كل سنه وانتى معايا يا أمى

كل ما تعدى سنه عليا ويجى عيد الأم أحس أكتر بأهمية وجود أمى فى حياتى وبأنى لولاها ماكنتش هبقى كده وكنت هبقى ولا حاجة
كل ما تعدى سنه وأكبر شوية وعقلى يكبر بفهم يعنى إيه كلمة أم ومعنى وجودها فى حياتى إيه
كل ما تعدى سنه بلوم نفسى على أى لحظة غباء كنت بزعلك فيها أو بزعل من منعك ليا مثلا بالخروج أو السفر لأى مكان أو رفضك لأى شىء علشان خايفة عليا وأنا كنت بغبائى بفسره تفسير تانى وبعمل مشاكل كتيرة مش عارفة بجد أعمل إيه علشان أكفر عن اللى كنت بعمله معاكى
كل ما تعدى سنه بحس بأحتياجى ليكى أكتر من الأول ومع أنى كبرت والمفروض أكون بعتمد على نفسى ولكنى برضة مابقدرش أعمل حاجة ومن غيرك ومن غير وجودك حياتى كلها مالهاش لازمة وهتقف
فاكرة من حوالى سنتين لما كانت خالتى عاملة عملية فى مكان غير اللى أحنا عايشين فيه وفى نفس الوقت كانت جدتى عندنا وتعبانة وإنتى سافرتى لخالتى وأنا فضلت أسبوع بحاله شايلة البيت وبعمل كل حاجة كنت حاسة بجد بأنى تايهة ومش عارفة أعيش ومش عارفة أعمل حاجة وفى أخر الأسبوع جيت لك جرى ورجعت وإنتى معايا لأنى مقدرتش أعيش ولا أروح ولا أجى من غيرك
عارفة النهاردة لما خرجت كنت خارجة أشترى ليكى هدية وبجد أحترت أجيب ليكى إيه ولا إيه ولأن الدنيا كلها مش كفاية عليكى ورجعت بدون ما أجيب حاجة وناوية أخرج تانى بكرة أشوف حاجة تليق بيكى مع إنى برضة مش هلاقى حاجة توفيكى حقك ولا تليق بمقامك عندى
فاكرة السنه اللى فاتت وقت عيد الأم ساعتها أنا كنت مخطوبة وماكانش معايا فلوس وماجبتش ليكى حاجة وإنتى خدينى وخرجنا نشترى هدية لحماتى ومع إنى ما أشترتش ليكى حاجة ولكنك كنتى حريصة بأنك تعلمينى أعامل حماتى زيك بالظبط
عارفة أنى مقصرة فى حقك كتير قوى وسايبه هم البيت كله على دماغك ومش عارفة بجد أعمل لك إيه ولا إيه
بس أنا بحبك قوى أكتر من أى حد وأى حاجة فى الدنيا ما تساويش دقيقة فى قربى منك ووجودى معاكى
نفسى أفرحك قوى ومش عارفة وصدقينى ده غصب عنى مش بإيدى بجد
حسيت بقربك منى قوى أيام المشاكل اللى كانت حاصلة وأنا مخطوبة وأنا كنت بموت من التعب وإنتى تعبانة بسبب زعلك عليا وواقفة على دماغى تدينى الدوا والأكل بجد من غيرك كنت هموت محدش عملى حاجة غيرك
محدش حس بيا ووقف معايا غيرك وكنت بسمعك وإنتى حاسة بيا وأنا عاملة نفسى نايمة وعمالة أعيط على اللى شفته وإنتى بتقولى لأخويا روح أقعد مع أختك وأتكلم معاها خرجها من اللى هيا فيه والاقى أخويا جاى جرى عليا ومش متخيل أنى مش نايمة ولما يلاقينى بتحرك يفضل هو وإنتى تحاولوا تقومونى وتخرجونى من حالتى بأى طريقة
مش عارفة أقول عنك إيه ولا إيه كنت حاسة بفرحتك قوى بيا يوم حفل توقيع كتابى وكنت كل ما بتكلم أبص ليكى علشان أستمد قوتى منك ومع أنى عارفة أنك بتتعبى من السفر ولكنك أصريتى تكونى معايا فى اليوم ده
إنتى أكتر حد بيشجعنى وواقف معايا فى طموحى وآحلامى وشغلى بجد مش عارفة أعمل ليكى إيه
مش قادرة أنسى أنك انتى اللى بتقولى للناس أنا بنتى بتعمل كذا وكذا وتعرفيهم باللى بعمله بجد إنتى أحسن أم شفتها فى حياتى
كل اللى كتبتة ده مايجيش نقطة فى بحر من اللى عملتية علشانى أنا وأخواتى ولسة بتعملية لحد دلوقتى
نفسى أفرحك قوى وأعمل الحاجة اللى إنتى مستنياها وبدعى ربنا إنى أقدر أحققها ليكى
عارفة إنتى أحسن أم شفتها فى حياتى ومفيش زيك ولا هشوف زيك أبدا
أم علمتنى معنى صلة الرحم اللى بجد أم علمتنى أزاى أبقى صاحبة صاحبى أم علمتنى أزاى أقف جمب الناس فى كل أوقاتهم سواء كان حزن أو فرح أم علمتنى أزاى أبقى بنت مؤدبة ومحترمة وملتزمة وعلاقتى بالناس كويسة أم علمتنى أزاى البس لبس محترم ومحتشم وفى نفس الوقت شيك ومش مبالغ فيه أم علمتنى أزاى أحب أخواتى قوووووووووووى وأزاى أحب قرايبى وأصحابى وجيرانى أم علمتنى أزاى أساعد الغير حتى لو كلفتنى المساعدة دى كتير أم علمتنى أسامح أغفر أم علمتنى أحب كل الناس
لو فضلت أقول إنتى علمتينى إيه مش هيكفينى مليون موضوع
بحبك قوووووووووووووووووووووووووووووووووى
ويمكن أنا كنت ناوية أنزل الموضوع ده فى مدونتى وعلى الفيس بوك ولكنى كمان فكرت أطبع الورقة دى ليكى وأحطها ليكى علشان تصحى تشوفيها وربنا يخليكى ليا يارب يا أحسن أم فى الدنيا