تاج الرعب

يااااااااااااااااااااااااااه من زمان قوى محدش أهدانى تاج ولكن المدون العزيز أحمد سمير أهدانى تاج من شوية وهو تاج مرعب جدا بس حلو قوى يالا نبدأ

س1) لو ماشي في الصحراء تخيل احساسك هيكون ازاي ؟متصورها ازاي؟و هتعمل ايه؟

يعنى هكون متصوراها أزاى صحراء يعنى مكان واسع ورمل وهدوء وسكون ورعب ورهبه من الوحده وأحساسى أكيد لو ماكنتش فى رحلة ومعايا ناس مثلا هكون خايفة جدا ومش عارفة مصيرى هيبقى إيه ولكن لأنى بحب المغامرة جدا ممكن أفضل ماشية ولو معايا الكاميرا بتاعتى هفضل أصور أى حاجة وكل حاجة لحد ما أشوف أخرتها إيه لو معايا الموبايل هكلم أعز الناس على قلبى مش ممكن تكون دى أخر مرة أسمع صوتهم فيها وهفضل أدعى ربنا يغفرلى ذنوبى

س2)لو ماشي في غابة احساسك هيكون ايه ؟ و هتعمل ايه لو لقيت نفسك فيها؟

يعنى مش متهيألى حد هيروح غابة فى رحلة ولو حصل يعنى أكيد هكون فرحانة بالحاجات اللى هشوفها وهفضل أصور فيها ولكن لو لاقيت نفسى فى غابة لوحدى ومش معايا حد أكيد هخاف جدا جدا من الحيوانات اللى فيها وهبقى ماشية أتلفت ورايا وقدامى وفى كل حتة ليطلعلى تعبان من هنا ولا أسد من هناك ولا حاجة ونفس اللى عملته وأنا فى الصحراء لو معايا موبايل هكلم أعز الناس على قلبى وهوصيهم يدعولى لو مت وهفضل طبعا أدعى ربنا يغفرلى ذنوبى

س3) لو لقيت صندوق فى الصحراء هتحاول تفتحة ولا ؟ ولو فتحتة تتخيل هايكون فية اية؟

أكيد هحاول أفتحة لأنى بحب المغامرة والتخيل جدا ومع إنى جبانة بس برضة هحاول أفتحة وممكن الاقى فيه مثلا ملابس لأى حد كان موجود فى الصحراء أو بقايا أكل وميه لصحاب الصندوق أو بقى ممكن الاقى فيه زى الأفلام دهب وياقوت ومرجان

س5)لو لقيت حصان فى الصحراء تفتكر هايكون لونة اية؟ وهتركب ولا هتسيبة وتمشى؟

حصان أبيض أو بنى لأنى بحب الحصان اللى باللون ده وبعدين مش هركبه لأنى لحد دلوقتى مبعرفش أركب حصان ولكن لو ساعتها كنت بعرف هركبه وأشوف هيودينى فين ما هى بايظة بايظة يعنى

س6) لو لقيت سلم فى الصحراء هتعمل اية؟ هتاخدة معاك ولا هتطلع ولا هاتسيبة وتمشى ولا اية؟

أنا مش عارفة أصلا السلم هيكون موجود فى الصحراء لية وطالع منين ورايح فين ولكنى هطلعه وهشوف أخرتها إيه

س7) لو لقيت ماج فى الصحراء تفتكر هايكون شكلة ازاى؟ وهتعمل بية اية؟

ماج فى الصحراء وده من إيه أكيد هيكون حديد أو صاج معتقدش هيكون غير كده ومش هعمل بيه حاجة لأنى هقرف منه وبعدين هخاف أمسكة ليكون فيه حشرات جواه تطلع عليا

س8) لو كنت ماشى فى الغابة ولقيت أسد هتعمل اية؟ هاتجرى ياترى؟ ولا هتهاجم ؟ولاهاتقف مكانك ولا اية؟

أسد أنت بتهزر فعلا أكيد هجرى مش قدامى غير كده وأنا ونصيبى بقى يالحقنى وياكلنى يا الحق أنا أبعد عنه

س9) لو مشيت فى الغابة ولقيت بحيرة ياترى فى تخيلك هاتكون شكلها عامل ازاى؟ وهتعديها ولا ؟

هيكون شكلها ميه ملوثة وفيها كل حاجة ملوثة تتخيلها وعمرى ما هعديها لأن أكيد هيكون فيها تماسيح ومش معقول هقدم لهم نفسى يتغدوا بيا وكمان لأنى مش معايا مركب ولا بعرف أعوم

س10) لو شفت سور فى الصحراء على شرط انة مرتفع قوى وطويل قوى قوى هتعمل اية ؟ هتمشى معاة وتشوف اخرة؟ ولا هتحاول تكسرة ولا هتعمل اية؟

همشى معاه وأشوف أخره أصل أكيد مش هيكون معايا حاجة أكسره بيها يبقى أمشى وأشوف أخرتها إيه

-------------------------------------------

وقد وصلنا لنهاية التاج والآن جاء وقت الأهداءات

قلب ينبض بالحب

أيامنا الحلوة

حاجة صغنونة من غير فذلكة

خالو أحمد الصباغ ومع إنى عمرى ما شفته عامل تاجات عنده بس قلت أهديه له لعل وعسى يعجبه وياخده عنده