قرأت مؤخرا

قرأت مؤخرا مدونة جديدة جدا فى كل شىء

والفكرة ببساطة أننا كلنا بنقرأ كتب وساعات بنكون عايزين نعلق على الكتب دى ونقول رأينا وايه عجبنا وايه لأ وعلشان كده جت فكرة المدونة اللى عملتها أنا

والمدون الأخ العزيز أحمد سمير الأغلبية الصامتة

الفكرة بدأت من عند أحمد لما كان كاتب فى بوست له أنه نفسه يعمل مدونة للكتب يكتب فيها رأيه فى أى كتاب يقراه ولكن لضيق الوقت مقدرش يعملها وأنا أقترحت عليه أعمل المدونة ونشترك فيها مع بعض والحمدلله عملناها وهيا دى المدونة

قرأت مؤخرا

وبنوجه دعوة لكل الناس اللى عايزة تشاركنا تبعتلى وأنا هضيفهم معانا فورا على المدونة

وبتمنى المدونة تعجبكم

فنجان القهوة

فنجان القهوة ومتعتى الكبيرة فى عمل القهوة لنفسى وأقف لأنتظرها حتى أضعها فى الفنجان المخصص لها
أعشق القهوة بشكل جنونى لدرجة لا يتخيلها أحد وبسبب حبى لها أصبحت ماهرة فى عمل فنجان القهوة لدرجة تجعل كل البيت لا يشرب القهوة الا من يدى أنا
وهذا يجعل أمى تدفعنى لعمل القهوة لأى ضيف يأتى لنا فى المنزل فهى تعلم جيدا مدى أتقانى لعمل القهوة
ولكنى هذه الأيام أشعر بشعور مختلف عند صنع هذا الفنجان وعند شم رائحة البن وعند شرب القهوة وهذا راجع لتحسن حالتى النفسية بدرجة كبيرة فى الشتاء مهما كانت درجة برودتة فأنا أعشق الشتاء وأعشق شرب فنجان القهوة هذه الأيام بكثرة وتزداد سعادتى عند كل رشفة أخذها من الفنجان ويسرح خيالى بعيدا فى أيام الشتاء وليالية الطويلة وحبى للسير فى شوارع الشتاء ليلا والذى لا أستطيع فعله مطلقا وأمنيتى فى السير على كورنيش النيل الموازى لبيتنا والجلوس عليه وخصوصا فى الشتاء فهى أمنية أحلم بها كثيرا ولكنها لا تتحقق لأسباب كثيرة فأنا أعشق منظر النيل وخصوصا فى أيام الشتاء
تصعد الآن أبخرة فنجان القهوة فى وجهى وأستمتع بها جيدا وهيا توشك على الأنتهاء وأتمنى أن يأتى اليوم وأجد من يحقق لى أمنية جلوسى على النيل والسير ليلا خاصة فى ليالى الشتاء
لا أريد أن أحلم كثيرا ولكن هل يأتى اليوم وأرى فارس آحلامى الذى لما آره حتى الآن ويأخذنى فى نزهة على النيل كما أتمنى ويسير معى ليلا فى جو الشتاء الذى أعشقة وهل سيكون مثلى يحب القهوة ويستمتع بكل فنجان قهوة أصنعه له
وهل سيكون يعشق ليل الشتاء والنيل مثلى وهل سوف يحقق لى أمنيتى أم سيتركنى أحلم كثيرا
فى هذه الليالى الباردة والشديدة البرودة أشعر بسعادة كبيرة وبأنى على وشك لتحقيق أحلامى وطموحى الذى كان فى يوم من الأيام مستحيلا ولكنه الآن وبعد قليل سوف يصبح حقيقة
أحلامى كثيرة وتزداد بسبب سعادتى وبسبب أقترابى من تحقيق حلمى
والآن أنتهى فنجان القهوة وتوقفت عند هذا الحد من الحلم وسوف أعود لأحلم مرة ثانية مع فنجان أخر

ثقافة البلوك block

اه ثقافة البلوك أصلنا المصريين عندنا ثقافة لكل حاجة حتى البلوك
كل شىء عندنا بنحاول نبدع فيه على قد ما نقدر ويمكن ما نكونش فاهمين الحاجة دى بس بنحاول نبدع ونفتى وخلاص أمال ايه لازم نعمل أى حاجة أمال يتقال علينا مش فاهمين دى حته عيبة فى حقنا
طبعا كلنا عندنا ايميلات وعارفين يعنى إيه بلوك وأزاى نعمل بلوك لحد وأزاى نشيلة والحركات دى
ولكن كل واحد له ثقافة فى البلوك بتاعه فيه ناس بتعمل بلوك للناس الرغاية اللى بتتدوشهم كل شوية وناس تعمل بلوك للناس اللى مش محترمين وهما مش عايزين يختلطوا بيهم وناس تعمل بلوك فى أوقات ما تكون مضايقة أو زعلانة وبعد ما تروق تشيل البلوك عن كل الناس
وطبعا فيه أسباب كتيرة الناس بتعمل بلوك علشانها ومتعددة ومتشعبة
وطبعا أحنا كشعب بيحب يفنن ممكن بدون سبب أو مبرر نعمل بلوك لحد كده وخلاص لأننا مزاجنا مش ولابد ومش عايزين نكلم حد طيب ما أنت ممكن تفتح ميلك وتعمل مشغول أو أوف لاين أو أى حالة من الحالات الموجودة وأكيد الناس اللى عندك هتفهم وممكن بكل بساطة لو أنت أون لاين ولاقيت حد بيكلمك وأنت تعبان أو مش عايز تتكلم تعتذر له وأكيد هو هيقدر ولكن أنك بمزاجك وبدون أى سبب تعمل بلوك لحد ولما يجيلك مزاجك تانى تكلمه تشيل البلوك دى بصراحة أسمها قلة ذوق وعدم أحترام للشخص اللى قدامك لأن محدش أجبرك تضيف الشخص ده عندك وحتى لما ضيفته ولاقيت أنك مش عايز تكلمه فيه مليون طريقة للأعتذار ليه ولكن حكاية البلوك بمزاج وأنك تشيله بمزاجك علشان تكلمه ده عدم أحترام للناس
أنا واحدة من الناس بعمل بلوك فى حالات معينة

أولا الاقى ميل ضايفنى وأنا مش عارفة بتاع مين فممكن أقبل ممكن يكون حد عارفنى وغير ميلة ولا حاجة ولا أى سبب تانى ولكن لما الاقى حد انا معرفوش ضايف ميلى لمجرد أنه شافه فى ميل من الميلات الجماعية اللى بتتبعت وعايز يتعرف وخلاص بقوم حذفاه وعمله له بلوك فورا
ثانيا لما الاقى الشخص اللى قدامى سواء كان واحد أو واحدة مش محترمين ساعتها مش هتردد لحظة أنى أعمل لهم بلوك وأحذفهم
ثالثا لو حد أتعدى حدودة معايا مش هتردد برضة انى أعمل له بلوك وأحذفة

ولكن اللى مش مقبول ومش منطقى أنى لما مايكونش عندى مزاج أكلم حد أقوم عاملة له بلوك ولما يجيلى مزاج أشيلة
وللأسف المصرى هو المصرى فاكر انه هو بس اللى بيفهم وأن اللى قدامه مش هيعرف أنه عامل له بلوك أعتقد دى حاجة الناس كلها بقت بتعرفها مش محتاجة حاجة يعنى
وللأسف برضة مش هتردد لحظة عن عمل بلوك وحذف أى حد يعمل ليا بلوك بدون سبب وعذرة الوحيد أنه مش عايز يتكلم فى وقت من الأوقات وممكن وقت تانى يبقى عايز يتكلم فيشيل البلوك
أنا أحسن عندى مليون مرة أن اللى قدامى يقولى بلاش تكلمينى أنا مش عايز أكلمك أو أى سبب من الأسباب اللى هتخلينى أكيد مش هكلمه لما يطلب منى كده
لكن موضوع البلوك ده بدون سبب ولأسباب غريبة وغير منطقية لا أقبله
ولكننا هنفضل متفردين برضة كمصريين فى كل حاجة
وشكرا لكل واحد يفكر يعملى بلوك لأنى مش هتردد عن أنى أعمله بلوك وأحذفه تماما من عندى

وسلملى على البلوك

بدأ العد التنازلى

حلم كان بعيييييييييييييييييييييد قوى فضلت أحلم بيه أنا وصديقتى وعلى الرغم من مرورى أنا وهيا بظروف خاصة قاسية جدا كانت هتقف فى سبيل تحقيق حلمنا الا أننا فضلنا متمسكين بحلمنا والحمد لله تخطينا وعدينا كل الظروف والحلم بدأ يبقى حقيقة وهيبقى بين أيديكم قريب

الحلم بدأ بمدونة البنات عايزة إيه ولكن كان عندنا أحساس أننا عايزين حاجة أكبر من كده وفضلنا نحاول مع حلمنا لحد ما كبر الحمد لله وقرب يبقى حقيقة فى أيد كل الناس

وعلى الرغم من خوفنا الكبير من التجربة دى الا أننا سعداء جدا بيها ويمكن خوفنا مش مخلينا أصلا نحس بأى سعادة ويمكن لأنها أول مرة فالموضوع بالنسبة لينا مختلف ومخيف ولذيذ وحلو فى نفس الوقت

أحاسيس كتيرة جوايا خوف ، سعاده ، رهبة ، فرح ، حاجات كتيرة قوى

يارب يكمل حلمنا على خير

ان شاء الله الكتاب هيكون موجود فى معرض الكتاب

الكتاب صادر عن دار الكاتب للنشر والتوزيع

بنتمنى الكتاب يعجبكم