الميكروباص كان هينفجر

شىء غريب عجيب حصلى أمبارح أنا وماما كنا راجعين فى أمان الله للبيت وراكبين السرفيس بس هو مش سرفيس بالمعنى المعروف لأن كانت كل حته فيه مكسرة ومتبهدلة وكل ناحية ماشية لوحدها أزاى مش عارفة

المهم السواق عمال يتنطط وينط بينا هنا وهنا وأحنا مستحملين وأول ما ركبنا عدى على الميكانيكى يملى كاوتش العربية قلنا تمام هيعوض بقى الخبط والرزع ده وبرضة مفيش فايدة

وعمال يجرى ويتنطط والعربية بتزيق وبتطلع أصوات غريبة كنا حاسين أنها هتتفكك من بعضها والسواق أصلا مش واخد باله من الطريق ومشغول ببنتين كانوا قاعدين على الكرسى اللى جمبه وكنت بصراحة عايزة أديلة على دماغه وسبحان الله ربنا حب يفوقه ويقوله أنت عينك مش على الطريق ولا خايف على روحك ولا أرواح الناس وعمال تعاكس البنات وممكن تموت وأنت كده

وقد كان فجأة والسواق كان واقف ينزل ناس ويادوب لسة بيمشى سمعنا صوت طرقعة جامد ودخان طالع والسواق قام مفرمل بسرعة وقال لنا أنزلوا هههههههههههههههههههه

طبعا العمر مش بعزقة ونزلت أنا وماما بسرعة وعرفنا أن العجلة أنفجرت بس الدخان ده كان بتاع إيه مش عارفة المهم كملنا الطريق مشى ولولا ستر ربنا وبأنه كان ماشى براحة ماكناش عارفين كان هيجصل إيه الحمدلله على كل حال

ولكن أنا كان نفسى اسأل السواق سؤال لو كان حصل والعربية حصل لها حاجة ومات أو متنا كلنا كان هيروح لربنا بأى شكل وهو أخر حاجة كان بيعملها كان بيعاكس بنات وبالأضافة الى أنه كمان كان هيتحاسب على أرواح الناس اللى معاه

سبحان الله حاجات بسيطة والناس مش واخدة بالها منهاوياما ملايين العربيات بتبقى ماشية تعاكس فى دى ودى واللى مركب بنات مالوش علاقة بيهم ولكنهم بيعيشوا حياتهم وغيرهم وغيرهمياريت نفوق قبل ما يجى يوم ما ينفعش فيه الرجوع ولا الندم

وحمدالله على سلامتى أنا ومامتى

:)))))))))))