتر من كده إيه
هى
الله بقى اللخبطة دى لية ياللى خاطفنى ياريت تقولى إيه حصلى على كده بقى ده اللى بالمللى اللى أنا عشت أحلم بيه بين يوم وليلة أخدتنى على مشمى وكنت راضى ده أحنا يادوب بنقول ياهادى أمال لو فات شهر هيحصل إيه
هو
أنا عارف أنى بحلم والحلم جميل وبيحلالى قال إيه قاعدة جمبى والناس شايفاكى وحسدانى ما هو طبعا ما أنتى قمرى ونورى وضلى وأمالى وأنا نفسى أقولك كده من زمان أنا كل ما أغمض عينى الاقيكى جاية من بعيد لابسة الفستان الأبيض والمزيكا تقول وتعيد والاقيكى بتضحكيلى وبتقوليلى بقينا لبعض والاقى دقات قلبى من كتر الفرحة تزيد والاقى لامة وأحلى دمعة من عيون فرحانة ما خلاص العين هتنام بعد ليالى كتير سهرانة والف اورى الشبكة ودى ربكة ماكانت على بالى
بعد شهر
هى
خلاص بقت عادة يا حبيبى تتقل وتتمادى ده كله الا ده يا حبيبى ادلعت بزيادة وايه أنت فاكرنى إيه حد لعبت بيه وبتقدر عليه ولية بتزودها لية ده اللى بهون عليه أنا ما أمسكش
بعد شهرين
هى
مش كنت تتكلم شايفنى بسيب ايديك وبضيع نادينى وقولى لية بتبيع لو غلطة أتعلم أزاى كده هنرجع هوانا ماعتش زى زمان وفين يجمعنا تانى مكان الفرقة دى بتوجع
بعد الأنفصال ورجوعه ندمان
هى
كنت بموت لو غبت عنى كنت بحس أن أنت منى كنت زمان بخلص قوى كنت عايشة يادوب عشانك كان قلبى بيضعف قصادك بس دلوقتى قوى بعد ما أديتك حنانى بعت حبى رخيص يا جانى مستحيل أحن تانى لقلب خانى قلب كنت بداوى جرحه كنت بفرح وقت فرحه وهو كان قاسى وأنانى ده فى لحظة باعنىجاى فاكر أنى هنسى ده أنت جرحك فيا لسة مستحيل يوم يتنسى والجراح هداوى فيها والدموع هقدر عليها وأنت لازم تنتهى
بعد الجرح
هى
آه من كسرة قلبى آه يا خسارة حبى ده أنا كلى آلام والظلم حرام مش هفضل عايشة كده بدموعى خلاص يا دموعى خلاص يا دموعى هيبكى بدل دموعه الدم وهيشيل جوه قلبه الهم ويعرف أنى مش سهلة ولا الدنيا دى مستاهلة أعيشلة ضعيفة مزلولة خلاص يا دموعى هحطم قلبه بأديا وأشوفه بيبكى بعنيا ويندم أنه ضيعنى ويحلم تانى يرجعلى وتفضل عينه مذهولة كفاية تعذيب وجراح أنا نفسى أرتاح وأهرب من ضعفى وأحزانى ده ظلمنى كتير وجرحنى كتير وضحى بقلبى ورمانى خلاص يا دموعى هدوق قلبه طعم الذل هخليه من حياته يمل هحط قصاده ميت حاجز علشان يفضل ذليل عاجز فى يوم يوصلى بسهولة خلاص يا دموعى هتفضل ناره متقادة وهاخد حقى بزيادة وهكسر قلبه وجناحه علشان يا دموعى ترتاحى ويرجع نفسه مكسورة
بعد محاولاته الرجوع
هى
ما أنا قلت لك غيرنى جرحى غير مشاعرى بدل ملامحى ما بقتش أنا الهادية البريئة الطيبة مابقتش أنا اللى دموع عنيها قريبة ما فاضلش حاجة فيا تعرفها الا أسمى ضيعت منى سنين كتير راحت هدر أنا كنت لك فيها الحبيبة المخلصة وبظلم قلبك مات خلاص ورق الشجر وعلشان يعيش من تانى عايز معجزة قدرت تخدعنى بطريقة مذهله وضحكت على قلبى بكلامك البرىء وفضلت أنا مبهورة بيك ومسلمة وأتارى قلبك كان بيقتل بالبطىء
بعد شهور طويلة
هى
الطفلة البريئة المغمضة بقت من النهاردة مش كده بقت واحدة تانية متمردة والفضل ليك الطفلة اللى فيا أتغيرت عقلت وأديها أتشطرت كانت بين أيديك وأتحررت من بين ايديك الطفلة اللى كانت لعبتك ومن ضعفها جت قوتك أهى أتغيرت من ناحيتك والبركة فيك الطفلة المطيعة اللى سلمت طلع ليها صوت وأتكلمت كانت لعبتك وأتعلمت تلعب عليك
مش هرجعلك والفضل يرجعلك ولا يوم تانى هغلط وهسمعلك يعنى بكل صراحة لا يمكن يوم أنفعلك ولا أنت تنفعلىأيوة دى غلطة يوم ما أخترتك تبقى علشانى غلطة منى وعمرى ما أعملها تانى رفضاك لو أنت إيه

Thursday, May 7, 2009

كثيرة الكلام

هو أنا لية بتكلم كتير كده ؟ هو أشمعنى أنا معاه بس كده ؟ ولية ببقى رغاية وبتكلم بالتفصيل الممل معاه ؟
أسئلة تسألها فتاه لنفسها بعدما جرفتها مشاعرها وجعلتها تميل لأحد الشباب التى تربطها به علاقة عمل بالأضافة الى علاقة أسرية بينهم فهى بطبعها هادئة ورقيقة جدا مثل النسمة ولا يسمع أحد صوتها وقليلة الكلام الا مع ناس قليلين جدا وهى كانت كذلك مع هذا الشاب قليلة الكلام وكلامها معه فى حدود العمل أو أشياء عامة ولكن تأتى الرياح دائما بما لا تشتهى السفن فبعد أغلاق قلبها وعدم الأمان لأى شخص لدخوله دق قلبها لهذا الشاب وتحاول بكل الطرق أن تدارى أحساسها هذا وتتمنى أن يجعله الله من نصيبها فدينها وحيائها وأخلاقها يمنعوها من فعل أى شىء يدل على حبها له وتحاول جاهدة بعد تفكيرها عنه ولكن كل محاولاتها تفشل ولا تجد طريق غير الدعاء لله فهو الذى بيده كل شىء
ولكن بسبب حبها لهذا الشاب أصبحث كثيرة الكلام معه وثرثارة جدا لدرجة تجعلها تشعر كأنها تتطفل كثيرا عليه فهى لا تفوت فرصة الا وتتكلم معه وتحكى كل شىء بالتفصيل الممل سواء كان خاص بعملها أو بأى شىء آخر وكثيرا ما تشعر بأنها متطفلة وتسأله عن ما أذا كان متضايق من كثرة كلامها ليرد عليها بالنفى وبأنه سعيد بكلامها ولكن بسبب حساسيتها المفرطة تشعر كثيرا بعد كل مرة تتكلم فيها معه بأنها ثرثارة وكثيرة الكلام ومتطفلة الى أبعد حد يتخيلة بشر مع أنها لا تتكلم كلمتين مع أى أنسان أخر ومن الممكن أن يمر عليها أيام وأسابيع لا يسمع أحد صوتها
ولكن حبها لهذا الشاب يجعلها دائما تريد الكلام معه وأن تعرفه كل شىء عنها بالتفصيل الممل وهو الآخر أحيانا يسمعها جيدا ويتحدث معها ويناقشها كثيرا وأحيانا آخرى يكون كلامه قليل جدا لدرجة تشعرها بأنها ثرثارة جدا وبأنه متضايق منها ومن كثرة كلامها
هى تتمنى أن يكون أحساسها خاطىء فهى لا تتحمل أى فكرة خاطئة يأخذها عنها ولأنها غير ثرثارة وطبيعتها عكس ما يحدث معه ولكن الهوى غلاب
هى تدعى ربها بأن يقربه منها فى الحلال والخير
ولكن هذه هى الدنيا التى تجعل قلوبنا تميل وتحب أشخاص لا يشعرون بنا فهذه الفتاه تعيش فى حالة غريبة من السعادة والحزن تكون سعيدة جدا عندما تجده يتكلم معها ويستمع لها وتكون حزينة جدا عندما تشعر بعدم رغبتة فى الكلام معها ولا تعرف لماذا يكون مرة متحدث ومتلقى جيد جداااااا لها ومرة آخرى عكس هذا فهى فى حيرة من أمرها ويمر عليها يوم تكون فى قمة سعادتها ويوم آخر تكون فى قمة الحزن فهذا هو القلب الذى يجعلنا نفرح ونحزن فى ذات الوقت وياليت البشر يملكون قلب واعى ما كان حدث ما يحدث لملايين من البشر
ومازالت ترددها بشدة وبكثرة بأنها ليست ثرثارة