Tuesday, February 17, 2009

حطام فتاه

كانت فتاه هادئة الطباع خجولة رقيقة أجتماعية نشيطة وطموحة جدا وطموحها ونشاطها ليس له حدود على الأطلاق وكانت دائما تتطلع للأفضل وكان كل من حولها من أقارب أو جيران أو أصدقاء أو زملاء يحبونها جدا وكانت مميزة دائما عند كل الناس وكانت خدومة لأبعد الحدود وتقف مع أى أنسان يحتاج لمساعدة أو يمر بمشكلة وكانت نعم العون لكل من تقف بجوارهم
أنهت دراستها الجامعية وكلها أمل فى غد أفضل وطموحها كان كبير جدا وكانت تتمنى وجود فرصة عمل فى أى مجال حتى تستطيع أثبات نفسها وبالفعل بعد شهور قليلة وجدت فرصة عمل وكانت بعيدة بعض الشىء عن دراستها ولكنها فرحت بها جدا لأن تحب تعلم كل شىء جديد وحتى تأخذ خبرة فى شىء جديد وبالفعل عملت وكانت نشيطة جدا لدرجة لفتت نظر كل من حولها لها بسبب كثرة نشاطها وحبها للعمل وأتقانها له وأيضا مساعدتها لزملائها فى عملهم وحتى عندما يمروا ببعض المشاكل فى العمل تسعى لإنهاء هذه المشاكل وكانت دائما تنهيها ببراعة وذكاء فأستطاعت فى فترة بسيطة تكوين علاقات صداقة وعلاقات أجتماعية قوية جدا وأصبح لها مكانة مميزة عند كل من حولها
ولكنها أيضا كان لها حلم طوال حياتها تتمنى أن تحققة فكانت تعشق الكتابة منذ نعومة أظافرها ولكنها لم تدرس شىء خاص بهذا الموضوع وعملت أيضا بشىء أخر بعيد عنه ولكن وجدت ما تريد بعد ما بدأت الدخول الى النت وعرفت أشياء كثيرة جدا جعلتها تعود لحلمها فى الكتابة مرة آخرى
وبالفعل تعرفت على عدد من المجلات التى أصبحت تكتب بها وعاد اليها حلمها وطموحها من جديد وأصبحت نشيطة جدا أيضا فى عملها على النت وكان كل من حولها يلاحظ هذا النشاط وأستطاعت بسرعة أثبات نفسها وأصبحت معروفة لعدد لا بأس به من المتابعين للمجلات التى تكتب بها
وفى خلال عملها الأساسى وعملها على النت وطموحها ونشاطها الزائد تعرضت لتجربة شخصية كانت تتوقع أنها سوف تعطيها دفعة للإمام ولكنها تركت بها أثر سىء وخرجت من هذه التجربة محطمة مكسورة وقل طموحها ونشاطها بصورة ملحوظة وتركت عملها الأساسى وحتى عملها على النت أصبحت غير مهتمة به وذلك بسبب تعب نفسيتها بصورة كبيرة
فأصبحت تخاف من كل شىء وأصبحت تستلذ بالجلوس فى البيت والنوم لفترات طويلة وأصبحت الحياه بلا معنى عندها وكل طموحها وعملها هى على وشك أن تضيعه من يديها وهذا بالطبع ليس بقصد منها ولكنها ليست واعية لما يحدث حولها فهى أصبحت مريضة طوال الوقت ومع كثرة ترددها على الأطباء ورأيهم بأن كل ما تعانى منه بسبب أزمة نفسية الا أنها لا تعرف كيف تخرج من أزمتها
فهى تريد العودة للحياه مرة آخرى ولكنها لا تعرف ماذا تفعل فكل شىء تحطم أمامها فحلمها وطموحها ونشاطها ماتوا جميعا
وأصبحت تحب العزلة والبعد عن الناس بطريقة غير طبيعية وعندما تعلم بموعد أى شىء مهم لها لكى تخرج تتعب قبله وتعتذر عن الموعد
أصبحت ذابلة شاحبه لا شهية لها لتناول الطعام
هل هذه هى تلك الفتاه التى كانت كلها نشاط وحيوية وتخرج كل يوم لعملها وتعود لتساعد أمها فى طهى الطعام وترتيب البيت ثم تتابع عملها على النت وتفعل أشياء كثيرة فى تفس الوقت
هل هذه هى تلك الفتاه المرحة التى كانت تساعد الجميع على حل مشاكلهم والوقوف بجوارهم دائما فهى الآن من تحتاج الى أى شخص يقف بجوارها
فهى الآن تشعر بأنها حطام فتاه وتشعر بعدم رغبة فى الحياه وتشعر بأنها تموت موتا بطيئا فحتى فى آحلامها أصبحت لا ترى الا أشخاصا ماتوا فى الواقع فحتى آحلامها تذكرها بالموت
فهى الآن تشعر أنها على حافة الموت
كل حياتها تدمرت ولا تعرف كيف تعود للحياه مرة آخرى

Thursday, February 12, 2009

حب إيه اللى أنت جاى تقول عليه

تعبيرات كتيرة هنسمعها يوم 14 فبراير هابى فلانتين داى ، عيد حب سعيد وغيرها من كلمات الحب والغرام والهيام

واليوم يبقى كله أحمر فى أحمر وهدايا حمرا شوية دباديب على قلوب على أى حاجة تقابلك كله أحمر فى أحمر

والكل عمال يتنحنح ويوقع حنية وكلام حلو وجميل لا عمره قاله ولا عمل بيه أصلا

هو فيه إيه ؟ لا بجد فيه إيه حب إيه اللى أنت جاى تقول عليه أنت عارف معنى الحب إيه

أنا فى أعتقادى أن معظم الناس اللى بتحتفل بالبتاع ده مش عارفين أصلا يعنى أى حب ولا أساسا بيحبوا بعض وتسعة

وتسعين فى الميه منهم أصدقاء أو زمايل وماشين مع بعض من ورا أهلهم

اه

اه والله كلامى صح صدقونى وحتى المرتبطين سواء مخطوبين أو متجوزين تلاقيهم طول السنه عمالين يخبطوا فى بعض

وخناق مالوش أول من أخر وفجأة الدنيا بتبقى وردى وحب فى حب وهدايا وهبل معرفش جه منين

هيا الناس ماينفعش تحب بعض طول السنه ؟

هما أصلا بيحبوا بعض الناس اللى بتحتفل دى ؟

طيب لية ما بيفكروش يقولوا لبعض كلمة كويسة طول السنه ولا حد بيفكر يجيب للتانى حتى علبة مناديل أعتقد ده أكبر

دليل على أن حبهم مش صادق ولا فيه حب من أساسه أصل الحب مش محتاج يوم نبين فيه حبنا الحب موجود على طول

أيوة الناس مش هتقعد طول اليوم تحب فى بعضها ولا تقول كلام حلو

بس محدش يقنعنى أنهم طول اليوم وطول السنه خناق فى خناق وفجأة الحب ظهر وطلع والقلب بقى مولع بالحب ده

ومش قادرين من كتر الحب

أنا بجد بتغاظ جداااااااااااااااااااااااا من الناس دى واللى بيغيظنى أكتر الناس اللى أصلا مش مرتبطين يعنى لا مخطوبين

ولا متجوزين بمعنى تانى ماشين مع بعض سواء كانوا بيحبوا بجد ولا تسلية ولا أى حاجة

أصل معلش الصح معروف والغلط معروف يعنى إيه أتنين يمشوا مع بعض تحت مسمى الحب معلش اللى أعرفه أن اللى

يحب حد يدخل البيت من أبوابه وغير كده بعتبره بيتسلى أو بيضيع وقت

يعنى بدون أرتباطات جواز الصالونات ممكن عادى أى أتنين يعرفوا بعض سواء عن طريق الشغل أو الدراسة أو القرابة

أو أى صلة يتشدوا لبعض وكل واحد مثلا يعجب بشخصية التانى وبأى حاجة فيه ايا كانت وممكن فعلا يحبه

فى النقطة دى بقى الحل مش أنهم يكلموا بعض ويمشوا مع بعض هو ممكن يعبر لها عن مشاعره بأى طريقة يعنى ممكن

لو هو بيكلمها وفيه كلام بينهم أصلا يقول لها أنه عايز يتقدم لها ويشوف ردها أيه أو ممكن يوسط حد بينهم ويعرف رأيها

وبعدها يروح يتقدم لها ولكن حوارات بقى الكلام فى التليفون والخروج مع بعض ايام وشهور وسنين والكلام من ورا

الاهل مش بياكل معايا ويعتبر غلط مليون فى الميه

أيه المشكلة لما واحد يكون شافنى وأعجب بيا وممكن أكون أنا كمان أعجبت بيه ولكن ليه نمشى الطريق الغلط طالما الصح موجود

وهيكون أحسن مليون مرة وبعدين فيه حاجة أسمها خطوبة الاتنين بيعرفوا بعض أكتر وممكن لما ماكانوش متوافقين الخطوبة تتفسخ

عادى لكن حكاية صاحبى وبحبه وماشية معاه وصاحبتى وبحبها وماشى معاها ده أسمه تسلية مليون فى الميه والولد دايما بيحتقر

البنت اللى مشيت معاه وكلمته من ورا أهلها

وبعدين الصح واللى أتربينا عليه ودينا قال لنا عليه موجود لية نعمل الغلط

سبينا من النقطة دى وندخل فى نقطة تانية موضوع الأحتفال بعيد الحب أو الفالنتين داى

فى يوم من الأيام من كام يوم وأنا بقلب على التليفزيون خير اللهم أجعله خير لاقيت برنامج عن الفالنتين داى وبيحتفل بعيد الحب كأنه

العيد القومى المهم بقى البرنامج كان قايم على أن أى حد بيحب يتصل ويقول أنه بيحب للى بيحبه وفيه فى البرنامج مسابقة وأى حد

بيتصل بيكسب وكمان فيه بتاع أهبل كده من كلامك بيطلع مؤشر ويقولك نسبة حبك كام ربنا يشفى

المهم معظم اللى أتصلوا بنات ومعظهم بيحبوا صاحبهم ومفيش غير واحدة بس اللى قالت خطيبها والباقى صاحبها وكل واحدة بتتكلم

تفضل تتنحنح وتتدلع وتضحك ضحكة مالهاش غير وصف واحد بس مش مهم أقوله والمذيع يقول لها أسمك أيه تقوله أم الخلول ويقول

لها بتحبى مين تقوله صاحبى أبو جلامبو يقول لها وهو بيحبك تقوله اه يقول لها طيب قولى لأبو جلامبو أنك بتحبيه وأم الخلول تقول له

لا أنا هتكسف وفجأة وبكل بجاحة أنا بحبك يا أبو جلامبو يا حبيب عمرى يا حياتى بكل مياعة وتضحك الضحكة اياها

وبعدين يقوم المذيع يديها هدية ليها ولابو جلامبو ومؤشر الهبل قصدى الحب يقوم قايل لها نسبه حبها كام

نفسى أعرف أهل البنات دول فين ومش سامعينهم وهما بيتكلموا ويدلعوا فى التليفون كده وأزاى أصلا واحدة تطلع وتعمل كده وتقول

أسمها وتقول لأى واحد أنها بتحبه

ده الواحدة لما بتكون مخطوبة أو متجوزة بتتكسف تعمل كده ده على أعتبار الحياء اللى أنا أعرفه عن البنات وأنا عن نفسى لما أتخطب

أو أتجوز عمرى ما أقدر أعمل كده عمرى ما أقدر أتصل ببرنامج وأقول الكلام ده مهما كانت درجة حبى له هو مش فيه حاجة أسمها

حياء ولا ده مابقاش موجود

الغريب بقى أنى لاقيت واحدة عندها 14 سنه متصلة بتقول أنها بتحب صاحبها فى المدرسة من سنه وهو أكبر منها بسنتين وأن أهلها

عارفين عادى

هيا دى مش تعتبر طفلة برضة هو فيه إيه وأزاى أهلها سايبنها كده سبحان الله أنا كنت بسمع وبشد فى شعرى

وبعدين المذيع الظريف قال عادى فيه واحد عنده خمس سنين وبيحب قمت أنا معلقة وكان أخويا وماما سامعنى وقلت أه وفيه واحد

عنده شهر بيحب واحدة عندها يوم ما هو يادوب عليه

قام أخويا قايل لا بيحب واحدة لسة ما أتولدتش

ما هو صحيح يادوب عليه

وبجد بقيت متغاظة جدا من اللى بسمعه ومن المذيع الظريف اللى بيدعو الناس تقول أنها بتحب حتى لو كانت بتحب حد مفيش أى أرتباط

بينهم عادى تعبر عن حبها

يارب أرحمنا

هو فيه إيه والناس بقت بتفكر أزاى وهو لية ما بقاش فيه قيم ولا أخلاق يعنى إيه بحب واحد ومفيش بينا صلة وبكلمه وبمشى معاه

وأهلى مش عارفين لا ومن كتر البجاحة بتصل ببرنامج وبقول كده هو أهل الناس دى فين

أنا مش ضد الحب ابدا ولا أن الناس تحب ولكن فى الأطار الشرعى والصح مفيش مشكلة أن واحد عارفنى سواء عن طريق الشغل

الجيران العيلة أى مكان عارفنى منه وأعجب بيا وحبنى وممكن أكون أنا كمان حبيته ولكن عمر ما هيكون شكل العلاقة بينى وبينه أننا

نكلم بعض ونمشى مع بعض من غير أرتباط الصح أنه يقول لحد واسطة بينا على اللى جواه علشان يعرف رد فعلى وهل فعلا موافقة

أرتبط بيه ولا لأ ولو موافقة يتقدم لأهلى أو حتى يقولى هو لو كان فيه كلام بينا ويشوف ردى أيه ولكن موضوع أننا نمشى مع بعض

ونكلم بعض والحاجات دى لية هو خلاص ما بقاش فيه قيم ولا أخلاق ولا دين

ومعلش أنا عارفة أن كلامى هيزعل بنات وشباب كتير بيحبوا بعض وماشين مع بعض وبيعتبروا ده عادى بس معلش أنا مش هرضى

الناس على حساب دينى ولا القيم والأخلاق اللى أتربيت عليها

الصح صح والغلط غلط وأحنا اللى بنوقع نفسنا فى مشاكل مالهاش لازمة ونرجع نعيط بعد كده

وأنا مابدعوش الناس ما تحبش بعض لا عادى حبوا بعض وعيشوا وقولوا لبعض كلام حلو وهاتوا هدايا ولكن لازم يكون ده فى أطار

شرعى والناس كلها تعرف ومش لازم نفضل نضرب بعض طول السنه وفى يوم يظهر الحب

اللى بيحب حبه موجود على طول ما فيش حاجة أسمها نعمل يوم للحب ونحب فيه بعض ده أسمه هبل ومش حب ابدأ من وجهه نظرى

أنا كمان نفسى أحب وأسمع كلام حلو وأقول برضة كلام حلو بس فى أطار شرعى وصح مش بالطرق اللى بتحصل دى

ويالا كفاية كده وأبقى أكمل بعدين بس ياريت فى التعليقات بلاش ضرب هههههههههههههههه